(vovworld) – ວັນທີ 22/12 ທ່ານ Perfecto Yasay ລັດຖະມົນຕີການຕ່າງປະເທດ ຟີລີບປິນ ໃຫ້ຮູ້ວ່າ: ປະເທດນີ້ ພວມ “ຊັ່ງຊາບັນດາຂໍ້ລິເລີ່ມດ້ານການທູດ ແລະ ລະບຽບການນິຕິກຳ ເຊິ່ງກົດໝາຍສາກົນອະນຸຍາດ”, ພາຍຫລັງມີຂ່າວກ່ຽວກັບເລື່ອງ ຈີນ ຜັນຂະຫຍາຍລະບົບອາວຸດຢູ່ບັນດາເຂດເຊິ່ງ ປັກກີງ ຖະແຫຼງອະທິປະໄຕບົນທະເລຕາເວັນອອກ. ອາທິດແລ້ວນີ້ ສູນຄົ້ນຄວ້າຍຸດທະສາດ ແລະ ສາກົນ (CSIS - ມີສຳນັກງານຢູ່ ວໍຊິງຕັນ, ອາເມລິກາ) ຍົກອອກບົດລາຍງານກ່ຽວກັບບັນດາການເຄື່ອນໄຫວດ້ານການທະຫານຢ່າງຈະແຈ້ງຂອງ ຈີນ ໃນເຂດທະເລທີ່ມີຄວາມຂັດແຍ້ງກັນ, ເຊິ່ງລວມມີເຂດທີ່ນອນໃນເຂດເສດຖະກິດຈຳເພາະ (EEZ) ຂອງ ຟີລີບປິນ ຕາມສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS). ປະຕິກິລິຍາຕໍ່ບົດລາຍງານດັ່ງກ່າວ, ທ່ານລັດຖະມົນຕີການຕ່າງປະເທດ Yasay ໃຫ້ຮູ້ວ່າ: ລັດຖະບານ ຟີລີບປິນ ພວມສືບຕໍ່ຮັບເອົາຂໍ້ມູນຂ່າວເພື່ອຮັບຮູ້. ທ່ານຍັງຢືນຢັນວ່າ: ຟີລີບປິນ ວິຕົກກັງວົນທີ່ສຸດ ຖ້າຫາກວ່າບັນດາຂໍ້ມູນຂ່າວດັ່ງກ່າວແມ່ນຖືກຕ້ອງ, ພ້ອມທັງເນັ້ນໜັກວ່າ ບັນດາການກະທຳນີ້ ພຽງແຕ່ເຮັດໃຫ້ ຄວາມເຄັ່ງຕຶງທີ່ມີຢູ່ແລ້ວເພີ່ມຂຶ້ນ. ທ່ານລັດຖະມົນຕີການຕ່າງປະເທດ ຟີລີບປິນ ບໍ່ເປີດເຜີຍລາຍລະອຽດກ່ຽວກັບບັນດາຂໍ້ລິເລີ່ມ ດ້ານການທູດ ກໍ່ຄືລະບຽບການນິຕິກຳຕາມກົດໝາຍສາກົນ ເຊິ່ງທ່ານໄດ້ເຕື້ອງເຖິງ.
