(vovworld) - ລັດຖະບານຫາກໍປະກາດໃຊ້, ອະນຸມັດຜ່ານບາງລັດຖະນະໂຍບາຍກ່ຽວກັບບັນຫາຄຸ້ມຄອງ, ນຳໃຊ້ດິນປູກເຂົ້າ, ພັດທະນາກຸ່ມບໍລິສັດເສດຖະກິດຢ່າງໝັ້ນຄົງເຂັ້ມແຂງ. ຕາມດຳລັດຂອງລັດຖະບານກ່ຽວກັບການຄຸ້ມຄອງ, ນຳໃຊ້ດິນປູກເຂົ້າ, ເລີ່ມແຕ່ວັນທີ 1/7/2012, ນອກຈາກໄດ້ຮັບການໜູນຊ່ວຍຜະລິດເຂົ້າໃນແຕ່ລະປີແລ້ວ, ຊາວກະສິກອນປູກເຂົ້າ ຍັງໄດ້ຮັບການຊ່ວຍເຫຼືອໃນເມື່ອການຜະລິດເຂົ້າຖືກເສຍຫາຍຍ້ອນໄພທຳມະຊາດ, ໂລກລະບາດ. ໂດຍລະອຽດແມ່ນ ງົບປະມານແຫ່ງລັດຈະໜູນຊ່ວຍ 70% ຄ່າໃຊ້ຈ່າຍຊື້ຝຸ່ນເຄມີ ແລະ ຢາປາບສັດຕູພຶດ ເມື່ອການຜະລິດເຂົ້າຖືກເສຍຫາຍກ່ວາ 70%, ລະດັບໜູນຊ່ວຍ 50% ເມື່ອການຜະລິດເຂົ້າຖືກເສຍຫາຍແຕ່ 30 – 70%. ງົບປະມານແຫ່ງລັດໜູນຊ່ວຍ 70% ຄ່າບຸດເບີກທີ່ດິນເປົ່າຫວ່າງເປັນດິນປູກເຂົ້າ. ໜູນຊ່ວຍ 100% ແນວພັນເຂົ້າໃນປີທຳອິດເພື່ອຜະລິດໃນເນື້ອທີ່ດິນປູກເຂົ້າທີ່ຫາກໍໄດ້ຮັບການບຸກເບີກໃໝ່.
ກ່ຽວກັບການພັດທະນາກຸ່ມບໍລິສັດເສດຖະກິດຢ່າງໝັ້ນຄົງ, ຂໍ້ຕົກລົງຂອງລັດຖະບານໄດ້ຊີ້ແຈງວ່າ : ຮຽກຮ້ອງໃຫ້ພັດທະນາກຸ່ມບໍລິສັດອຸດສາຫະກຳຖ່ານຫີນ - ແຮ່ທາດ ຫວຽດນາມ ກາຍເປັນກຸ່ມບໍລິສັດເສດຖະກິດໝັ້ນຄົງ, ປະກອບສ່ວນເຂົ້າໃນການຮັບປະກັນຄວາມໝັ້ນຄົງດ້ານພະລັງງານແຫ່ງຊາດ. ລັດຖະບານຮຽກຮ້ອງໃຫ້ ຍົກສູງກຳລັງການແກ່ງແຍ່ງຂອງກຸ່ມບໍລິສັດອຸດສາຫະກຳຖ່ານຫິນ - ແຮ່ທາດຫວຽດນາມເທື່ອລະກ້າວ ບົນພື້ນຖານນຳໃຊ້ແຫຼ່ງຊັບພະຍາກອນທີ່ມີຢູ່ແລ້ວ, ສຸມໃສ່ເຂົ້າໃນບັນດາຂົງເຂດຕົ້ນຕໍຄື: ອຸດສາຫະກຳຖ່ານຫີນ, ອຸດສາຫະກຳແຮ່ທາດ, ອຸດສາຫະກຳໄຟຟ້າ, ອຸດສາຫະກຳກົນຈັກ, ອຸດສາຫະກຳເຄມີ ແລະ ອຸດສາຫະກຳວັດສະດຸກໍ່ສ້າງ.
