( vovworld ) – ວັນທີ 19/4, ໂຄສົກທູດພິເສດຮ່ວມຂອງສະຫະປະຊາຊາດ - ສະຫະພັນອາຣັບ ໃຫ້ຮູ້ວ່າ ສະຫະປະຊາຊາດ ແລະ ລັດຖະບານຊີຣີ ໄດ້ລົງນາມໃນຂໍ້ຕົກລົງກຳນົດໜ້າທີ່ຂອງຄະນະນັກສັງເກດການສະຫະປະຊາຊາດທີ່ໄປຍັງຊີຣີ ເພື່ອຕິດຕາມກວດກາການປະຕິບັດຂໍ້ຕົກລົງຢຸດຍິງ. ທ່ານຮອງລັດຖະມົນຕີການຕ່າງປະເທດຊີຣີ Faisal Mekdad ແລະ ທ່ານຮອງທີ່ປຶກສາການທະຫານຂອງຄະນະຮັກສາສັນຕິພາບສະຫະປະຊາຊາດ Guha Abhijit ໄດ້ລົງນາມໃນຂໍ້ຕົກລົງນີ້ຢູ່ Damascus. ຂໍ້ຕົກລົງນີ້ໄດ້ຊີ້ໃຫ້ເຫັນບົດບາດໜ້າທີ່ຕ່າງໆຂອງບັນດານັກສັງເກດການເມື່ອເຂົາເຈົ້າປະຕິບັດພາລະກຳຂອງຕົນຢູ່ຊີຣີ ກໍຄືບັນດາພັນທະ ແລະ ໜ້າທີ່ຮັບຜິດຊອບທີ່ກ່ຽວຂ້ອງຂອງລັດຖະບານຊີຣີ. ຂໍ້ຕົກລົງຈະສ້າງພື້ນຖານໃຫ້ອານຸສັນຍາກຳນົດໜ້າທີ່ຂອງຄະນະນັກສັງເກດການສະຫະປະຊາຊາດ ເຊິ່ງຄາດວ່າເອກະສານສະບັບນັ້ນຈະເປີດຊ່ອງທາງໃຫ້ແກ່ບັນດານັກສັງເກດການກວດກາສະພາບຕົວຈິງຢູ່ສະຖານທີ່ຕ່າງໆໃນທົ່ວປະເທດຊີຣີ.
