 ພິທີເປີດການບໍລິການອອກວີຊາເອເລັກໂຕນິກ |
ຕາມຂ່າວຈາກໜັງສີພິມວຽງຈັນທາຍ, ກະຊວງການຕ່າງປະເທດໂດຍສົມທົບກັບບັນດາ ພາກສ່ວນທີ່ກ່ຽວຂ້ອງຂອງລັດຖະບານໄດ້ຈັດພິທີເປີດການບໍລິການອອກວີຊາເອເລັກໂຕນິກ (eVisa) ຢ່າງເປັນທາງການ ໃນຕອນບ່າຍຂອງວັນທີ 09/07/2019 ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ. ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ກ່າວວ່າ: ຫວ່າງມໍ່ໆມານີ້ ລັດຖະບານ ແຫ່ງ ສປປ ລາວ ໄດ້ຕົກລົງໃຫ້ມີການພັດທະນາ ລະບົບອອກວີຊາເອເລັກໂຕນິກ (eVisa) ເພື່ອເປັນທາງເລືອກໃໝ່ໜຶ່ງອີກ ໃຫ້ແກ່ຄົນຕ່າງປະເທດ ໂດຍແນໃສ່ຊຸກຍູ້ສົ່ງເສີມການພົວພັນ ຮ່ວມມືໃນດ້ານຕ່າງໆ ກໍ່ຄືການໄປມາຫາສູ່ ລະຫວ່າງ ຄົນລາວ ແລະ ຄົນຕ່າງປະເທດ ໃຫ້ມີການຂະຫຍາຍຕົວຍິ່ງຂຶ້ນ. ລະບົບດັ່ງກ່າວນີ້ຈະໄດ້ນຳໃຊ້ໄປຄຽງຄູ່ກັບລະບົບທີ່ປະຕິບັດ ຢູ່ໃນປະຈຸບັນ, ສໍາລັບລະບົບອອກວີຊາເອເລັກໂຕນິກ ໄດ້ອອກແບບມີລັກສະນະງ່າຍດາຍ, ບໍ່ສັບສົນ, ສາມາດເຂົ້າໃຈງ່າຍ, ມີຄວາມສະດວກ, ວ່ອງໄວ ແລະ ມີຄວາມປອດໄພ ສຳລັບຜູ້ຊົມໃຊ້, ຊຶ່ງທຸກຄົນສາມາດສະເໜີຂໍວີຊາເຂົ້າ ສປປ ລາວ ທາງອອນລາຍໄດ້ໃນທຸກເວລາ ແລະ ທຸກສະຖານທີ່ ທີ່ມີອິນເຕີແນັດ ແລະ ເປັນການປະຢັດຄ່າໃຊ້ຈ່າຍ ຖ້າທຽບໃສ່ການໄປຂໍ້ວິຊາຢູ່ບັນດາສະຖານທູດ, ສະຖານກົງສູນໃຫຍ່, ຫ້ອງການກົງສູນຂອງລາວທີ່ຢູ່ຕ່າງປະເທດ, ລວມທັງຂໍຢູ່ກັບດ່ານສາກົນຕ່າງໆ.
