ຄະນະປະຈຳສະພາແຫ່ງຊາດ ໃຫ້ຄຳເຫັນຕໍ່ຮ່າງກົດໝາຍວ່າດ້ວຍການໂຄສະນາ ແລະ ລັດຖະບັນຍັດບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ
(ພາບ:ktdt.com.vn)
( vovworld ) – ໂດຍໄດ້ສືບຕໍ່ວາລະປະຊຸມຄັ້ງທີ 7, ໃນຕອນບ່າຍຂອງວັນທີ 17/4, ຄະນະປະຈຳສະພາແຫ່ງຊາດສືບຕໍ່ໃຫ້ຄຳເຫັນກ່ຽວກັບຮ່າງກົດໝາຍສະບັບປັບປຸງ ແລະ ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍໄຟຟ້າ. ກ່ອນໜ້ານັ້ນ, ໃນຕອນເຊົ້າວັນທີ 17/4, ຄະນະປະຈຳສະພາແຫ່ງຊາດໄດ້ໃຫ້ຄຳເຫັນກ່ຽວກັບຮ່າງກົດໝາຍວ່າດ້ວຍການໂຄສະນາ ແລະ ລັດຖະບັນຍັດສະບັບປັບປຸງ ແລະ ເພີ່ມເຕີມບາງຂໍ້ມາດຕາຂອງລັດຖະບັນຍັດບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ. ກ່ຽວກັບລັດຖະບັນຍັດສະບັບປັບປຸງ ແລະ ເພີ່ມເຕີມບາງຂໍ້ມາດຕາຂອງລັດຖະບັນຍັດບຸລິມະສິດຜູ້ມີຄຸນງາມຄວາມດີການປະຕິວັດ, ຜູ້ແທນສ່ວນຫຼາຍໄດ້ເຫັນດີກັບໃບຍື່ນສະເໜີຂອງລັດຖະບານກ່ຽວກັບຂອບເຂດການປັບປຸງ, ເພີ່ມເຕີມ ເພື່ອແນໃສ່ຮັບປະກັນລັກສະນະເໝາະສົມ ແລະ ນະໂຍບາຍໃຫ້ບຸລິມະສິດທີ່ດີກ່ວາສຳລັບຜູ້ມີຄຸນງາມຄວາມດີຕໍ່ປະເທດຊາດ. ກ່ຽວກັບການເປີດກ້ວາງນະໂຍບາຍໃຫ້ບຸລິມະສິດການປະກັນສຸຂະພາບສຳລັບຍາດຕິພີ່ນ້ອງຂອງຜູ້ມີຄຸນງາມຄວາມດີຕໍ່ປະເທດຊາດ, ທ່ານນາງ Truong Thi Mai ປະທານກຳມາທິການບັນດາບັນຫາສັງຄົມ ຖືວ່າ:
“ການເປີດກ້ວາງນະໂຍບາຍສຳລັບຍາດຕິພີ່ນ້ອງຂອງຜູ້ມີຄຸນງາມຄວາມດີ ຕ້ອງໄດ້ຮັບການຊັ່ງຊາຕື່ມອີກ, ໃນສະພາບການທີ່ມາຮອດປະຈຸບັນ ຍັງບໍ່ທັນມີນະໂຍບາຍປະກັນສຸຂະພາບສຳລັບຜູ້ເຂົ້າຮ່ວມການຕໍ່ຕ້ານປົດປ່ອຍຊາດ, ປົກປັກຮັກສາປະເທດຊາດ, ປະຕິບັດພັນທະສາກົນ ແລະ ຜູ້ມີຄຸນງາມຄວາມດີຊ່ວຍເຫຼືອການປະຕິວັດໄດ້ຮັບໃບຍ້ອງຍໍຂອງທ່ານາຍົກລັດຖະມົນຕີ, ລັດຖະມົນຕີ, ປະທານຄະນະກຳມະການປະຊາຊົນຂັ້ນແຂວງກ່ຽວກັບຜົນງານໃນການຕໍ່ຕ້ານ. ສະນັ້ນ ຄະນະກຳມາທິການບັນດາບັນຫາສັງຄົມສະເໜີໃຫ້ລັດຖະບານ ຕ້ອງຕີລາຄາ, ຄາດຄະເນຈຳນວນເປົ້າໝາຍເພີ່ມຂຶ້ນຢ່າງຄົບຖ້ວນ ແລະ ຄວາມສາມາດດຸນດ່ຽງງົບປະມານແຕ່ລະປີ ເພື່ອປະຕິບັດນະໂຍບາຍນີ້“.
