(vovworld) - ກອງປະຊຸມລັດຖະມົນຕີການຕ່າງປະເທດ “ຂະບວນການບໍ່ຮ່ວມກຸ່ມ” (ຫຼື NAM) ໄດ້ສິ້ນສຸດລົງເມື່ອວັນທີ 10/5 ຢູ່ນະຄອນ Sharm el Sheikh ປະເທດ ອີຢິບ ແລະ ຮັບຮອງເອົາ “ເອກະສານສຸດທ້າຍ Sharm el Sheikh”. ພາຍຫຼັງດຳເນີນການປຶກສາຫາລືມາເປັນເວລາ 4 ວັນ, ກອງປະຊຸມໄດ້ເຫັນດີເປັນເອກະພາບຖືວ່າ: ນັບແຕ່ເມື່ອໄດ້ຮັບການສ້າງຕັ້ງຂຶ້ນໃນປີ 1961 ມາຮອດປະຈຸບັນ “ຂະບວນການບໍ່ຮ່ວມກຸ່ມ” ຍາມໃດກໍມານະພະຍາຍາມປົກປັກຮັກສາເອກະລາດ ແລະ ການພັດທະນາຂອງບັນດາປະເທດສະມາຊິກ, ນັບມື້ນັບນັບສົ່ງຜົນສະທ້ອນອັນໃຫຍ່ຫຼວງໃນບັນດາເວທີປາໄສສາກົນ. ກອງປະຊຸມໄດ້ຮຽກຮ້ອງບັນດາຝ່າຍທີ່ກ່ຽວຂ້ອງເຖິງບັນຫາ ປາແລດຕີນ ແລະ ຊີຣີ ເພີ່ມທະວີການໂອ້ລົມສົນທະນາ, ແກ້ໄຂການພິພາດກັນໂດຍສັນຕິ. ກອງປະຊຸມລັດຖະມົນຕີການຕ່າງປະເທດ “ຂະບວນການບໍ່ຮ່ວມກຸ່ມ” ຄັ້ງນີ້ດ້ວຍການເຂົ້າຮ່ວມຂອງຜູ້ຕາງໜ້າ 100 ປະເທດສະມາຊິກ ແມ່ນເພື່ອແນໃສ່ກະກຽມໃຫ້ກອງປະຊຸມຂັ້ນສູງເຊິ່ງຈະດຳເນີນຢູ່ອີຣານໃນເດືອນ 8 ຈະມາເຖິງ. ມາຮອດປະຈຸບັນ, “ຂະບວນການບໍ່ຮ່ວມກຸ່ມ” ໄດ້ມີ 120 ປະເທດສະມາຊິກ, ເປັນຕົ້ນແມ່ນບັນດາປະເທດພວມພັດທະນາຢູ່ ອາຊີ, ອາບຟຣີກາ ແລະ ອາເມລິກາລາຕີນ.
