ໃນຊຸມວັນຕົ້ນລະດູບານໃໝ່, ໃນຍາມມີເວລາຫວ່າງບໍ່ຂ້ອງຄາກັບວຽກໄຮ່ການນາ, ປ້າ H’Lep Nie ຢູ່ບ້ານ Buor, ຕາແສງ ຮວ່າຊວັນ, ນະຄອນ ບວນມາທວດ ພັດນັ່ງມົວເມົາໃນກີ່ຕ່ຳຫູກ. ປ້າພວມຕ່ຳລວດລາຍທີ່ແປກໃໝ່ໃສ່ຜ້າຫົ່ມ. ປ້າແບ່ງປັນວ່າ:
“ຊາວ ເອເດ ມີຫຼາຍລວດລາຍທີ່ແຕກຕ່າງກັນ ແຕ່ດຽວນີ້ ຂ້າພະເຈົ້າພວມຊອກຮຽນຮູ້ບັນດາລວດລາຍໃໝ່ຕື່ມອີກ, ເຖິງວ່າ ເຮົາມີອາຍຸສູງແລ້ວ ແຕ່ກໍຍັງຢາກຮູ້ຕື່ມໃຫ້ຫຼາຍກວ່າອີກ, ສະນັ້ນ ຂ້າພະເຈົ້າຍັງຄົງຈົດທະບຽນເຂົ້າຮ່ວມຊຸດຮຽນຕ່ຳຫູກ”.
 ປ້າ H Bion Buon Krong ແນະນຳການຕ່ຳແຜ່ນແພພື້ນເມືອງ (ພາບ: H’Xíu/VOV) |
ປ້າ H’Lep Niê ແມ່ນໜຶ່ງໃນບັນດາສະມາຊິກຂອງຫ້ອງຮຽນຕ່ຳຫູກ ໂດຍປ້າ H Bion Buon Krong ຢູ່ບ້ານ CưDlue, ຕາແສງ ຮວ່າຊວັນ ເປັນຜູ້ແນະນຳ. ເຖິງວ່າອາຍຸ 60 ປີປາຍແລ້ວກໍຕາມ, ແຕ່ປ້າ H’Bion ໄດ້ຜູກພັນກັບອາຊີບຕ່ຳແຜ່ນແພເກືອບ 50 ປີແລ້ວ ແລະ ຍາມໃດກໍປາດຖະໜາຢາກຖ່າຍທອດປະສົບການຂອງຕົນໃຫ້ແກ່ເອື້ອຍນ້ອງແມ່ຍິງ ເພື່ອພ້ອມກັນອະນຸລັກຮັກສາ ແລະ ເສີມຂະຫຍາຍອາຊີບທີ່ເປັນມູນເຊື້ອນີ້.
“ຂ້າພະເຈົ້າຫວັງວ່າ ຍາມໃດກໍຈະມີສຸຂະພາບເຂັ້ມແຂງ ເພື່ອຖ່າຍທອດໃຫ້ບັນດາເອື້ອຍນ້ອງແມ່ຍິງ, ລູກຫຼານກ່ຽວກັບວິທີຕ່ຳຫູກ, ວີທີຈັດເສັ້ນໄໝ, ວິທີຕັດຫຍິບ, ວິທີຕ່ຳລວດລາຍ, ບໍ່ວ່າຈະເປັນລວດລາຍທີ່ລຽບງ່າຍ ຕະຫຼອດຮອດລວດລາຍສັບສົນ. ຂ້າພະເຈົ້າກໍມີຄວາມປາດຖະໜາວ່າ ເຮັດແນວໃດໃຫ້ລູກຫຼານມີຄວາມຫ້າວຫັນ ແລະ ມີຄວາມປາດຖະໜາຢາກຮຽນຕ່ຳຫູກເພື່ອອະນຸລັກຮັກສາ”.
ຊຸດຮຽນວິຊາຊີບ ແມ່ນໜຶ່ງໃນບັນດາການເຄື່ອນໄຫວຂອງສະໂມສອນຕ່ຳຫູກແຜ່ນແພພື້ນເມືອງຂອງຊາວເຜົ່າ ເອເດ ບ້ານ Drai Hling, ຕາແສງ ຮວ່າຊວັນ. ໂດຍໄດ້ຮັບການສ້າງຕັ້ງຂຶ້ນແຕ່ເດືອນກັນຍາ 2023, ສະໂມສອນໄດ້ເຕົ້າໂຮມເອື້ອຍນ້ອງແມ່ຍິງເກືອບ 30 ຄົນທີ່ມີຄວາມຮັກມັກ, ຢາກຮຽນ ແລະ ເສີມຂະຫຍາຍອາຊີບຕ່ຳແຜ່ນແພພື້ນເມືອງ. ເອື້ອຍ H Nga Bya, ປະທານສະໂມສອນ ໃຫ້ຮູ້ວ່າ:
ພວກຂ້າພະເຈົ້າຂົນຂວາຍເອື້ອຍນ້ອງແມ່ຍິງເຕົ້າໂຮມກັນພ້ອມກັນຜະລິດບັນດາຜະລິດຕະພັນແຜ່ນແພພື້ນເມືອງຄື ກະໂປ່ງ, ກະເປົາຫີ້ວ, ຜ້າກະຕ່ຽວ, ຜ້າຫົ່ມ ຕາມມູນເຊື້ອ ເພື່ອບໍ່ໃຫ້ລືມ, ບໍ່ປະໃຫ້ອາຊີບທີ່ເປັນມູນເຊື້ອຂອງລຸ້ນພໍ່ລຸ້ນອ້າຍຖືກສູນຫາຍໄປ”.
 ແມ່ຍິງໃນບ້ານຫ້າວຫັນເຂົ້າຮ່ວມສະໂມສອນຕ່ຳແຜ່ນແພພື້ນເມືອງ (ພາບ: H’Xíu/VOV) |
ນັບແຕ່ເມື່ອສະໂມສອນໄດ້ຮັບການສ້າງຕັ້ງຂຶ້ນ, ສີສັນແຜ່ນແພພື້ນເມືອງ ແລະ ສຽງຈາກກີ່ຕ່ຳຫູກກໍໄດ້ປະກົດຂຶ້ນຢູ່ເຮືອນຍາວຫຼັງຕ່າງໆຢູ່ໃນທ່ົວໝູ່ບ້ານພໍ່ແມ່ຊາວເຜົ່າ ເອເດ ຢູ່ບວນມາທວດ. ສະໂມສອນດັ່ງກ່າວ ໄດ້ສ້າງກຳລັງໜູນເພື່ອໃຫ້ແມ່ຍິງຊາວເຜົ່າ ເອເດ ມີຄວາມຮັກມັກອາຊີບຕ່ຳແຜ່ນແພ ແລະ ເຫັນແຈ້ງຄວາມຮັບຜິດຊອບຂອງຕົນໃນການອະນຸລັກຮັກສາ ແລະ ເສີມຂະຫຍາຍອາຊີບພື້ນເມືອງຂອງລຸ້ນພໍ່ລຸ້ນອ້າຍ.
ຕາມທ່ານຕື່ວັນເຫີ້ຍ, ປະທານຄະນະກຳມະການປະຊາຊົນ ຕາແສງ ຮວ່າຊວັນ, ນະຄອນ ບວນມາທວດແລ້ວ, ສະໂມສອນຕ່ຳແຜ່ນແພພື້ນເມືອງ ປະຕິບັດຕາມແຜນການຂອງພະແນກວັດທະນະທຳ, ກິລາ ແລະ ທ່ອງທ່ຽວດັກລັກ ກ່ຽວກັບໂຄງການ “ອະນຸລັກຮັກສາ, ເສີມຂະຫຍາຍຄຸນຄ່າວັດທະນະທຳທີ່ເປັນມູນເຊື້ອອັນດີງາມຂອງບັນດາຊາວເຜົ່າສ່ວນໜ້ອຍ ຕິດພັນກັບການພັດທະນາການທ່ອງທ່ຽວ”, ຂຶ້ນກັບໂຄງການເປົ້າໝາຍແຫ່ງຊາດກ່ຽວກັບການພັດທະນາເສດຖະກິດສັງຄົມເຂດປະຊາຊົນບັນດາເຜົ່າສ່ວນໜ້ອຍ ແລະ ເຂດພູດອຍ, ໄລຍະ 2021 – 2030. ການກຳນົດທິດພັດທະນາຂອງທ້ອງຖິ່ນໃນໄລຍະຈະມາເຖິງແມ່ນຕິດພັນກັບວັດທະນະທຳບັນດາເຜົ່າ, ໃນນັ້ນ ມີອາຊີບຕ່ຳແຜ່ນແພພື້ນເມືອງຂອງຊາວເຜົ່າ ເອເດ ກັບການທ່ອງທ່ຽວຊຸມຊົນ.
“ການສ້າງສະໂມສອນຕ່ຳແຜ່ນແພພື້ນເມືອງເພື່ອເສີມຂະຫຍາຍຄຸນຄ່າອັນເປັນມູນເຊື້ອ ແລະ ມຸ່ງວິໄສທັດໄປເຖິງເປົ້າໝາຍໄລຍະຍາວ ແມ່ນຈະພ້ອມກັບການທ່ອງທ່ຽວຊຸມຊົນເພື່ອໂຄສະນາບັນດາຜະລິດຕະພັນ, ບັນດາຈຸດຄວາມງາມທີ່ເປັນມູນເຊື້ອຂອງວັດທະນະທຳເຜົ່າ ເອເດ ຢູ່ຕາແສງຮວ່າຊວັນ, ປະກອບສ່ວນພ້ອມກັບພໍ່ແມ່ພີນ້ອງບັນດາເຜົ່າສ່ວນໜ້ອຍໃນບໍລິເວນແຂວງ, ນະຄອນ ໂຄສະນາຈຸດຄວາມງາມທາງດ້ານວັດທະນະທຳຂອງຊາວເຜົ່າຕົນອະນຸລັກຮັກສາ, ຖ່າຍທອດໃຫ້ຄົນລຸ້ນຫຼັງ”.
ໃນບັນຍາກາດອັນເບີກບານມ່ວນຊື່ນຂອງລະດູບານໃໝ່, ສຽງກີ່ຕ່ຳຫູກທີ່ດັງຂຶ້ນເປັນຈັງຫວະ, ບັນດາສີມືອັນຄ່ອງແຄ້ວ ພວມສ້າງສີສັນແຫ່ງຄວາມຫວັງຂອງລະດູບານໃໝ່ໃສ່ໃນແຜ່ນແພພື້ນເມືອງຂອງຊາວເຜົ່າ ເອເດ./.
