ສະພາຄວາມໝັ້ນຄົງ ສປຊ ຮຽກຮ້ອງ ອຳນາດການປົກຄອງຊີຣີ ຖອນທະຫານກ່ອນກຳນົດເວລາ
(vovworld) – ວັນທີ 5/4, ສະພາຄວາມໝັ້ນຄົງສະຫະປະຊາຊາດ ໄດ້ຮັບຮອງເອົາຖະແຫຼງ ການສະບັບໜຶ່ງ, ຮຽກຮ້ອງໃຫ້ອຳນາດການປົກຄອງ ຊີຣີ ມີການກະທຳຢ່າງຮີບດ່ວນ ເພື່ອຖອນທະຫານ ແລະ ອາວຸດອອກຈາກບັນດານະຄອນທີ່ເປັນຈຸດຮ້ອນເຮັ່ງຢູ່ປະເທດນີ້ຄືດັ່ງທີ່ໄດ້ຕົກລົງນຳກັນ ໂດຍຈຸດເວລາສຸດທ້າຍແມ່ນວັນທີ 10/4. ຖະແຫຼງການໂດຍອາເມລິກາ ສົມທົບກັນຮຽບຮຽງພ້ອມກັບ ອັງກິດ, ຟຣັ່ງ ແລະ ເຢຍລະມັນ, ຮຽກຮ້ອງໃຫ້ຝ່າຍຕ່າງໆ ຢູ່ຊີຣີ ເລີ່ມຕົ້ນປະຕິບັດການຢຸດຍິງ ວັນລະ 2 ຊົ່ວໂມງ ເພື່ອອະນຸຍາດໃຫ້ສຳພັດກັບບັນດາການເຄື່ອນໄຫວຊ່ວຍເຫຼືອມະນຸດສະທຳ. ໃນຖະແຫຼງການນີ້, ອີກເທື່ອໜຶ່ງ ສະພາຄວາມໝັ້ນຄົງ ສະຫະປະຊາຊາດໄດ້ ສະໜັບສະໜູນແຜນການສັນຕິພາບຂອງທ່ານ Kofi Annan ຢູ່ ຊີຣີ, ພ້ອມທັງຮຽກຮ້ອງທ່ານ Annan ສືບຕໍ່ລາຍງານກັບສະພາຄວາມໝັ້ນຄົງ ສະຫະປະຊາຊາດ ກ່ຽວກັບການປະຕິບັດຂອງ ຊີຣີ ກໍຄືຄວາມຄືບໜ້າໃນການປະຕິບັດແຜນການສັນຕິພາບ 6 ຂໍ້ເຊິ່ງທ່ານ Annan ຍົກອອກມາ. ສະພາຄວາມໝັ້ນຄົງ ສະຫະປະຊາຊາດ ໃຫ້ຮູ້ວ່າ: ຈະອີງໃສ່ບົດລາຍງານຂອງທ່ານ Annan ເພື່ອພິຈາລະນາບັນດາບາດກ້າວຕໍ່ໄປໃຫ້ເໝາະສົມ.
ແລະກໍໃນວັນດຽວກັນ, ຈີນໄດ້ຮຽກຮ້ອງທຸກຝ່າຍທີ່ກ່ຽວຂ້ອງຮ່ວມມືຢ່າງຕັ້ງໜ້າດ້ວຍບັນດາຄວາມມານະພະຍາຍາມໃນການໄກ່ເກ່ຍວິກິດການຢູ່ ຊີຣີ.
ຢູ່ມົດສະກູ, ລັດຖະມົນຕີການຕ່າງປະເທດລັດເຊຍ Sergei Lavrov ໄດ້ສະເໜີໃຫ້ທ່ານ Annan ຄວນກໍກຳລັງດັນຕໍ່ກຳລັງຝ່າຍຄ້ານຢູ່ຊີຣີ ພາຍຫຼັງທີ່ສະພາຄວາມໝັ້ນຄົງ ສະຫະປະຊາຊາດ ອອກຖະແຫຼງການຮຽກຮ້ອງໃຫ້ອຳນາດການປົກຄອງ ຊີຣີ ປະຕິບັດການຖອນທະຫານຕາມຈຸດເວລາສຸດທ້າຍທີ່ໄດ້ກຳນົດ.
