(vovworld) - ວັນທີ 26/11, ກອງປະຊຸມສຳມະນາສາກົນ ຫວຽດນາມວິທະຍາຄັ້ງທີ 4 ພາຍໃຕ້ຫົວຂໍ້ວ່າ“ ຫວຽດນາມ ບົນເສັ້ນທາງເຊື່ອມໂຍງ ແລະ ພັດທະນາແບບຍືນຍົງ” ຖືກໄຂຂຶ້ນຢູ່ ຮ່າໂນ້ຍ, ໂດຍມີການເຂົ້າຮ່ວມຂອງນັກຄົ້ນຄ້ວາກ່ຽວກັບ ຫວຽດນາມ ປະມານ 1.000 ທ່ານ. ນີ້ແມ່ນກອງປະຊຸມສຳມະນາມີຂອບຂະຫນາດໃຫຍ່ສຸດນັບແຕ່ກ່ອນມາຮອດປະຈຸບັນ. ສິ່ງດັ່ງກ່າວສະແດງໃຫ້ເຫັນວ່າ ວິຊາຫວຽດນາມວິທະຍາຢູ່ ໃນໂລກ ພວມພັດທະນາຢ່າງແຂງແຮງ ໝາຍຄວາມວ່າ ຫວຽດນາມ ນັບມື້ນັບດຶງດູດຄວາມສົນໃຈຈາກໂລກ.
 ຜູ້ແທນເຂົ້າຮ່ວມກອງປະຊຸມສຳມະນາສາກົນ ຫວຽດນາມ ວິທະຍາຄັ້ງທີ 4 ພາບ:TTXVN |
ຫວຽດນາມ ແມ່ນປະເທດຕັ້ງຢູ່ໃຈກາງພາກພື້ນ ອາຊີຕາເວັນອອກສຽງໃຕ້ ດ້ວຍໄຫລ່ທະວີບທີ່ກ້ວາງໃຫຍ່ ແລະ ເຂດເສດຖະກິດພິເສດຢູ່ທະເລ ມີໝູ່ເກາະໃຫຍ່ນ້ອຍຫລາຍແຫ່ງ. ແຕ່ດົນນານມາແລ້ວ, ຫວຽດນາມ ມີການພົວພັນແລກປຽນກັບບັນດາພື້ນຖານວັດທະນະທຳ, ອະລິຍະທຳຂອງພາກພື້ນອາຊີຕາເວັນອອກສຽງໃຕ້, ອິນເດຍ ແລະ ຝ່າຍຕາເວັນຕົກ… ເພາະສະນັ້ນ, ເລື່ອງຄົ້ນຄ້ວາກ່ຽວກັບປະເທດຊາດ, ປະຊາຊົນ, ວັດທະນະທຳ ແລະ ປະຫວັດສາດ ຫວຽດນາມ ບໍ່ພຽງແຕ່ແມ່ນວຽກງານຂອງຊາວ ຫວຽດນາມ ເທົ່ານັ້ນ ຫາກຍັງດຶງດູດຄວາມສົນໃຈຂອງນັກຮຽນຮູ້, ປັນຍາຊົນຕ່າງປະເທດຫລາຍທ່ານອີກດ້ວຍ. ຖ້າຫາກໃນໄລຍະຕໍ່ຕ້ານຍາດເອົາເອກະລາດ, ຫວຽດນາມ ວິທະຍາ ພຽງແຕ່ພັດທະນາຢູ່ບາງປະເທດຄື: ຈີນ, ລັດເຊຍ, ຝລ່ັງ ແລະ ເອີລົບຕາເວັນອອກ, ປະຈຸບັນ ຂະບວນການຄົ້ນຄ້ວາກ່ຽວກັບ ຫວຽດນາມ ໄດ້ດຶງດູດຄວາມສົນໃຈຈາກບັນດານັກຮຽນຮູ້ຍີ່ປຸ່ນ, ສເກົາຫລີ, ອາເມລິກາ, ອົດສະຕາລີ… ຕາມສາສະດາຈານປະຫວັດສາດ ຟານຮູຍເລ, ວິຊາ ຫວຽດນາມ ວິທະຍາທັນສະໄຫມພວມແຜ່ລາມອອກສູ່ວົງກວ້າງ. ອົງການຄົ້ນຄ້ວາ ແລະ ບຳລຸງສ້າງກ່ຽວກັບ ຫວຽດນາມ ວິທະຍາ ໄດ້ຮັບການສ້າງຕັ້ງຂຶ້ນຫລືປະກົດອອກຢູ່ມະຫາວິທະຍາໄລຈຳນວນຫນຶ່ງຢູ່ ຫລາຍປະເທດ. ສະມາຄົມຍີ່ປຸ່ນຄົ້ນຄ້ວາກ່ຽວກັບ ຫວຽດນາມ ໄດ້ເຕົ້າໂຮມນັກຮຽນຮູ້ນັບຮ້ອຍທ່ານ, ແຕ່ລະປີຈັດຕັ້ງກອງປະຊຸມສຳມະນາກ່ຽວກັບ ຫວຽດນາມ. ສະມາຄົມຄົ້ນຄ້ວາກ່ຽວກັບ ຫວຽດນາມ ຈຳນວນຫນຶ່ງກໍໄດ້ຮັບການສ້າງຕັ້ງຂຶ້ນຢູ່ ສເກົາຫລີ, ອາເມລິກາ. ຢູ່ ເອີລົບ, ມີເຄືອຂ່າຍຫນຶ່ງຄົ້ນຄ້ວາກ່ຽວກັບ ຫວຽດນາມ ມີຊື່ວ່າ: Euro - ຫວຽດນາມ ໄດ້ຮັບການສ້າງຕັ້ງຂຶ້ນ ແລະ ສອງປີເທື່ອຫນຶ່ງຈັດຕັ້ງກອງປະຊຸມສຳມະນາສາກົນກ່ຽວກັບ ຫວຽດນາມວິທະຍາ. ສາສະດາຈານ, ດຣ ຫງວຽນຊວນທັງ, ປະທານສະຖາບັນວິທະຍາສາດສັງຄົມ ຫວຽດນາມ ໃຫ້ຮູ້ວ່າ:
“ເມື່ອມີຜົນສະທ້ອນ ແລະ ບົດບາດຂອງ ຫວຽດນາມ ນັບມື້ນັບເປີດກ້ວາງ,ເຊື່ອມໂຍງຢ່າງເລິກເຊິ່ງ ແລະ ກວ້າງຂວາງ ຢູ່ໃນລະດັບທີ່ແຕກຕ່າງກັນ, ຢູ່ ພາກພື້ນ ແລະ ໃນໂລກ, ຊາວໂລກຈະຮູ້ຈັກເຖິງພວກເຮົາ, ທັງຊອກຮູ້, ທັງແບ່ງປັນ, ທັງປະກອບສ່ວນ. ເຂົາເຈົ້າຈະມາຢ້ຽມຢາມຫວຽດນາມ ຫລາຍກວ່າ, ຜົນສະທ້ອນຂອງຫວຽດນາມວິທະຍາຈະໄດ້ຮັບການເປີດກວ້າງກວ່າ. ເຂົາເຈົ້າພວມມຸ່ງຫວັງຕໍ່ບົດບາດຂອງ ຫວຽດນາມ ນັບມື້ນັບສຳຄັນໃນພາກພື້ນກໍຄືໃນໂລກ. ສະນັ້ນ ຂ້າພະເຈົ້າຖືວ່າ ຫວຽດນາມ ວິທະຍາຈະສືບຕໍ່ແນະນຳພາບພົດຂອງ ຫວຽດນາມ ອອກສູ່ໂລກ.”
 ທ່ານນາຍົກລັດຖະມົນຕີ ຫງວຽນເຕີ້ນຢູ໋ງ ກ່າວຄຳປາໄສໄຂກອງປະຊຸມ ພາບ:TTXVN |
14 ປີຜ່ານມາ, ນັບແຕ່ເມື່ອກອງປະຊຸມສຳມະນາສາກົນກ່ຽວກັບຫວຽດນາມວິທະຍາດໄດ້ຮັບການຈັດຕັ້ງຂຶ້ນເປັນຄັ້ງທຳອິດ (1998), ຍາມໃດຫົວຂໍ້ຂອງກອງປະຊຸມສຳມະນາກໍຕິດແທດກັບພຶດຕິກຳແຫ່ງການພັດທະນາຢູ່ ຫວຽດນາມ. ກອງປະຊຸມສຳມະນາຄັ້ງທຳອິດ ມີຫົວຂໍ້ວ່າ: ຄົ້ນຄ້ວາ ຫວຽດນາມ ແລະ ເພີ່ມທະວີການຮ່ວມມືສາກົນ; ຫົວຂໍ້ກອງປະຊຸມຄັ້ງທີ 2 ແມ່ນຫວຽດນາມບົນເສັ້ນທາງພັດທະນາ ແລະ ເຊື່ອມໂຍງ - ມູນເຊື້ອ ແລະ ທັນສະໄຫມ; ຫົວຂໍ້ຂອງກອງປະຊຸມສຳມະນາຄັ້ງທີ 3 ແມ່ນ ຫວຽດນາມ ເຊື່ອມໂຍງ ແລະ ພັດທະນາ. ກອງປະຊຸມສຳມະນາຄັ້ງທີ 4 ດຳເນີນໄປແຕ່ວັນທີ 26 - 28/11/2012 ພາຍໃຕ້ຫົວຂໍ້ວ່າ: ຫວຽດນາມ ບົນເສັ້ນທາງເຊ່ືອມໂຍງ ແລະ ພັດທະນາແບບຍືນຍົງ” ແມ່ນການສືບທອດກອງປະຊຸມສຳມະນາ 3 ຄັ້ງກ່ອນນີ້ ເພື່ອປຶກສາຫາລືກ່ຽວກັບບັນດາບັນຫາພວມວາງອອກໃຫ້ແກ່ຫວຽດນາມ ໃນທ່າອ່ຽງຂອງຍຸກໂລກາພິບັດ. ນີ້ແມ່ນໂອກາດເພື່ອໃຫ້ຫວຽດນາມ ສຳພັດຫລາຍກວ່າກັບບັນດາກິດຈະກຳຄົ້ນຄ້ວາຫລາຍຝ່າຍກ່ຽວກັບ ຫວຽດນາມ ຂອງວົງການນັກຮຽນຮູ້ສາກົນ. ສາສະດາຈານ, ດຣ ມາຍຈ້ອງຍ້ວນ, ຜູ້ອຳນວຍການມະຫາວິທະຍາໄລແຫ່ງຊາດ ຮ່າໂນ້ຍ, ທັງເປັນຫົວຫນ້າຄະນະຊີ້ນຳກອງປະຊຸມສຳມະນາໃຫ້ຮູ້ວ່າ:
“ຂ້າພະເຈົ້າຖືວ່າ ມີ 3 ຜະລິດຕະພັນສຳຄັນພິເສດ ຊຶ່ງພວກເຮົາຕ້ອງປະຕິບັດໃຫ້ໄດ້ໃນກອງປະຊຸມສຳມະນາຄັ້ງນີ້. ທີຫນຶ່ງ ແມ່ນລະບົບບັນດາບົດລາຍງານວິທະຍາສາດ, ການປຶກສາຫາລືບັນດາຂໍ້ສະເຫນີເພື່ອໃຫ້ຫວຽດນາມ ເຊື່ອມໂຍງຢ່າງເລິກເຊິ່ງ ແລະ ພັດທະນາແບບຍືນຍົງ. ທີສອງ ບັນດາຂໍ້ສະເຫນີຈາກກອງປະຊຸມສຳມະນາໃຫ້ແກ່ພັກ, ລັດ. ທີສາມ ແມ່ນເຄືອຂ່າຍບັນດານັກວິທະຍາສາດໃນໂລກໄດ້ຮັບການປັບປຸງ, ພັດທະນາ ເພື່ອໃຫ້ ຫວຽດນາມ ເຂົ້າໃຈຢ່າງຄົບຖ້ວນກວ່າ, ຫລາຍກວ່າ ແລະ ເລິກເຊິ່ງກວ່າ, ປະກອບສ່ວນໃຫ້ແກ່ການພັດທະນາແບບຍືນຍົງ ບໍ່ພຽງແຕ່ ຢູ່ຫວຽດນາມ ເທົ່ານັ້ນຫາກນັບທັງທົ່ວໂລກອີກດ້ວຍ. ສະນັ້ນຜະລິດຕະພັນທີ 3 ໄດ້ຮັບການຕີລາຄາດ້ວຍຈຳນວນນັກຮຽນຮູ້ຕ່າງປະເທດໃນທົ່ວໂລກເຂົ້າຮ່ວມ, ພິເສດແມ່ນ ເຂົາເຈົ້າເຂົ້າຮ່ວມການປຶກສາຫາລື, ປະກອບຄຳຄິດຄຳເຫັນ.”
ອາດຈະເວົ້າໄດ້ວ່າ, ນັບແຕ່ເມື່ອໄດ້ຮັບການສ້າງຕັ້ງຂຶ້ນມາຮອດປະຈຸບັນ, ວິຊາ ຫວຽດນາມ ວິທະຍາ ພວມພັດທະນາຢ່າງແຂງແຮງເທື່ອລະກ້າວ. ສິ່ງດັ່ງກ່າວໝາຍຄວາມວ່າ ຫວຽດນາມ ສືບຕໍ່ໄດ້ຮັບຄວາມສົນໃຈຈາກນັກຮຽນຮູ້ສາກົນຫລາຍທ່ານ ແລະ ເລື່ອງພິຈາລະຈາບັນດາກິດຈະກຳຄົ້ນຄ້ວາຂອງເຂົາເຈົ້າຈະປະກອບສ່ວນຢ່າງຕັ້ງຫນ້າເຂົ້າໃນການພັດທະນາຂອງ ຫວຽດນາມ. /.
