(VOVWORLD) - ຕອນບ່າຍວັນທີ 18 ກັນຍາ, ຢູ່ຮ່າໂນ້ຍ, ກົມສົ່ງເສີມການຄ້າ (ກະຊວງອຸດສາຫະກຳ ແລະ ການຄ້າ ຫວຽດນາມ) ໄດ້ຈັດກອງປະຊຸມສຳມະນາ “ຊຸກຍູ້ການຮ່ວມມືດ້ານການຄ້າ ແລະ ການລົງທຶນຢູ່ຕະຫຼາດ UAE - ຕາເວັນອອກກາງ”.
 ກອງປະຊຸມສຳມະນາ “ຊຸກຍູ້ການຮ່ວມມືທາງການຄ້າ ແລະ ການລົງທຶນຢູ່ຕະຫຼາດ UAE - ພາກຕາເວັນອອກກາງ” (ພາບ: VOV)
|
ຕະຫຼາດ ສະຫະລັດ ອາຣັບ ເອມີເລດ (UAE) ແລະ ພາກພື້ນຕາເວັນອອກກາງ ແມ່ນໜຶ່ງໃນບັນດາຄູ່ຮ່ວມມືຍຸດທະສາດຂອງ ຫວຽດນາມ ຢູ່ພາກພື້ນ ອາຊີຕາເວັນຕົກ. ປັດຈຸບັນ, UAE ແມ່ນຄູ່ຮ່ວມມືທາງການຄ້າໃຫຍ່ທີ່ສຸດຂອງ ຫວຽດນາມ ຢູ່ຕາເວັນອອກກາງ, ພ້ອມນັ້ນກໍ່ແມ່ນປະຕູເຂົ້າອອກສຳຄັນເພື່ອໃຫ້ສິນຄ້າ ຫວຽດນາມ ເຂົ້າເຖິງບັນດາປະເທດໃນຕາເວັນອອກກາງ. ທ່ານນາງ ຫງວຽນທິທູຖຸຍ, ຮອງຫົວໜ້າສູນໜູນຊ່ວຍການສົ່ງເສີມການຄ້າ ແລະ ການລົງທຶນ, ກົມສົ່ງເສີມການຄ້າ, ກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
ດູບາຍ ແມ່ນສູນແລກປ່ຽນການຄ້າແຖວໜ້າຢູ່ຕາເວັນອອກກາງ - ບໍ່ພຽງແຕ່ແມ່ນສະຖານທີ່ບໍລິໂພກສິນຄ້າເປັນຈຳນວນຫຼາຍເທົ່ານັ້ນ ຫາກຍັງສວມບົດບາດແມ່ນຂົວເຊື່ອມຕໍ່ ຊ່ວຍວິສາຫະກິດ ຫວຽດນາມ ເປີດກວ້າງຕະຫຼາດໄປຍັງ ອາບຟຼິກກາ, ອາຊີໃຕ້ ແລະ ເອີລີບ ອີກດ້ວຍ. ເລື່ອງເພີ່ມທະວີການມີໜ້າຂອງວິສາຫະກິດ ຫວຽດນາມ ຢູ່ ດູບາຍ ຈະມີຄວາມໝາຍຍຸດທະສາດໃນການຮັກສາລະບົບສະໜອງ ແລະ ຄວາມສາມາດໃນການແກ້ງແຍ້ງທີ່ເປັນປົກກະຕິ.
ວົງເງິນການຄ້າສອງຝ່າຍລະຫວ່າງ ຫວຽດນາມ - UAE ເພີ່ມຂຶ້ນ 50% ນັບແຕ່ປີ 2023 ຫາ 2024, ບັນລຸ 12 ຕື້ USD. ຄາດວ່າ ຕົວເລກນີ້ຈະສືບຕໍ່ເພີ່ມຂຶ້ນຖ້າສັນຍາຄູ່ຮ່ວມມືເສດຖະກິດຮອບດ້ານ (CEPA) ມີຜົນສັກສິດໂດຍໄວໃນປີນີ້.
