ຕອນເຊົ້າວັນທີ 6 ທັນວາ, ນາຍົກລັດຖະມົນຕີ 2 ທ່ານ ໄດ້ເປັນປະທານຮ່ວມກອງປະຊຸມ. ເນື່ອງໃນໂອກາດນີ້, 2 ຝ່າຍໄດ້ເຊັນເອກະສານຮ່ວມມືສຳຄັນ 17 ສະບັບ
 ຫວຽດນາມ ແລະ ລາວ ເຊັນເອກະສານ 17 ສະບັບ (ພາບ: VGP) |
ທີ່ກອງປະຊຸມ, 2 ຝ່າຍໄດ້ເຫັນດີເປັນເອກະພາບຢ່າງສູງກ່ຽວກັບທິດທາງການຮ່ວມມືປີ 2021 ແລະ ໄລຍະ 5 ຫາ 10 ປີຈະມາເຖິງ; ເຫັນດີເປັນເອກະພາບສຸມໃສ່ປະຕິບັດບັນດາສັນຍາ, ຂໍ້ຕົກລົງໃຫຍ່ລະຫວ່າງ 2 ປະເທດຢ່າງມີປະສິດທິຜົນ, ລວມມີຂໍ້ຕົກລົງກ່ຽວກັບແຜນການຮ່ວມມືຫວຽດນາມ - ລາວ ປີ 2021 ແລະ ບັນດາຂໍ້ຕົກລົງຮ່ວມມືອື່ນ.
ສຳລັບການພົວພັນແບບພິເສດ, ຄວາມໄວ້ເນື້ອເຊື່ອໃຈເຊິ່ງກັນແລະກັນ, 2 ຝ່າຍສືບຕໍ່ຢັ້ງຢືນວ່າ ຈະສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນແລະກັນຢູ່ບັນດາເວທີປາໄສພາກພື້ນ ແລະ ສາກົນ, ເປັນຕົ້ນແມ່ນໃນການຮ່ວມມືອາຊຽນ. ກົນໄກຮ່ວມມືອະນຸພາກພື້ນແມ່ຂອງ ແລະ ຢູ່ສະຫະປະຊາຊາດ; ພ້ອມກັນເພີ່ມທະວີການປຶກສາຫາລື, ສະໜັບສະໜູນເຊິ່ງກັນແລະກັນ, ຍົກສູງທີ່ຕັ້ງ, ເປັນເຈົ້າຕົນເອງ, ເປັນຕົ້ນແມ່ນໃນບັນດາບັນຫາຄວາມໝັ້ນຄົງ, ຍຸດທະສາດຢູ່ພາກພື້ນ, ລວມມີ ທະເລຕາເວັນອອກ, ແມ່ຂອງ; ພ້ອມກັບບັນດາປະເທດສະມາຊິກ ອາຊຽນ ອື່ນ ເພື່ອຮັບມືກັບໂລກລະບາດໂຄວິດ-19 ຢ່າງມີປະສິດທິຜົນ, ຊຸກຍູ້ການຮັກສາຄວາມສາມັກຄີ ແລະ ບົດບາດເປັນໃຈກາງຂອງອາຊຽນ, ຍູ້ແຮງການກໍ່ສ້າງປະຊາຄົມອາຊຽນ.
ພາຍຫລັງສິ້ນສຸດກອງປະຊຸມ, ຕໍ່ໜ້າການເປັນສັກຂິພິຍານ ຂອງທ່ານນາຍົກລັດຖະມົນຕີ ຫງວຽນຊວັນຟຸກ ແລະ ທ່ານນາຍົກລັດຖະມົນຕີ ທອງລຸນ ສີສຸລິດ, ບັນດາກະຊວງຂອງ 2 ປະເທດໄດ້ເຊັນ ແລະ ມອບຂໍ້ຕົກລົງ, ສັນຍາ ແລະ ບົດບັນທຶກຊ່ວຍຈຳ 17 ສະບັບ, ໃນນັ້ນ ມີຂໍ້ຕົກລົງກ່ຽວກັບແຜນການຮ່ວມມື ຫວຽດນາມ - ລາວ ໃນປີ 2021; ຈົດໝາຍທາງການກ່ຽວກັບການປະຕິບັດສັນຍາວ່າດ້ວຍການຮ່ວມມືລົງທຶນພັດທະນາທ່າກ່ຳປັ່ນເລກທີ 1, 2, 3 ຂອງທ່າກ່ຳປັ່ນ ຫວູງອາງ; ບົດບັນທຶກຊ່ວຍຈຳການຮ່ວມມືວ່າດ້ວຍການຄົ້ນຄວ້າພັດທະນາທາງລົດໄຟລະຫວ່າງຫວຽດນາມ ແລະ ລາວ. ນອກນັ້ນ ຍັງມີບາງຂໍ້ຕົກລົງໃນຂົງເຂດການສຶກສາ, ພະລັງງານລະຫວ່າງ 2 ປະເທດອີກດ້ວຍ.
