ອີຢູ ຈັດວາງຄຳສັ່ງລົງໂທດ ບັນດາຫົວໂປກໍ່ລັດຖະປະຫານ ຢູ່ Guinea – Bissau
(vovworld) – ວັນທີ 3/5, ສະຫະພາບເອີລົບ (ຫຼື ອີຢູ) ໄດ້ຈັດວາງມາດຕະການລົງໂທດຕ່າງໆ ຕໍ່ຫົວໂປ 6 ຄົນ ໃນການກໍ່ລັດຖະປະຫານເມືອວັນທີ 12/4 ທີ່ຜ່ານມາຢູ່ Guinea – Bissau. ໃນຖະແຫຼງການອອກວັນດຽວກັນ, ອີຢູເນັ້ນໜັກວ່າ: ຍ້ອນລັກສະນະຄວາມຮ້າຍແຮງ ໃນສະພາບການມໍ່ໆມານີ້ຢູ່ Guinea – Bissau, ກຸ່ມນີ້ໄດ້ຕົກລົງຫ້າມ “6 ຄົນທີພວມນາບຂູ່ເຖິງສັນຕິພາບ, ຄວາມໝັ້ນຄົງ ແລະ ສະຖຽນລະພາບ ຂອງ Guinea – Bissau” ເຂົ້າບັນດາປະເທດ ອີຢູ ແລະ ປິດລ້ອມຊັບສິນຂອງເຂົາເຈົ້າຢູ່ບັນດາປະເທດໃນກຸ່ມນີ້. ຜູ້ຕາງໜ້າຂັ້ນສູງຮັບຜິດຊອບນະໂຍບາຍຄວາມສະຫງົບປອດໄພ ແລະ ພົວພັນຕ່າງປະເທດຂອງ ອີຢູ່ ທ່ານນາງ Catherine Ashton ຢືນຢັນຄືນໃໝ່ວ່າ: ອີຢູ ກ່າວປະນາມຢ່າງຮ້າຍແຮງຕໍ່ການກໍ່ລັດຖະປະຫານຜ່ານມາຢູ່ Guinea – Bissau, ພ້ອມທັງຮຽກຮ້ອງໃຫ້ຟື້ນຟູ “ອຳນາດການປົກຄອງຖືກຕ້ອງຕາມກົດໝາຍ ແລະ ລັດຖະທຳມະນູນ” ຢູ່ປະເທດນີ້ ໃນທັນທີ. ກ່ອນໜ້ານັ້ນ, ປະຊາຄົມເສດຖະກິດບັນດາປະເທດ ອາບຟຣີກາຕາເວັນຕົກ (ຫຼື ECOWAS) ໄດ້ຈັດວາງຄຳສັ່ງລົງໂທດ ເພື່ອເລັ່ງໃສ່ວົງການການນຳຝ່າຍທະຫານ Guinea – Bissau, ພ້ອມກັບບັນດາມາດຕະການລົງໂທດດ້ານການພົວພັນຕ່າງປະເທດ, ເສດຖະກິດ ແລະ ການເງິນ ອື່ນໆ ຕໍ່ປະເທດນີ້. ສະຫະພາບ ອາບຟຣີກາ (ຫຼື AU) ກໍໄດ້ຕົກລົງປົດ ຖານະເປັນສະມາຊິກຂອງ Guinea – Bissau ຈົນກ່ວາວ່າເວລາໃດທີ່ປະເທດນີ້ສ້າງລັດຖະທຳມະນູນຄືນໃໝ່.
