ອາເມລິກາ, ລັດເຊຍ ເຈລະຈາກ່ຽວກັບສະພາບການຢູ່ຊີຣີ
ສະພາບການຢູ່ຊີຣີ ພວມສັບສົນ
(ພາບ:dantri.com.vn)
( vovworld ) – ວັນທີ 14/6, ທ່ານນາງ Hillary Clinton ລັດຖະມົນຕີການຕ່າງປະເທດອາເມລິກາ ໃຫ້ຮູ້ວ່າ: ອາເມລິກາ ໄດ້ດຳເນີນການເຈລະຈາຄັ້ງຕ່າງໆກັບລັດເຊຍ ກ່ຽວກັບສະພາບການຢູ່ຊີຣີ ພ້ອມທັງຊຸກຍູ້ການກະທຳທີ່ຕັ້ງໜ້າກ່ວາ ເພື່ອຢຸດຕິວິກິດການຢູ່ປະເທດຕາເວັນອອກກາງນີ້. ທ່ານນາງ Hillary Clinton ຢືນຢັນວ່າ, ອາເມລິກາ ຢາກໃຫ້ແຜນການສັນຕິພາບຂອງທູດພິເສດສາກົນ Kofi Annan ໄດ້ຮັບການປະຕິບັດຢ່າງຄົບຖ້ວນ, ໃນນັ້ນລວມທັງວິວັດການມອບໂອນສິດອຳນາດທາງການເມືອງ ເພື່ອແນໃສ່ຢຸດຕິການໃຊ້ຄວາມຮຸງແຮງຢູ່ຊີຣີ. ວໍຊິງຕັນ ພວມດຳເນີນຫຼາຍມາດຕະການ ລວມມີທັງການທາບທາມຄຳເຫັນກັບສະຫະປະຊາຊາດ, ບັນດາພັນທະມິດ, ຄຸ່ຮ່ວມມື ແລະ ຝ່າຍຄ້ານຊີຣີ ເພື່ອບັນລຸໄດ້ໝາກຜົນດັ່ງກ່າວ. ກ່ອນໜ້ານັ້ນ, ທູດພິເສດລວມຂອງສະຫະປະຊາຊາດ ແລະ ສະຫະພັນອາຣັບ, ທ່ານ Kofi Annan ໄດ້ສະເໜີສ້າງຕັ້ງກຸ່ມພົບປະສາກົນກຸ່ມ 1 ເພື່ອເຊື່ອມຕໍ່ປະເທດຕ່າງໆທີ່ມີບົດບາດໃຫ່ຍຫຼວງ ແນໃສ່ຊອກຫາມາດຕະການຢຸດຕິວິກິດການຢູ່ຊີຣີ ໂດຍໄວ, ໃນຂະນະທີ່ລັດເຊຍ ໄດ້ຍົກອອກແນວຄວາມຄິດຈັດກອງປະຊຸມສາກົນກ່ຽວກັບຊີຣີ.
