( vovworld ) – ວັນທີ 10/5, ຢູ່ນະຄອນຫຼວງວໍຊິງຕັນ, ສະຖານທູດ ຫວຽດນາມ ປະຈຳ ອາເມລິກາ ສົມທົບກັບເວທີປາໄສໂຕະມົນອາຊີຕາເວັນອອກສຽງໃຕ້ (ໂດຍກອງທຶນອາຊີອາລັກຂາ) ໄດ້ຈັດເວທີປາໄສ ຫວຽດນາມ ຄັ້ງທີ 2 ດ້ວຍຫົວຂໍ້ “ສາຍພົວພັນອາເມລິກາ-ອາຊຽນ-ບັນດາບາດກ້າວຕໍ່ໄປ“. ທ່ານ Nirav Patel ຮອງຜູ້ຊ່ວຍວຽກລັດຖະມົນຕີການຕ່າງປະເທດ ອາເມລິກາ ຮັບຜິດຊອບກ່ຽວກັບຍຸດທະສາດ ແລະ ບັນດາບັນຫາຫຼາຍຝ່າຍ, ນັກປະຖະກະຖາຂອງການໂອ້ລົມສົນທະນາ ໄດ້ບັນລະຍາຍກ່ຽວກັບນະໂຍບາຍການຕ່າງປະເທດຂອງອຳນາດການປົກຄອງປະທານາທິບໍດີ Obama ທີ່ມີຕໍ່ພາກພື້ນອາຊີ-ປາຊີຟິກ ເວົ້າລວມ ແລະ ອາຊຽນ ເວົ້າສະເພາະ. ທ່ານ Nirav Patel ຢືນຢັນວ່າ ອາເມລິກາ ໄດ້ ແລະ ພວມມານະພະຍາຍມຊຸກຍູ້ການຮ່ວມມືຮອບດ້ານກັບບັນດາປະເທດໃນພາກພື້ນອາຊີ-ປາຊີຟິກ , ບໍ່ພຽງແຕ່ໃນດ້ານການເມືອງ, ການປ້ອງກັນຄວາມສະຫງົບເທົ່ານັ້ນ, ຫາກຍັງໃນດ້ານເສດຖະກິດ, ການຄ້າ ແລະ ການລົງທຶນອີກດ້ວຍ. ໃນຍຸດທະສາດນີ້, ການຮ່ວມມືກັບອາຊຽນ ໄດ້ຮັບຖືກເປັນສຳຄັນພິເສດ ຍ້ອນບົດບາດ, ທີ່ຕັ້ງດ້ານການເມືອງຂອງກຸ່ມ. ອາເມລິກາ ສະໜັບສະໜູນບົດບາດໃຈກາງຂອງອາຊຽນ ແລະ ຈະຮ່ວມມືກັບອາຊຽນ ຢ່າງແໜ້ນແຟ້ນ ເພື່ອຄວາມສະຫງົບປອດໄພ, ສັນຕິພາບ, ການພັດທະນາ ແລະ ວັດທະນະຖາວອນຂອງພາກພື້ນ. ທ່ານເອກອັກຄະລັດຖະທູດ ຫວຽດນາມ ປະຈຳ ອາເມລິກາ Nguyen Quoc Cuong ກ່າວຄຳເຫັນຊົມເຊີຍຄຳໝັ້ນສັນຍາຂອງ ອາເມລິກາ ຊື່ງໄດ້ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນອາຊຽນ ແລະ ປາດຖະໜາວ່າ ອາເມລິກາ ມີບັນດາບາດກ້າວເດີນທີ່ຕັ້ງໜ້າ ເພື່ອເສີມຂະຫຍາຍການພົວພັນລະຫວ່າງສອງຝ່າຍໃນປະຈຸບັນ.
