 ບັນດາຕຶກອາຄານຢູ່ Nuuk, Greenland, ວັນທີ 14/02/2026 (ພາບ: REUTERS/Marko Djurica) |
ວັນທີ 19 ມັງກອນ, ທ່ານ Lars Klingbeil ລັດຖະມົນຕີກະຊວງການເງິນ ເຢຍລະມັນ ແລະ ທ່ານ Roland Lescure ລັດຖະມົນຕີກະຊວງການເງິນ ຝລັ່ງ ຢັ້ງຢືນວ່າ ບັນດາປະເທດມະຫາອຳນາດເອີຣົບ ຈະບໍ່ຍອມຈຳນົນ ແລະ ຈະມີປະຕິກິລິຍາຢ່າງຈະແຈ້ງ, ເປັນເອກະພາບຕໍ່ເລື່ອງ ອາເມລິກາ ນາບຂູ່ຈັດວາງອັດຕາພາສີຕື່ມອີກ ແນໃສ່ກໍ່ກຳລັງດັນໃນບັນຫາ Greenland. ເມື່ອກ່າວຄຳເຫັນຢູ່ Berlin, ທ່ານ Lars Klingbeil ລັດຖະມົນຕີກະຊວງການເງິນ ເຢຍລະມັນ ເນັ້ນໜັກວ່າ: “ເຢຍລະມັນ ແລະ ຝລັ່ງ ຕົກລົງເປັນເອກະພາບວ່າ… ປະຕູເຈລະຈາຍັງເປີດກວ້າງ, ແຕ່ບໍ່ຍອມຮັບຕໍ່ການນາບຂູ່”. ຖະແຫຼງການດັ່ງກ່າວ ໄດ້ຍົກອອກມາພາຍຫຼັງທ່ານ Donald Trump ປະທານາທິບໍດີ ອາເມລິກາ ກ່າວເຕືອນ ຈະຈັດວາງມາດຕະການເພີ່ມອັດຕາພາສີເທື່ອລະກ້າວສຳລັບສິນຄ້າທີ່ໄດ້ນຳເຂົ້າຈາກສຳພັນທະມິດ ເອີຣົບ ຈົນຮອດເວລາທີ່ ອາເມລິກາ ໄດ້ຮັບອະນຸຍາດຊື້ Greenland, ເກາະກວ້າງໃຫຍ່ສຸດຢູ່ຂົ້ວໂລກເໜືອ ຂຶ້ນກັບອະທິປະໄຕຂອງ ແດນມາກ.
ຄາດຄະເນວ່າ ບັນດາການນຳສະຫະພາບເອີຣົບ (EU) ຈະປຶກສາຫາລືແຜນໂຕ້ຕອບໃນກອງປະຊຸມສຸດຍອດໂດຍດ່ວນ ທີ່ຈະຈັດຂຶ້ນໃນວັນທີ 23 ມັງກອນ ຢູ່ ບຣຸກແຊນ. ມີການເລືອກເຟັ້ນໜຶ່ງທີ່ພວມໄດ້ຮັບການພິຈາລະນາ ນັ້ນແມ່ນ ບ້ວງຈັດວາງອັດຕາພາສີລວມມູນຄ່າ 93 ຕື້ ເອີໂຣ (107,7 ຕື້ USD) ສຳລັບສິນຄ້າ ອາເມລິກາ, ອາດຈະມີຜົນສັກສິດແບບອັດຕະໂນມັດແຕ່ວັນທີ 6 ກຸມພາ ພາຍຫຼັງເວລາຖືກຢຸດຕິ 6 ເດືອນ.
