ប្រធានាធិបតីលីបង់ លោក Michel Aoun (ស្ដាំ) និងអគ្គលេខាធិការអង្គការសហប្រជាជាតិ លោក Antonio Guterres ក្នុងជំនួបនៅវិមានប្រធានាធិបតី ទីក្រុង Baabda ភាគខាងកើតក្រុង Beirut កាលពីថ្ងៃទី១៩ ខែធ្នូ ឆ្នាំ២០២១។ (រូបថត៖ AFP) អញ្ជើញថ្លែងនៅក្នុងសន្និសីទសារព័ត៌មាន ជាមួយប្រធានាធិបតីលីបង់លោក Michel Aoun អគ្គលេខាធិការ អ.ស.ប លោក Antonio Guterres បានលើកច្បាស់ថា អង្គការសហប្រជាជាតិតែងតែប្រកៀកស្មាជាមួយប្រជាជនលីបង់។ ប្រមុខអង្គការសហប្រជាជាតិ បានអំពាវនាវឱ្យប្រទេសជាសមាជិកទាំងអស់ ក៏ដូចជាសហគមន៍អន្តរជាតិ បង្កើនជំនួយឧបត្ថម្ភចំពោះលីបង់ ពីព្រោះលីបង់ក៏កំពុងស្ថិតក្នុងស្ថានភាពលំបាកខ្លាំងដែរ។ យោងតាមលោកអគ្គលេខាធិការ អ.ស.ប ប្រការសំខាន់នោះគឺ លីបង់ត្រូវសម្រេចឲ្យបានកិច្ចព្រមព្រៀងជាមួយមូលនិធិរូបិយវត្ថុអន្តរជាតិ ដើម្បីចាប់ផ្តើមកម្មវិធីសេដ្ឋកិច្ចប្រកបដោយប្រសិទ្ធភាព ក៏ដូចជាបង្កលក្ខណៈសម្រាប់ការស្តារឡើងវិញនៃប្រទេសលីបង់។ រីឯខ្លួនវិញ លោកប្រធានាធិបតី Michel Aoun បានឲ្យដឹងថា អាជ្ញាធរលីបង់កំពុងពន្លឿនផែនការចាប់ផ្តើមខឿនសេដ្ឋកិច្ចឡើងវិញ ក៏ដូចជាអនុវត្តកំណែទម្រង់សេដ្ឋកិច្ច ហិរញ្ញវត្ថុ និងនយោបាយ។ លោកប្រធានាធិបតី Michel Aoun បានសម្តែងក្តីសង្ឃឹមថា ការបោះឆ្នោតនីតិបញ្ញត្តិរបស់ប្រទេសលីបង់នៅខែមីនា ឆ្នាំ ២០២២ នឹងបានប្រព្រឹត្តិទៅ ប្រកបដោយមាន "តម្លាភាពនិងយុត្តិធម៌"។ ក្នុងដំណើរទស្សនកិច្ចនេះដែរ លោកអគ្គលេខាធិការ Guterres គ្រោងនឹងអញ្ជើញទៅទស្សនាទីតាំងកើតហេតុនៃការផ្ទុះនៅកំពង់ផែ Beirut និងចំណាយមួយនាទីសម្រាប់រំលឹកវិញ្ញាណក្ខន្ឌ ជនរងគ្រោះ។ លោកក៏នឹងទៅទស្សនាទីក្រុងទ្រីប៉ូលី ភាគខាងជើងប្រទេសលីបង់និងទស្សនា កងកម្លាំងរក្សាសន្តិភាពរបស់ អ.ស.ប នៅប្រទេសលីបង់ (UNIFIL) នៅភាគខាងត្បូងនៃប្រទេសលីបង់៕