វៀតណាម និងឡាវ គឺជាប្រទេសជិតខាងទាំងពីរ ដែលមានព្រំដែនរួមគ្នា។ ប្រជាជាតិទាំងពីរមានភាពស្រដៀងគ្នាជាច្រើនខាងវប្បធម៌ ជាពិសេសប្រពៃណីអាណិតអាសូរគ្នា ការអត់ឱន និងការគោរពតម្លៃសហគមន៍។ ចំណងសាមគ្គីភាពពិសេសរវាងប្រទេសទាំងពីរត្រូវបានចាក់គ្រឹះដោយលោកប្រធានហូជីមិញ និងលោកប្រធាន កៃសុន ភូមិវិហាន (Kaysone Phomvihane) ហើយត្រូវបានពូនជ្រុំដោយថ្នាក់ដឹកនាំជាច្រើនជំនាន់នៃបក្សទាំងពីរ រដ្ឋទាំងពីរ និងប្រជាជននៃប្រទេសទាំងពីរ។ សម្រាប់យុវជនឡាវនាពេលបច្ចុប្បន្ន រួមជាមួយលោកប្រធាន Kaysone Phomvihane - អគ្គមគ្គុទេសក៍ដ៏អស្ចារ្យនៃបដិវត្តន៍ឡាវ ដែលតែងតែត្រូវបានចាត់ទុកជាគំរូ និងជាប្រភពនៃការបំផុសគំនិតក្នុងដំណើរការកសាង និងការពារមាតុប្រទេស - លោកប្រធានហូជីមិញ ក៏ត្រូវបានលើកឡើងដោយការគោរព និងភាពស្និទ្ធស្នាលពិសេសផងដែរ។ បទចម្រៀងអំពីលោកប្រធានហូជីមិញ ដំបូន្មានដ៏ជ្រាលជ្រៅរបស់លោក និងចំណងមិត្តភាពដ៏ស្មោះសររវាងវៀតណាម និងឡាវ បានក្លាយជាផ្នែកមួយនៃការចងចាំពីកុមារភាព និងជាមូលដ្ឋានខាងស្មារតីសម្រាប់យុវជនឡាវជាច្រើននាសព្វថ្ងៃនេះ។
អំពីសតិអារម្មណ៍របស់លោកប្រធានហូជីមិញ។
«ខ្ញុំបានស្គាល់លោកអ៊ំហូ កាលនៅរៀនបឋមសិក្សា។ ខ្ញុំបានទៅទស្សនាប្រទេសវៀតណាម និងវិមានតម្កល់សពលោកប្រធានហូជីមិញនៅថ្នាក់ទី ២ និងទី ៣ ហើយខ្ញុំនៅតែចងចាំពីអារម្មណ៍រំជួលចិត្តនៅពេលឈរនៅចំពោះមុខសាកសពរបស់លោក»។
«ខ្ញុំបានស្គាល់អំពីលោកអ៊ំហូ ពីសៀវភៅប្រវត្តិសាស្ត្រនៅក្នុងថ្នាក់រៀន និងតាមរយៈរឿសងរ៉ាវរបស់ជីដូនជីតា។ រូបថតរបស់លោកអ៊ំហូក៏ត្រូវបានដាក់តាំងដោយខ្ពង់ខ្ពស់នៅលើជញ្ជាំងកណ្តាលនៃផ្ទះខ្ញុំផងដែរ»។
ទាំងនេះគឺជាពាក្យពេចន៍ដ៏ស្មោះស្ម័គ្ររបស់និស្សិតឡាវដែលកំពុងសិក្សានៅវិទ្យាស្ថានការទូតវៀតណាម អំពីលោកប្រធានហូជីមិញ។ មិនត្រឹមតែស្ថិតនៅក្នុងសៀវភៅប្រវត្តិសាស្ត្រ ឬសាលបង្រៀនប៉ុណ្ណោះទេ រូបភាពរបស់បិតាជាតិជាទីគោរពរបស់ប្រជាជាតិវៀតណាម - លោកប្រធានហូជីមិញ - បានខិតជិតជនឡាវជាច្រើន តាមរយៈប្រការដ៏សាមញ្ញបំផុតនៅក្នុងជីវភាពប្រចាំថ្ងៃ។
សម្រាប់និស្សិតឡាវជាច្រើននាក់ដែលកំពុងសិក្សានៅវៀតណាម ពួកគេបានកោតសរសើរលោកប្រធានហូជីមិញ មិនត្រឹមតែជាអគ្គមគ្គុទេសក៍ប៉ុណ្ណោះទេ ប៉ុន្តែថែមទាំងស្មារតីនៃការសិក្សារៀនសូត្រដោយខ្លួនឯងទៀតផង។ មិត្ត Khamping Syduongchan និស្សិតឡាវម្នាក់ បានឲ្យដឹងថា៖ "គំរូរបស់លោកអ៊ំហូ ក្នុងការរៀនភាសាបរទេស គឺជាប្រភពលើកទឹកចិត្តសម្រាប់ Khamping ឱ្យសិក្សា និងស្ទាត់ជំនាញភាសាចំនួនបួនគឺ ភាសាចិន ភាសាអង់គ្លេស ភាសាវៀតណាម និងភាសាថៃ"។
។
«រឿងរ៉ាវរបស់លោកអ៊ំហូ ក្នុងការរៀនភាសាបារាំងនៅលើកប៉ាល់ និងដំណើរទៅស្វែងរកមាគ៌ាសង្គ្រោះជាតិ និងការៀនភាសាបរទេសជាច្រើនទៀត តែងតែដក់ជាប់នៅក្នុងចិត្តរបស់ខ្ញុំជានិច្ច។ នោះហើយ គឺជាកម្លាំងចលករដែលជំរុញឱ្យខ្ញុំសិក្សាភាសាផ្សេងៗគ្នាជាច្រើន។ ជាពិសេស នៅក្នុងយុគសម័យធ្វើសមាហរណកម្មដូចបច្ចុប្បន្ននេះ ខ្ញុំយល់ថា ជំនាញស្វ័យសិក្សា និងការប្រើប្រាស់ភាសាបរទេសជាច្រើនបានយ៉ាងស្ទាត់ជំនាញ គឺមានសារៈសំខាន់និងមានប្រយោជន៍ខ្លាំងណាស់។ ឥឡូវនេះ ខ្ញុំអាចធ្វើជាអ្នកបកប្រែសម្រាប់ឪពុកម្តាយរបស់ខ្ញុំ នៅពេលធ្វើការងារជាមួយដៃគូជនជាតិចិន វៀតណាម ឬជនជាតិបរទេសដទៃទៀត ដោយមានទំនុកចិត្ត»។
អំពីលោកប្រធានហូជីមិញនៅពេលទំនេរ។
បន្ទាប់ពីអាន ដំបូន្មាន ៥ ប្រការ របស់លោកអ៊ំហូ ដោយភាសាវៀតណាមយ៉ាងស្ទាត់ជំនាញ មិត្ត វៀងដាឡា ទេពវង្សសា និស្សិតឡាវម្នាក់ដែលកំពុងសិក្សានៅវិទ្យាស្ថានការទូតវៀតណាមបានចែករំលែកថា៖
«ដំបូន្មាន ៥ ប្រការ របស់លោកអ៊ំហូ មានអត្ថន័យយ៉ាងជ្រាលជ្រៅ ហើយបានក្លាយជាគោលការណ៍ណែនាំរបស់ខ្ញុំនៅក្នុងដំណើរអភិវឌ្ឍខ្លួនឯង។ នៅពេលបានទៅទស្សនាមូលដ្ឋានបដិវត្តន៍ ATK Thai Nguyen ហើយទទួលបទពិសោធន៍នៃអាហារប្រចាំថ្ងៃ និងរបៀបរស់នៅដ៏សាមញ្ញ ប៉ុន្តែមានវិន័យខ្ពស់របស់លោកអ៊ំហូ បានធ្វើឱ្យខ្ញុំរំជួលចិត្តយ៉ាងខ្លាំង។ លោកអ៊ំបានលះបង់អស់ពីចិត្ត ដើម្បីបុព្វហេតុដ៏រុងរឿង គឺឯករាជ្យជាតិ ដើម្បីប្រទេសជាតិ និងប្រជាជន។ នៅពេលនោះ ខ្ញុំបានគិតអំពីខ្លួនឯង ហើយចង់ខិតខំប្រឹងប្រែងសិក្សារៀនសូត្រ និងហ្វឹកហាត់ខ្លួនឯងបន្ថែមទៀត ជាពិសេសនៅក្នុងបរិបទដែលពិភពលោកកំពុងមានការផ្លាស់ប្តូរយ៉ាងឆាប់រហ័សដូចពេលបច្ចុប្បន្ននេះ»។
និស្សិតឡាវមិនភ្ញាក់ផ្អើលទេដែលបានអានព័ត៌មានថា៖ គិតត្រឹមព្រឹកថ្ងៃទី ៣០ ខែមេសា - ទិវារំដោះភាគខាងត្បូង និងបង្រួបបង្រួមប្រទេសជាតិ - មានអ្នកទេសចរវៀតណាម និងអន្តរជាតិជាង ២០.០០០ នាក់បានចូលវិមានគោរពវិញ្ញាណក្ខណ្ឌលោកប្រធានហូជីមិញ។ មិត្ត ផនខាំ ស៊ីសំផន ជានិស្សិតថ្នាក់អនុបណ្ឌិតនៅសាកលវិទ្យាល័យសហជីពវៀតណាម ដែលបានចូលវិមានគោរពវិញ្ញាណក្ខណ្ឌលោកប្រធានហូជីមិញជាច្រើនដងហើយ បានចែករំលែកអារម្មណ៍យ៉ាងរំជួលចិត្តថា៖
។
«រាល់ពេលបានចូលគោរពវិញ្ញាណក្ខន្ធលោកប្រធាន ខ្ញុំតែងតែមានការរំជួលចិត្តយ៉ាងខ្លាំង។ ខ្ញុំ និងមិត្តភក្តិជាច្រើនទៀតមិនអាចទប់ទឹកភ្នែកបានទេ នៅពេលមើលភាពយន្តឯកសារអំពីជីវិត និងអាជីពដ៏អស្ចារ្យរបស់លោក។ ប្រការនេះ តែងតែលើកទឹកចិត្តឲ្យយើង ខិតខំសិក្សារៀនសូត្របន្ថែមទៀត ដើម្បីរួមចំណែកក្នុងការកសាង និងអភិវឌ្ឍប្រទេសជាតិ»។
ដោយមិនបាច់មាននរណាប្រាប់នរណាជាមុនឡើយ បទចម្រៀង «ដូចជាមានលោកអ៊ំហូនៅទិវាមហាជ័យជំនះ» បន្លឺឡើងនៅក្នុងគ្រប់កម្មវិធីជួបប្រាស្រ័យរវាងយុវជននៃប្រទេសទាំងពីរ។ ប្រការនេះ បង្ហាញពីមនោសញ្ចេតនាដែលយុវជនឡាវមានចំពោះលោកប្រធាន ហូជីមិញ គឺមិនត្រឹមតែមកពីការកោតសរសើរចំពោះអគ្គ មគ្គុទ្ទេសក៍ដ៏មហិមារបស់ប្រជាជាតិវៀតណាមប៉ុណ្ណោះទេ ប៉ុន្តែថែមទាំងត្រូវបានពូនជ្រុំពីចំណងមិត្តភាពដ៏ស្មោះត្រង់និងឥតប្រែប្រួលរវាងវៀតណាម-ឡាវ អស់រយៈពេលជាច្រើនជំនាន់មកទៀតផង។ រឿងរ៉ាវដ៏សាមញ្ញៗអំពីលោកប្រធានហូជីមិញ ស្មារតីស្វ័យសិក្សា សុភាពរាបសា និងបំណងប្រាថ្នាចង់លះបង់របស់លោក នៅតែជាប្រភពបំផុសគំនិតដល់យុវជនឡាវជាច្រើនរូប ក្នុងដំណើរការសិក្សារៀនសូត្រ ហាត់ពត់លត់ដំខ្លួន និងធ្វើសមាហរណកម្មអន្តរជាតិ ដោយក្លាយជាសង្វារខាងស្មារតីដ៏មានតម្លៃរបស់យុវជនឡាវនាសព្វថ្ងៃនេះ និងនាពេលអនាគត៕
