ໂຄງການທ່າກຳປັ່ນ ລຽນຈຽວ ໄດ້ພັດທະນາຕາມທິດກຸ່ມ logistics ສົມບູນ, ລວມມີ ລະບົບເດີ່ນສາງທ່າກຳປັ່ນ, ສາງເກັບ-ຂົນສົ່ງ ແລະ ສູນແຈກຢາຍ. ໂຄງການໄດ້ຮັບການຜັນຂະຫຍາຍໃນໄລຍະສິບປີ, ດ້ວຍການທິດທາງພັດທະນາກາຍເປັນ “ທ່າກຳປັ່ນສີຂຽວ, ທ່າກຳປັ່ນອັດສະລິຍະ”, ນຳໃຊ້ບັນດາມາດຕະການເຕັກໂນໂລຢີ ແລະຫັນເປັນດີຈີຕອນ, ຕິດພັນກັບເປົ້າໝາຍຫຼຸດຜ່ອນອາຍພິດ ແລະຮັກສາສິ່ງແວດລ້ອມ. ຄາດວ່າ, ໄລຍະທີ 1 ຂອງໂຄງການ ຈະນຳເຂົ້າເຄື່ອນໄຫວໃນປີ 2029, ດ້ວຍສະມັດຖະພາບສິນຄ້າບັນລຸປະມານ 74 ລ້ານໂຕນຕໍ່ປີ, ສາມາດຮັບກຳປັ່ນ container ທີ່ມີນ້ຳໜັກຫຼາຍທີ່ສຸດໃນໂລກໄດ້ຫຼາຍລຳໃນເວລາດຽວກັນ. ນີ້ຈະແມ່ນຂີດໝາຍປະຫວັດສາດ, ເປີດໄລຍະພັດທະນາໃໝ່ຂອງນະຄອນ. ທ່ານ ດິງຫ໋າຍຕວັນ, ປະທານສະມາຄົມຂົນສົ່ງລົດໂອໂຕ ດ່ານັ້ງ ແບ່ງປັນວ່າ:
“ເມື່ອທ່າກຳປັ່ນ ລຽນຈຽວ ໄດ້ນຳເຂົ້າເຄື່ອນໄຫວ ຈະສ້າງລະບົບນິເວດ logistics ໃໝ່, ສ້າງບັນດາເດີ່ນສາງ container, ບັນດາພື້ນຖານໂຄງລ່າງກ່ຽວກັບການບໍລິການ logistics ລົງເລິກຢູ່ເຂດ ລຽນຈຽວ. ນີ້ຈະແມ່ນໄມ້ງັດໃຫ້ແກ່ການພັດທະນາຂອງການຂົນສົ່ງສີຂຽວ ແລະ ການຫັນເປັນດີຈີຕອນ”.
ໂຄງການທ່າກຳປັ່ນ container ລຽນຈຽວ ໂດຍບໍລິສັດຫຸ້ນສ່ວນ ກຸ່ມບໍລິສັດ Hateco - ບໍລິສັດ ທ່າກຳປັ່ນທະເລ Hateco ຈຳກັດ ຮ່ວມທຸລະກິດກັບ APM Terminals B.V (ໂຮນລັງ) ປະຕິບັດ. ຕາມທ່ານ ເຈິ່ນວັນກີ່ ປະທານ Hateco ແລ້ວ, ເພື່ອໃຫ້ທ່າກຳປັ່ນ container ລຽນຈຽວ ຢັ້ງຢຶນໄດ້ບົດບາດເປັນສູນກາງ logistics ແລະ ເປັນທ່າກຳປັ່ນທະເລທີ່ທັນສະໄໝທີ່ສຸດຢູ່ເຂດພາກກາງ ແລະ ທົ່ວປະເທດໃນສັງກາດໃໝ່, Hateco ໃຫ້ຄຳໝັ້ນສັນຍາວ່າ:
“ສຳລັບໂຄງການທີ່ມີຂອບຂະໜາດ ແລະ ມີຄວາມສຳຄັນຄື ລຽນຈຽວ, ຄຳຮຽກຮ້ອງທີ່ວາງອອກບໍ່ພຽງແຕ່ແມ່ນປະສິດທິຜົນການລົງທຶນເທົ່ານັ້ນ, ຫາກຍັງແມ່ນລະບຽບວິໄນໃນການຜັນຂະຫຍາຍຄຸນນະພາບໂຄງການ, ມູນຄ່າປະກອບສ່ວນໃນໄລຍະຍາວໃຫ້ແກ່ການພັດທະນາເສດຖະກິດສັງຄົມຂອງນະຄອນອີກດ້ວຍ. ພວກຂ້າພະເຈົ້າໃຫ້ຄຳໝັ້ນສັນຍາຈະຜັນຂະຫຍາຍ ໂຄງການຖືກກັບຄວາມຄືບໜ້າ, ແຜນກຳນົດ, ຮັບປະກັນຄຸນນະພາບປະສິດທິຜົນສັງລວມ”.
ໂດຍບໍ່ພຽງແຕ່ມີຂອບຂະໜາດໃຫຍ່ ແລະ ທັນສະໄໝທີ່ສຸດຢູ່ ຫວຽດນາມ ເທົ່ານັ້ນ, ທ່າກຳປັ່ນ container ສາກົນ ລຽນຈຽວ ຍັງໄດ້ຮັບການປະສົມປະສານເລິກກັບລະບົບຊີວະພາບລວມມີ: ສູນການເງິນ, ເຂດອຸດສາຫະກຳ, ເຂດຜະລິດປຸງແຕ່ງ ແລະ ເຂດການຄ້າເສລີ, ໝູນໃຊ້ບັນດາບຸລິມະສິດກ່ຽວກັບພາສີ ແລະ ການເຮັດລະບຽບການພາສີຢ່າງມີປະສິດທິຜົນອີກດ້ວຍ. ໂຄງການກໍ່ໄດ້ສ້າງເງື່ອນໄຂເປີດກວ້າງການເຊື່ອມຈອດກັບບັນດາຕະຫຼາດທົ່ວໂລກ, ດຶງດູດບັນດາກະແສເງິນລົງທຶນສາກົນຢ່າງແຮງ, ຄືດັ່ງຄຳຢັ້ງຢຶນຂອງ ທ່ານ ຟ້າມຢາຕຸກ ຮອງນາຍົກລັດຖະມົນຕີ ຜູ້ປະຈຳການລັດຖະບານ ຫວຽດນາມ:
“ທ່າກຳປັ່ນ container ລຽນຈຽວ ບໍ່ພຽງແຕ່ແມ່ນໂຄງການພື້ນຖານໂຄງລ່າງເທົ່ານັ້ນ ຫາກຍັງແມ່ນຕາໂສ້ຍຸດທະສາດໃນລະບົບຕ່ອງໂສ້ແຫ່ງຊາດ ແລະ ທົ່ວໂລກ. ໂຄງການນີ້ຈະນຳນະຄອນ ດ່ານັ້ງ ກາຍເປັນນະຄອນທ່າກຳປັ່ນວັດທະນາຖາວອນ, ປະກອບສວ່ນສຳຄັນເຂົ້າການເຕີບໂຕລວມຂອງປະເທດ ແລະ ຢັ້ງຢຶນບົດບາດເປັນສູນກາງ logistic ແລະ ທ່າກຳປັ່ນທີ່ທັນສະໄໝທີ່ສຸດເຂດພາກກາງ ແລະ ທົ່ວປະເທດໃນສັງກາດໃໝ່. ພ້ອມທັງ, ປະກອບສ່ວນກຳນົດທີ່ຕັ້ງ ຫວຽດນາມ ໃນເຄືອຂ່າຍຂົນສົ່ງສາກົນຢ່າງເລິກເຊິ່ງກວ່າ”.
ຕົວຈິງໃນຫຼາຍປີຜ່ານມາ, ລະບົບທ່າກຳປັ່ນຢູ່ພາກກາງ ອີງໃສ່ທ່າກຳປັ່ນ ຕຽນຊາ ເປັນສ່ວນຫຼາຍ, ໂດຍແມ່ນທ່າກຳປັ່ນມີທີ່ຕັ້ງສະດວກດ້ານປະຫວັດສາດແຕ່ພັດຖືກຈຳກັດດ້ານໂຄງປະກອບຄື: ພື້ນທີ່ຖືກຈຳກັດ, ກຳປັ່ນທີ່ມີນ້ຳໜັກໃຫຍ່ແມ່ນຍາກທີ່ຈະເຂົ້າທຽບທ່າໄດ້ ແລະ ພິເສດແມ່ນການປະທະກັນທີ່ນັບມື້ນັບຈະແຈ້ງລະຫວ່າງການເຄື່ອນໄຫວ logistics ກັບການພັດທະນາຕົວເມືອງ ແລະ ການທ່ອງທ່ຽວ. ໃນສະພາບການນັ້ນ, ລຽນຈຽວແມ່ນມາດຕະການທີ່ມີລັກສະນະສ້າງໂຄງປະກອບຄືນໃໝ່, ບໍ່ແມ່ນເພື່ອເພີ່ມເຕີມສະມັດຖະພາບເທົ່ານັ້ນ ຫາກຍັງເພື່ອສ້າງຮູບແບບທ່າກຳປັ່ນທະເລໃໝ່, ທ່າກຳປັ່ນນ້ຳເລິກຕິດພັນກັບສູນກາງ logistics ປະສົມປະສານ.ໃຫ້ຂໍ້ສັງເກດກ່ຽວກັບທ່າໄດ້ປຽບນີ້, ທ່ານ Marcello Piazz ກຸ່ມບໍລິສັດ JAS Worldwide (ບໍລິສັດມອບຮັບການຂົນສົ່ງທາງທະເລທົ່ວໂລກ)ຖືວ່າ
“ຫວຽດນາມ ຕາງໜ້າໃຫ້ແກ່ປະພາຄານຂອງສູນ logistics ໃນພາກພື້ນທີ່ກ່ຽວຂ້ອງເຖິງບັນດາປະເທດບ້ານໃກ້ເຮືອນຄຽງ, ອະນຸຍາດໃຫ້ບັນດາປະເທດອື່ນແລກປ່ຽນພື້ນຖານໂຄງລ່າງ, ລະອຽດແມ່ນທ່າກຳປັ່ນທະເລ. ຍ້ອນ ທຸກປະເທດບ້ານໃກ້ເຮືອນຄຽງລຽບຕາມແມ່ນ້ຳຂອງ ລ້ວນແຕ່ໄດ້ລົງນາມສົນທິສັນຍາການຄ້າເສລີນຳກັນ, ອະນຸຍາດໃຫ້ແລກປ່ຽນສິນຄ້າ ແລະ ການບໍລິການຍົກເວັ້ນພາສີ, ສ້າງເງື່ອນໄຂສະດວກເພື່ອໃຫ້ພື້ນຖານເສດຖະກິດ ຫວຽດນາມ ທີ່ພວມພັດທະນາຢ່າງແຮງ ແລະ ກາຍເປັນສູນກາງ logistics ຂອງພາກພື້ນ, ມີບົດບາດຍຸດທະສາດສຳຄັນບົນເວທີ logistics ທົ່ວໂລກໃນໄລຍະ 10-15 ປີຈະມາເຖິງ”.
ທ່າກຳປັ່ນນ້ຳເລິກທີ່ມີຄວາມສາມາດຮັບກຳປັ່ນຂະໜາດໃຫຍ່ເຂົ້າທຽບທ່າ ແລະ ດຶງດູດບັນດາເສັ້ນທາງຂົນສົ່ງໂດຍກົງ ຈະຊ່ວຍຫຼຸດຜ່ອນການເອື່ອຍອີງຂົນສົ່ງຜ່ານຕ່າງປະເທດ, ຈາກນັ້ນເພີ່ມສິດເປັນເຈົ້າການໃນການກຳນົດເສັ້ນທາງຂົນສົ່ງສິນຄ້າ.
ທ່າກຳປັ່ນ ລຽນຈຽວ ບໍ່ພຽງແຕ່ແມ່ນໂຄງການພື້ນຖານໂຄງລ່າງເທົ່ານັ້ນ ຫາກຍັງແມ່ນບາດກ້າວຍຸດທະສາດຊ່ວຍໃຫ້ຫວຽດນາມ ຍົກສູງຖານະບົດບາດຈາກທ່າກຳປັ່ນແຫ່ງຊາດກາຍເປັນສູນກາງ logistics ລະດັບພາກພື້ນ ແລະ ໂລກ.
