ດ້ວຍລະດັບຄວາມໄວໃນການສົ່ງຖ່າຍທີ່ກະໂດດຂັ້ນ, ຄວາມສາມາດເຊື່ອມຕໍ່ກັບເຄື່ອງອຸປະກອນນັບຕື້ເຄື່ອງ, 6G ເປີດອອກສູ່ບັນດາຮູບແບບເສດຖະກິດໃໝ່, ເຊັ່ນ: ເສດຖະກິດດີຈີຕອນມະຫາເຊື່ອມຕໍ່; ການຜະລິດອັດສະລິຍະຮອບດ້ານ; ຕົວເມືອງອັດສະລິຍະລຸ້ນໃໝ່ ແລະ ການບໍລິການດີຈີຕອນແບບຫັນເປັນສ່ວນຕົວຢູ່ໃນຂອບເຂດໃຫຍ່. ດັ່ງນັ້ນ, ປະເທດໃດທີ່ເຂົ້າຮ່ວມລະບົບນິເວດ 6G ໄວ ປະເທດນັ້ນຈະມີທ່າໄດ້ປຽບຢ່າງໃຫຍ່ຫຼວງໃນການຮັກສາມູນຄ່າເພີ່ມສູງໃນລະບົບເຕັກໂນໂລຢີທົ່ວໂລກ.
ໃນຫຼາຍປີຜ່ານມາ, ຫວຽດນາມ ສ່ວນຫຼາຍແມ່ນຢູ່ໃນທ່າຮອງຮັບ ແລະ ຜັນຂະຫຍາຍບັນດາລຸ້ນເຕັກໂນໂລຢີໂທລະຄົມມະນາຄົມຈາກ 2G ຫາ 4G. ເຖິງຢ່າງໃດກໍຕາມ, ສຳລັບ 5G (ໄດ້ຮັບການຜັນຂະຫຍາຍເປັນການຄ້ານັບແຕ່ປີ 2024), ວິທີການເຂົ້າເຖິງໄດ້ມີການປ່ຽນແປງຢ່າງເຫັນໄດ້ຊັດ: ບໍ່ພຽງແຕ່ນຳໃຊ້ເທົ່ານັ້ນ ຫາກຍັງຄົ້ນຄວ້າ, ຜະລິດເຄື່ອງອຸປະກອນ ແລະ ເປັນເຈົ້າຂອງເຕັກໂນໂລຢີສ່ວນໃດໜຶ່ງເປັນເທື່ອລະກ້າວ. ນີ້ແມ່ນພື້ນຖານສຳຄັນເພື່ອໃຫ້ ຫວຽດນາມ ກ້າວເຂົ້າສູ່ “ເສັ້ນທາງແຂ່ງຂັນ” 6G ດ້ວຍຈິດໃຈ ແລະ ມູມມອງໃໝ່.
ທ່ານ ຫງວຽນຄັກລິກ, ຫົວໜ້າກົມອຸດສາຫະກຳເຕັກໂນໂລຢີຂໍ້ມູນຂ່າວສານ, ກະຊວງວິທະຍາສາດ ແລະ ເຕັກໂນໂລຢີ ຫວຽດນາມ, ໃຫ້ຮູ້ວ່າ:
“ນີ້ແມ່ນຈິດໃຈລຸລ່ວງດ້ວຍຄວາມປາດຖະໜາສ້າງກຳລັງຄວາມສາມາດເປັນເຈົ້າກ່ຽວກັບເຕັກໂນໂລຢີຍຸດທະສາດ, ເຕັກໂນໂລຢີເຄົ້າ ແລະ ເຕັກໂນໂລຢີແກ່ນສານເປັນເທື່ອລະກ້າວ; ພັດທະນາຖັນແຖວວິສາຫະກິດ, ອົງການຈັດຕັ້ງ ແລະ ຊາວ ຫວຽດນາມ ໃຫ້ມີຄວາມສາມາດປະດິດຄິດສ້າງ, ເປັນເຈົ້າຂອງ, ແກ້ງແຍ້ງທົ່ວໂລກໃນບັນດາຂົງເຂດແກ່ນສານຂອງເຕັກໂນໂລຢີຍຸດທະສາດ”.
ເພື່ອເປັນເຈົ້າຂອງການອອກແບບ, ການຄົ້ນຄວ້າ, ຜະລິດເຄື່ອງອຸປະກອນ 5G, ຫວຽດນາມ ໄດ້ຊຸກຍູ້ການຮ່ວມມືສາກົນ, ເຂົ້າຮ່ວມບັນດາສຳພັນທະມິດ, ຈັດຕັ້ງການສ້າງມາດຕະຖານຢ່າງເລິກເຊິ່ງ. ນີ້ແມ່ນເສັ້ນທາງໄວທີ່ສຸດເພື່ອເຂົ້າເຖິງພູມປັນຍາ ແລະ ຍົກສູງທີ່ຕັ້ງບົດບາດ. ຍຸດທະສາດນີ້ໄດ້ປະກົດຜົນເປັນຈິງຜ່ານການຮ່ວມມືລະຫວ່າງ Viettel ແລະ Qualcomm, ພ້ອມກັບບັນດາຄຳໝັ້ນສັນຍາຜັນຂະຫຍາຍຈາກ MobiFone, ຊ່ວຍໃຫ້ ຫວຽດນາມ ກາຍເປັນສູນ Open RAN ໃໝ່ຂອງໂລກ. ທ່ານ ຫງວຽນມິງກວາງ, ຜູ້ອຳນວຍການໃຫຍ່ບໍລິສັດໃຫຍ່ອຸດສາຫະກຳເຕັກໂນໂລຢີສູງ Viettel, ເນັ້ນໜັກວ່າ:
“ຕາມແຜນການແມ່ນຮອດປີ 2028, ຫວຽດນາມ ຈະເລີ່ມທົດລອງ 6G. ເລື່ອງຮ່ວມມືກັບບັນດາຄູ່ຮ່ວມມືສາກົນແມ່ນເງື່ອນໄຂທີ່ຈຳເປັນສຳລັບວິສາຫະກິດໜຶ່ງເມື່ອອອກສູ່ໂລກ, ພວກເຮົາບໍ່ສາມາດໄປຄົນດຽວໄດ້ ຫາກຍັງຕ້ອງມີບັນດາຄູ່ຮ່ວມມືທີ່ໄວ້ເນື້ອເຊື່ອໃຈ. Qualcomm ແມ່ນໜຶ່ງໃນບັນດາຄູ່ຮ່ວມມືທີ່ມີຄວາມໜ້າໄວ້ເນື້ອເຊື່ອໃຈຄືແນວນັ້ນ. Viettel ແລະ Qualcomm ໄດ້ຮ່ວມມືກັນແຕ່ປີ 2022, ສອງຝ່າຍໄດ້ສ້າງຂີດໝາຍສຳຄັນໃນການຜັນຂະຫຍາຍ Open RAN ໃນວົງກວ້າງ”.
ເມື່ອຕີລາຄາກ່ຽວກັບການຮ່ວມມືນີ້, ທ່ານ ທ່ຽວເຟືອງນາມ, ຜູ້ອຳນວຍການໃຫຍ່ Qualcomm ຫວຽດນາມ, ລາວ ແລະ ກຳປູເຈຍ ຢັ້ງຢືນວ່າ:
“ກ່ຽວກັບການຮ່ວມມືລະຫວ່າງພວກຂ້າພະເຈົ້າ ແລະ Viettel, ພວກຂ້າພະເຈົ້າ ມີຄວາມໝັ້ນໃຈຕໍ່ບັນດາຜະລິດຕະພັນຂອງ ຫວຽດນາມ ດ້ວຍຄຸນນະພາບທີ່ບໍ່ແພ້ບັນດາຜະລິດຕະພັນໃຫຍ່ທີ່ສຸດໃນໂລກ ແລະ ສຳຄັນກວ່າແມ່ນບັນລຸໄດ້ເປົ້າໝາຍລວມ ເຊິ່ງ Viettel ແລະ Qualcomm ວາງອອກແຕ່ຫົວທີ. ບັນດາຜະລິດຕະພັນພື້ນຖານໂຄງລ່າງຮັບໃຊ້ອິນເຕີເນັດ 5G ມີຄວາມຮຽກຮ້ອງສູງທີ່ສຸດ ແຕ່ນັກວິສະວະກອນຂອງ Viettel ແລະ Qualcomm ສາມາດປະຕິບັດໄດ້ຕາມມາດຕະຖານນັ້ນ”.
ຕາມທ່ານ Akash Palkhiwala ຮອງປະທານຝ່າຍບໍລິຫານ, ຜູ້ອຳນວຍການດ້ານການເງິນ ແລະ ຜູ້ອຳນວຍການຝ່າຍເຄື່ອນໄຫວບໍລິຫານກຸ່ມບໍລິສັດ Qualcomm ແລ້ວ, ຫວຽດນາມ ມີຄວາມສາມາດບົ່ມຊ້ອນບືນຕົວຂຶ້ນສູ່ທີ່ຕັ້ງນຳໜ້າໃນການຜັນຂະຫຍາຍ 6G ໃນທົ່ວໂລກ:
“ຫວຽດນາມ ມີຜູ້ເກັ່ງກ້າສາມາດຫຼາຍຄົນ ແລະ ມີແຫຼ່ງວິສະວະກອນເປັນຈຳນວນຫຼາຍ, ມີພື້ນຖານເຕັກນິກທີ່ໝັ້ນແກ່ນ, ເຊິ່ງເປັນສິ່ງ Qualcomm ຍາມໃດກໍສຸມໃສ່, ເພາະວ່າ ນີ້ແມ່ນໂອກາດເພື່ອໃຫ້ພວກຂ້າພະເຈົ້າເຂົ້າຮ່ວມ ແລະ ຍາດແຍ່ງທ່າໄດ້ປຽບນັ້ນ, ພ້ອມທັງນຳເອົາຫຼາຍເຕັກໂນໂລຢີມາ ຫວຽດນາມ ເພື່ອຜັນຂະຫຍາຍໃນຂອບເຂດໃຫຍ່. ຫວຽດນາມ ມີວິຊາການ, ພື້ນຖານໂຄງລ່າງ ແລະ ວິໄສທັດກ່ຽວກັບການຫັນເປັນດີຈີຕອນແຫ່ງຊາດ”.
ເປົ້າໝາຍເຂົ້າຮ່ວມລະບົບນິເວດ 6G ທົ່ວໂລກຂອງ ຫວຽດນາມ ແມ່ນຄັດເລືອກຍຸດທະສາດ ແນໃສ່ຍົກສູງກຳລັງຄວາມສາມາດແກ້ງແຍ້ງແຫ່ງຊາດ, ຍາດແຍ່ງກາລະໂອກາດຂອງການປະຕິວັດອຸດສາຫະກຳໃໝ່. ໃນໂລກທີ່ເຕັກໂນໂລຢີພວມໄດ້ກຳນົດຄວາມເປັນລະບຽບຮຽບຮ້ອຍພັດທະນາຄືນໃໝ່ນັ້ນ, ເລື່ອງເປັນເຈົ້າການກ້າວເຂົ້າສູ່ “ເວທີ” 6G ແຕ່ໄວ ຈະຊ່ວຍໃຫ້ ຫວຽດນາມ ບໍ່ພຽງແຕ່ກ້າວເດີນທັນເທົ່ານັ້ນ, ຫາກຍັງມີໂອກາດບືນຕົວຂຶ້ນ, ຢັ້ງຢືນທີ່ຕັ້ງຂອງຕົນໃນແຜນທີ່ເຕັກໂນໂລຢີທົ່ວໂລກອີກດ້ວຍ./.
