(ພາບ: ວຽນຮົ່ງກວາງ)
ປະຫວັດສາດຂອງຊາດ ຍາມໃດກໍ່ແມ່ນແຫຼ່ງບັນດານໃຈທີ່ບໍ່ມີວັນສິ້ນສຸດສຳລັບຜູ້ເຄື່ອນໄຫວໃນຂົງເຂດວັດທະນະທຳສິລະປະ, ໃນນັ້ນ ມີເພື່ອນໜຸ່ມຫຼາຍຄົນໄດ້ຊອກຫາເສັ້ນທາງສະເພາະໃຫ້ຕົນທີ່ເຕັມໄປດ້ວຍຫົວຄິດປະດິດສ້າງ. ໂດຍເລືອກເອົາການຟື້ນຟູເອກະສານເກົ່າ, ອ້າຍ ວຽນຮົ່ງກວາງ, ເກີດປີ 1995, ຢູ່ ຮ່າໂນ້ຍ ໄດ້ໃສ່ສີໃຫ້ພາບຖ່າຍນັບຮ້ອຍພາບ ແລະ ມີຫຼາຍວີດີໂອສຳພາດຜູ້ມີຊືີສຽງໃນປະຫວັດສາດ, ໃນນັ້ນ ມີບັນດາຮູບເງົາທີ່ມີຄຸນຄ່າກ່ຽວກັບປະທານ ໂຮ່ຈິມິນ.
ນີ້ແມ່ນສຽງຕອນໜຶ່ງໃນວີດີໂອກ່ຽວກັບ ປະທານ ໂຮ່ຈີມິນ ໃນການຕອບສຳພາດນັກຂ່າວສັງກັດຫ້ອງການກະຈາຍສຽງໂທລະພາບ ຝລັ່ງ (ORTF) ເມື່ອປີ 1946. ເມື່ອທຽບໃສ່ພາບຂາວດຳຕົ້ນສະບັບແລ້ວ ວີດີໂອນີ້ໄດ້ໃສ່ສີຢ່າງມີຊີວິດຊີວາ ແລະ ມີເນື້ອແທ້. ນີ້ແມ່ນຜະລິດຕະພັນຂອງ ອ້າຍ ວຽນຮົ່ງກວາງ ນຳສະເໜີຕໍ່ມະຫາຊົນໃນປີ 2020, ກົງກັບໂອກາດວັນເກີດຂອງ ປະທານ ໂຮ່ຈີມິນ ຄົບຮອບ 130 ປີ (19 ພຶດສະພາ 1890 – 19 ພຶດສະພາ 2020). ພາຍຫຼັງໄດ້ເອົາລົງໃນບັນດາສື່ສັງຄົມອອນລາຍ, ວີດີໂອໄດ້ດຶງດູດນັບຮ້ອຍຜູ້ປະກອບຄຳເຫັນ, ສະແດງຄວາມເຄົາລົບຕໍ່ຜູ້ປະດິດສ້າງໃນຕອນວີດີໂອດັ່ງກ່າວ. ອ້າຍ ວຽນຮົ່ງກວາງ, ໃຫ້ຮູ້ວ່າ:
“ແນວຄິດຟື້ນຟູສີບັນດາຮູບເງົາກ່ຽວກັບ ປະທານ ໂຮ່ຈີມິນ ໄດ້ເລີ່ມຕົ້ນນັບແຕ່ 6 ປີກ່ອນ ເມື່ອຂ້າພະເຈົ້າໄດ້ຮູ້ຈັກໂຄງການໜຶ່ງຂອງບັນດາເພື່ອນໜຸ່ມຢູ່ຕ່າງປະເທດທີ່ຄົ້ນຄວ້າການຟື້ນຟູບັນດາພາບຖ່າຍຂາວດຳດ້ວຍປັນຍາປະດິດ. ຄາວນັ້ນ, ຂ້າພະເຈົ້າມີແນວຄິດວ່າ ເປັນຫຍັງຕົນເອງບໍ່ລອງເຮັດເບິ່ງ, ບໍ່ພຽງແຕ່ຟື້ນຟູພາບຖ່າຍເທົ່ານັ້ນ ຫາກຍັງມີທັງບັນດາວີດີໂອສັ້ນໆອີກດ້ວຍ. ຂ້າພະເຈົ້າໄດ້ຟື້ນຟູວີດີໂອສຳພາດ ປະທານ ໂຮ່ຈິມິນ ດ້ວຍບັນດາຮູບສີ”.
ເມື່ອເວົ້າກ່ຽວກັບວີດີໂອທຳອິດຂອງຕົນ, ວຽນຮົ່ງກວາງ ຖືວ່າ ອ້າຍຍັງບໍ່ທັນມີຄວາມເພິ່ງພໍໃຈຕໍ່ວີດີໂອໃນຄາວນັ້ນ ເຖິງວ່າຕົນເອງໄດ້ມານະພະຍາຍາມຢ່າງສຸດຂີດແລ້ວ. ບັນດາລັກສະນະຊັດເຈນຂອງສີສັນພາບຖ່າຍ ຍັງບໍ່ທັນມີຜົນງານທີ່ດີ. ສະນັ້ນ, ອ້າຍ ກວາງ ໄດ້ຊອກອ່່ານຫຼາຍເອກະສານກ່ຽວກັບເຕັກນິກ, ຄົ້ນຄວ້າເອກະສານປະຫວັດສາດຫຼາຍກວ່າ, ຮຽນດ້ວຍຕົນເອງຜ່ານບັນດາກຸ່ມ, ເວທີປາໄສຢູ່ພາຍໃນ ແລະ ຕ່າງປະເທດ. ອ້າຍແບ່ງປັນວ່າ:
“ໃນຈຸດເວລານັ້ນ, ຢູ່ ຫວຽດນາມ, ວຽກງານນີ້ຍັງໃໝ່ຢູ່, ເພື່ອເຮັດໄດ້ ຕ້ອງເສຍເວລາ ແລະ ເຫື່ອແຮງຫຼາຍ ເພື່ອຄົ້ນຄວ້າເຮັດແນວໃດຈະປັບປຸງຄຸນນະພາບຂອງພາບຖ່າຍໄດ້. ພາຍຫຼັງຄົ້ນຄວ້າເປັນເວລາ 2 ປີ, ຂ້າພະເຈົ້າສາມາດປັບປຸງຂັ້ນຕອນຟື້ນຟູ, ຄຸນນະພາບຂອງພາບຖ່າຍກໍ່ດີກວ່າ, ຂັ້ນຕອນກໍ່ໄດ້ຫຼຸດລົງຫຼາຍ”.
ໂດຍຮ່ວມເດີນທາງພ້ອມກັບ ວຽນຮົ່ງກວາງ ນັບແຕ່ຊຸມມື້ທຳອິດ ທີ່ອ້າຍເຮັດວຽກງານນີ້, ເພື່ອນ ຈິ້ນທິຍືງອັກ ໃຫ້ຮູ້ວ່າ:
“ຈຸດເວລາ ຮົ່ງກວາງ ເລີ່ມຟື້ນຟູບັນດາວີດີໂອກ່ຽວກັບ ປະທານ ໂຮ່ຈີມິນ, ຂ້າພະເຈົ້າໄດ້ສະໜັບສະໜູນເພື່ອນທີ່ສຸດ. ໃນເບື້ອງຕົ້ນ, ກວາງ ໄດ້ປະສົບກັບຄວາມຫຍຸ້ງຍາກຫຼາຍຢ່າງ. ກວາງ ຕ້ອງເສຍເວລາເປັນມື້, ເປັນອາທິດ, ຊ້ຳບໍ່ໜຳເປັນເດືອນເພື່ອຟື້ນຟູວີດີໂອຮູບເງົາ. ຫຼັງຈາກນັ້ນແມ່ນງົບປະມານເພື່ອຮັກສາເຄື່ອງຈັກ, ບັນດາເຄື່ອງອຸປະກອນເຕັກນິກ. ສຳລັບຂ້າພະເຈົ້າແລ້ວ, ນີ້ແມ່ນການເລືອກຢ່າງຖືກຕ້ອງຂອງ ກວາງ. ນີ້ກໍ່ແມ່ນກຳລັງໜູນໃຫ້ແກ່ບັນດາເພື່ອນໜຸ່ມອື່ນເດີນຕາມວຽກງານນີ້”.
ການຟື້ນຟູເອກະສານເກົ່າ ບໍ່ແມ່ນວຽກທີ່ງ່າຍກັບບໍ່ວ່າຜູ້ໃດ. ເລື່ອງມີຄວາມເຂົ້າໃຈກ່ຽວກັບ “ສີສັນ" ຂອງອະດີດແມ່ນສິ່ງສຳຄັນທີ່ສຸດ. ໃນສະພາບປະຫວັດສາດຜ່ານເອກະສານຕ້ອງມີຄວາມຊັດເຈນຂອງໂທນສີ, ອາລົມຈິດຂອງບັນດາບູລຸດປະຫວັດສາດ ລ້ວນແຕ່ຕ້ອງໄດ້ເອົາໃຈໃສ່ ແລະ ດັດປັບຢ່າງລະອຽດລະອໍ. ເພື່ອນ ເຟືອງທາວ, ຢູ່ ຮ່າໂນ້ຍ ແບ່ງປັນວ່າ:
“ເມື່ອໄດ້ຊົມບັນດາວີດີໂອໂດຍ ອ້າຍ ກວາງ ໃສ່ສີ, ຂ້າພະເຈົ້າມີຄວາມຕື້ນຕັນໃຈ ແລະ ຍອດຍິ່ງທີ່ສຸດ. ກ່ອນນີ້, ພວກຂ້າພະເຈົ້າພຽງແຕ່ໄດ້ຮັບຟັງການເລົ່າເລື່ອງກ່ຽວກັບ ປະທານ ໂຮ່ຈີມິນ ຜ່ານບັນດາພາບຖ່າຍເທົ່ານັ້ນ. ເມື່ອໄດ້ຊົມວີດີໂອ, ຂ້າພະເຈົ້າເຫັນ ປະທານ ໂຮ່ຈີມິນ ມີຄວາມໃກ້ຊິດຕິດແທດ, ຊື່ກົງກວ່າ ແລະ ຮູ້ສຶກຄືດັ່ງປະຫວັດສາດພວມປະກົດຢູ່ຕໍ່ໜ້າ”.
ດ້ວຍບັນດາຄວາມມານະພະຍາຍາມຂອງຕົນ, ວຽນຮົ່ງກວາງ ຫວັງວ່າ ຈະປະກອບສ່ວນອັນນ້ອຍໆເຂົ້າໃນສາງເອກະສານປະຫວັດສາດຂອງຊາດ, ເພື່ອປະຫວັດສາດອັນສະຫງ່າລາສີຂອງ ຫວຽດນາມ ຍືນຍົງຄົງຕົວພ້ອມກັບການພັດທະນາຂອງປະເທດຊາດ.
