( ທ່ານນາຍົກລັດຖະມົນຕີ ຫງວຽນເຕີນຢຸງ )
( vov world ) ຕອນເຊົ້າວັນທີ 4 ກຸມພາ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເປັນປະທານກອງປະຊຸມປະຈຳເດືອນມັງກອນຂອງລັດຖະບານ ເພື່ອແນໃສ່ຕີລາຄາສະພາບເສດຖະກິດສັງຄົມໃນເດືອນ ມັງກອນ ແລະ ບຸນປີໃໝ່ປີມະໂຣງ. ຕາມບົດລາຍງານສັງລວບ ແລະ ຄຳຄິດຄຳເຫັນຂອງບັນດາສະມາຊິກລັດຖະບານ ກ່າວຢູ່ທີ່ກອງປະຊຸມໃນຕອນເຊົ້າວັນທີ 4 ກຸມພາ, ໃນອາກາດບຸນປີໃໝ່ປີມະໂຣງ, ສະພາບຄວາມສະຫງົບປອດໄພດ້ານການເມືອງໄດ້ຮັບການຮັກສາໄວຢ່າງໝັ້ນຄົງ, ຄວາມເປັນລະບຽບຮຽບຮ້ອຍທາງສັງຄົມໃນທົ່ວປະເທດໄດ້ຮັກສາໄວ້ໂດຍພື້ນຖານ. ບັນດາຂັ້ນ, ຂະແໜງການເອົາໃຈໃສ່ຊີ້ນຳ ແລະ ຈັດຕັ້ງບຸນປີໃໝ່ປະຈຳຊາດຢ່າງປອດໄພ ແລະ ປະຢັດ. ລາຄາຂອງຕະຫຼາດໃນຍາມບຸນປີໃໝ່ເພີ່ມຂື້ນໜ້ອຍ, ບໍ່ມີສະພາບລາຄາຂື້ນສູງ. ດັດສະນີລາຄາໃຊ້ສອຍໃນເດືອນມັງກອນເພີ່ມຂື້ນພຽງ 1% ແມ່ນລະດັບຕໍ່າສຸດຂອງເດືອນໄກ້ຈະຮອດບຸນປີໃໝ່ປີມະໂຣງໃນ 10 ປີທີ່ຜ່ານມາ. ເຖິງວ່າໃນເດືອນມັງກອນ, ອາກາດໜາວແກ່ຍາວສົ່ງຜົນສະທ້ອນຕໍ່ການຜະລິດກະສິກຳຢູ່ບັນດາແຂວງທາງພາກເໜືອ, ບັນດາວິສາຫະກິດຂະໜາດກາງ ແລະ ໜ້ອຍສືບຕໍ່ປະສົບກັບຄວາມຫຍຸ້ງຍາກຍ້ອນຄວາມຕ້ອງການຊົມໃຊ້ຫຼຸດລົງ, ຄ່າດອກເບ້ຍກູ້ຢືມທຶນຂອງທະນະຄານຍັງສູງຢູ່ … ພ້ອມກັບການສືບຕໍ່ຕີລາຄາສະພາບເສດຖະກິດສັງຄົມໃນເດືອນ ມັງກອນ, ຕອນບ່າຍວັນທີ 4 ກຸມພາ, ບັນດາສະມາຊິກລັດຖະບານໃຫ້ຄຳເຫັນກ່ຽວກັບການສະຫຼຸບການປະຕິບັດລັດຖະທຳມະນູນປີ 1992, ດັດແກ້, ປັບປຸງບາງມາດຕາຂອງກົດໝາຍວ່າດ້ວຍການຄຸ້ມຄອງພາສີອາກອນ ແລະ ດຳລັດຕິແນະນຳປະຕິບັດບາງຂໍ້ມາດຕາຂອງກົດໝາຍວ່າດ້ວຍແຮ່ທາດ.
