 ທ່ານຮອງປະທານປະເທດ ລາວ ຕ້ອນຮັບທ່ານລັດຖະມົນຕີກະຊວງພາຍໃນ ເລຫວີງເຕິນ |
ໃນຂອບເຂດການໄປຢ້ຽມຢາມ ແລະ ເຮັດວຽກຢູ່ລາວ ແຕ່ວັນທີ 3 – 7 ກໍລະກົດ, ຕອນບ່າຍວັນທີ 4 ກໍລະກົດ, ຢູ່ນະຄອນຫຼວງ ວຽງຈັນ, ສປປ ລາວ, ຄະນະຜູ້ແທນກະຊວງພາຍໃນ ຫວຽດນາມ ໂດຍທ່ານລັດຖະມົນຕີ ເລຫວີງເຕິນ, ເປັນຫົວໜ້າຄະນະໄດ້ຮັບການຕ້ອນຮັບຈາກທ່ານນາຍົກລັດຖະມົນຕີລາວ ທອງລຸນ ສີສຸລິດ ແລະ ທ່ານຮອງປະທານປະເທດ ລາວ ພັນຄຳ ວິພາວັນ. ທີ່ການຕ້ອນຮັບ, ທ່ານລັດຖະມົນຕີ ເລຫວີງເຕິນ ໃຫ້ຮູ້ວ່າ: ໃນໄລຍະຈະມາເຖິງ, ການຮ່ວມມືລະຫວ່າງ ຫວຽດນາມ ແລະ ລາວ ມີບັນດາບາດກ້າວພັດທະນາຢ່າງແຮງ, ນັບມື້ນັບກ້າວເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ, ພິເສດແມ່ນມີບັນດາບາດກ້າວບຸກທະລຸໃໝ່ໃນການພົວພັນຮ່ວມມື, ສ້າງກຳລັງໜູນແຫ່ງການພັດທະນາໃນທຸກຂົງເຂດ, ພິເສດແມ່ນການລົງທຶນ, ການຄ້າ, ການຄົມມະນາຄົມຂົນສົ່ງ ແລະ ການສຶກສາ… ຕາມທ່ານລັດຖະມົນຕີ ເລຫວີງເຕິນ ແລ້ວ, ກະຊວງພາຍໃນ ຫວຽດນາມ ໃຫ້ຄຳໝັ້ນສັນຍາມານະພະຍາຍາມຈົນສຸດຄວາມສາມາດເພື່ອຜັນຂະຫຍາຍບັນດາໂຄງການຮ່ວມມືລະຫວ່າງ ຫວຽດນາມ ແລະ ລາວ, ພ້ອມກັບບັນດາເພື່ອນ ລາວ ຮັກສາ, ເສີມຂະຫຍາຍ ແລະ ສືບທອດໃຫ້ຄົນລຸ້ນໃໝ່ກ່ຽວກັບນ້ຳໃຈສາມັກຄີ, ມິດຕະພາບແບບພິເສດ ຫວຽດນາມ - ລາວ, ເພື່ອຄວາມວັດທະນາຖາວອນຂອງປະຊາຊົນແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ຢູ່ໃນໂລກ.
ສ່ວນທ່ານນາຍົກລັດຖະມົນຕີ ລາວ ທອງລຸນ ສີສຸລິດ ແລະ ທ່ານຮອງປະທານປະເທດ ລາວ ພັນຄຳ ວິພາວັນ ກໍ່ໄດ້ເນັ້ນໜັກເຖິງບັນດາບົດຮຽນເຊິ່ງກະຊວງພາຍໃນ ຫວຽດນາມ ແບ່ງປັນກັບກະຊວງພາຍໃນ ລາວ ໄດ້ຊ່ວຍຍົກສູງຄຸນນະພາບໃນການຄຸ້ມຄອງພະນັກງານ, ຜ່ານນັ້ນປະກອບສ່ວນແບ່ງປັນແບກຫາບກັບລັດຖະບານລາວໃນວຽກງານຄຸ້ມຄອງພະນັກງານ; ສະແດງຄວາມປາດຖະໜາຢາກໃຫ້ກະຊວງພາຍໃນ ຫວຽດນາມ ສືບຕໍ່ໜູນຊ່ວຍ ແລະ ຊ່ວຍເຫຼືອກະຊວງພາຍໃນລາວ, ພິເສດແມ່ນໃນການແບ່ງປັນບັນດາບົດຮຽນໃນການຄຸ້ມຄອງລະບົບບໍລິຫານລັດ, ຄຸ້ມຄອງພະນັກງານ, ປັບປຸງກົງຈັກການຈັດຕັ້ງ, ຄຸ້ມຄອງບັນດາທ້ອງຖິ່ນ…; ສະເໜີໃຫ້ກະຊວງພາຍໃນ ຫວຽດນາມ ສືບຕໍ່ໜູນຊ່ວຍຂະແໜງພາຍໃນລາວ ພັດທະນາແຫຼ່ງຊັບພະຍາກອນມະນຸດໃນທຸກດ້ານ, ພິເສດແມ່ນພະນັກງານຂັ້ນເມືອງ.
ກ່ອນໜ້ານັ້ນ, ໃນຕອນເຊົ້າວັນດຽວກັນ, ຄະນະຜູ້ແທນກະຊວງພາຍໃນ ຫວຽດນາມ ໄດ້ເຈລະຈາກັບຄະນະຜູ້ແທນກະຊວງພາຍໃນລາວ ໂດຍທ່ານ ຄຳໝັ້ນ ສູນວິເລີດ ເປັນຫົວໜ້າຄະນະ.
