ການເຈລະຈາຂັ້ນສູງລະຫວ່າງຫວຽດນາມ - Angola
(vovworld) - ຕອນເຊົ້າວັນທີ 15/2, ຢູ່ຮ່າໂນ້ຍ, ທ່ານນາງຮອງປະທານປະເທດຫວຽດນາມ ຫງວຽນທິຢວານ ໄດ້ມີການເຈລະຈາກັບ ທ່ານຮອງປະທານາທິບໍດີ Angola Fernando Dias Dos Santos ທີ່ພວມຢູ່ຢ້ຽມຢາມຫວຽດນາມ. 2 ຝ່າຍໄດ້ເຫັນດີເປັນເອກະສັນນຳກັນຈະຕັ້ງໜ້າຊີ້ນຳບັນດາກະຊວງ, ຂະແໜງການ 2 ປະເທດ ຜັນຂະຫຍາຍບັນດາມາດຕະການລະອຽດໂດຍໄວເພື່ອແນໃສ່ເພີ່ມທະວີການຮ່ວມມືໃນບັນດາຂົງເຂດຈຸດສຸມໂດຍໄວ ແລະ ເປີດກ້ວາງການຮ່ວມມືໃນຂົງເຂດອື່ນໆອີກຈຳນວນໜຶ່ງເຊິ່ງທັງ 2 ຝ່າຍກໍ່ມີຄວາມສາມາດບົ່ມຊ້ອນຄື: ກໍ່ສ້າງ, ຂຸດຄົ້ນບໍ່ແຮ່, ໂທລະຄົມມະນາຄົມ, ຍູ້ແຮງການຜັນຂະຫຍາຍບັນດາສັນຍາ, ຂໍ້ຕົກລົງໃໝ່ ເພື່ອແນໃສ່ສ້າງກອບກົດໝາຍໃຫ້ແກ່ການພົວພັນຮ່ວມມືລະຫວ່າງ 2 ປະເທດ. ພາຍຫຼັງການເຈລະຈາ, ທ່ານນາງຮອງປະທານປະເທດ ຫງວຽນທິຢວານ ແລະ ທ່ານຮອງປະທານາທິບໍດີ Fernando Dias Dos Santos ໄດ້ເປັນສັກຂີພິຍານພິທີລົງນາມເອກະສານ 2 ສະບັບລວມມີ: ອະນຸສັນຍາກ່ຽວກັບການຮ່ວມມືດ້ານເຕັກນິກລະຫວ່າງກະຊວງ ສືກສາ ແລະ ບຳລຸງສ້າງຫວຽດນາມ ແລະ ກະຊວງມະຫາວິທະຍາໄລ, ວິທະຍາສາດ ແລະ ເຕັກໂນໂລຢີ Angola ໃນຂົງເຂດສືກສາຂັ້ນມະຫາວິທະຍາໄລ ແລະ ອະນຸສັນຍາຮ່ວມມືກ່ຽວກັບວັດທະນະທຳລະຫວ່າງກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ແລະ ກະຊວງວັດທະນະທຳ Angola.
