 ກຳລັງທະຫານ ກຳປູເຈຍ ຖອນອອກຈາກ ເຂດເກີດການພິພາດ
ພາບ: internet |
(vovword) - ວັນທີ 18/7, ກຳປູເຈຍ ແລະ ໄທ ເລີ່ມຕົ້ນການຖອນກຳລັງທະຫານອອກຈາກເຂດຊາຍແດນທີ່ເກີດການພິພາດກັນໃນບໍລິເວນມີເນື້ອທີ່ກວ້າງ 4,6 ຕາລາງກິໂລແມັດ ເພື່ອປະຕິບັດຕາມຄຳສັ່ງຂອງສານຍຸດຕິທຳສາກົນ (ICJ) ກ່ອນນີ້ 1 ປີ. ວິວັດທະນາການຖອນກຳລັງທະຫານໄດ້ຮັບການປະຕິບັດພາຍຫລັງການພົບປະລະຫວ່າງ ທ່ານນາຍົກລັດຖະມົນຕີ ກຳປູເຈຍ ສົມເດັດ ຮຸນແຊນ ແລະ ຄູ່ຕຳແຫນ່ງ ນາຍົກລັດຖະມົນຕີໄທ ທ່ານນາງ ຍິ່ງຣັກ ຊີນະວັດ ຢູ່ ທີ່ຊຽມຣຽບ ປະເທດ ກຳປູເຈຍ ໃນວັນທີ 13/7. ຕາມນັ້ນແລ້ວ, ສອງຝ່າຍເຫັນດີ ຈະຈັດແບ່ງກຳລັງທະຫານຢູ່ເຂດປອດການທະຫານຊົ່ວຄາວຢູ່ອ້ອມຂ້າງພະວິຫານ Preah Vihear ຄືນໃຫມ່. ຕອນເຊົ້າວັນທີ 18/7, ກຳປູເຈຍ ໄດ້ຖອນທະຫານ 485 ຄົນ ອອກຈາກເຂດດັ່ງກ່າວ ແທນທີ່ນັ້ນແມ່ນກຳລັງປ້ອງກັນຄວາມສະຫງົບ ຊຶ່ງລວມມີ: 255 ຄົນ, ໃນນັ້ນ ລວມທັງຕຳຫລວດປອ້ງກັນຊາຍແດນ, ຕຳຫລວດປົກປັກຮັກສາມໍລະດົກ ແລະ ຕຳຫລວດທ່ອງທ່ຽວ ພ້ອມກັບຕຳຫລວດເຄື່ອນທີ່ພິເສດເພື່ອປົກປັກຮັກສາພະວິຫານ. ໃນຂະນະນັ້ນ, ຢູ່ເຂດຊາຍແດນຝ່າຍໄທ, ມີຕຳຫລວດລາດຕະເວນຊາຍແດນໄທ 480 ຄົນ ຖືກສົ່ງເຖິງເຂດນີ້ເພື່ອປ່ຽນແທນໃຫ້ກຳລັງທະຫານທີ່ໃກ້ຈະຖືກຖອນອອກຈາກເຂດດັ່ງກ່າວ.
