 ກຳມະກອນຂອງບໍລິສັດຕັດຫຍິບເລກ 10 (ພາບ: qdnd.vn) |
ໃນຈິນຕະນາການທິດສະດີຂອງພັກກອມມູນິດ ຫວຽດນາມ, ຊົນຊັ້ນກຳມະກອນທັນສະໄຫມ ທັງແມ່ນຜະລິດຕະພັນ, ທັງແມ່ນພາກສ່ວນຫລັກຂອງພື້ນຖານການຜະລິດອຸດສາຫະກຳທັນສະໄຫມຕິດພັນກັບບັນດາຜົົນງານດ້ານວິທະຍາສາດເຕັກໂນໂລຊີໃຫມ່ສຸດ, ແຮງງານມີປະສິດທິພາບ, ຄຸນນະພາບສູງ, ມີຄວາມສາມາດເຊື່ອມໂຍງເຂົ້າກັບສາກົນ, ປັບຕົວໃຫ້ແທດເໝາະກັບການປ່ຽນແປງຢ່າງວ່ອງໄວຂອງເຕັກໂນໂລຊີ. ການກໍ່ສ້າງຊົນຊັ້ນກຳມະກອນ ຫວຽດນາມ ທັນສະໄຫມ ນັ້ນແມ່ນຂອດກະກຽມແຫລ່ງຊັບພະຍາກອນມະນຸດໃຫ້ແກ່ໄລຍະຍູ້ແຮງການຫັນເປັນອຸດສາຫະກຳ ແລະ ທັນສະໄຫມ, ຖືວິທະຍາສາດ, ເຕັກໂນໂລຊີ ແລະ ນະວັດຕະກຳເປັນກຳລັງຫນູນພັດທະນາ.
ກຳມະກອນຫວຽດນາມ ພ້ອມແລ້ວທີ່ຈະກ້າວເຂົ້າສູ່ສັງກາດໃຫມ່
15 ປີທີ່ຕິດພັນກັບບໍລິສັດໃຫຍ່ຕັດຫຍິບເລກ 10, ເອື້ອຍ ຟຸ່ງທິແຫ໋ງ, ກຳມະກອນໂຮງງານ ເຊີມີ ຮ່າໂນ້ຍ,ຍາມໃດກໍ່ເປັນຫ່ວງຊອກຫາມາດຕະການເພີ່ມສະມັດຕະພາບແຮງງານ. ດ້ວຍວິວັດການຮ່ຳຮຽນ ແລະ ຝຶກຝົນຫລໍ່ຫລອມຢ່າງບໍ່ຢຸດຢັ້ງ, ມາຮອດປະຈຸບັນ ເອື້ອຍແຫ໋ງ ແມ່ນຫນຶ່ງໃນບັນດາກຳມະກອນບັນລຸສະມັດຕະພາບ ແລະ ມີລາຍຮັບສູງແຖວຫນ້າຂອງໂຮງງານ, ບໍລິສັດເຄີຍໄດ້ສົ່ງເອື້ອຍໄປແຂ່ງຂັນຊ່າງມີສີມືເກັ່ງ, ປະດິດຄິດສ້າງບັນດາຂັ້ນ.
 ເອື້ອຍ ຟຸ່ງທິແຫ໋ງ (ພາບ: VGP) |
“ຂ້າພະເຈົ້າຍາມໃດກໍ່ຄິດວ່າ ຕົນເອງຕ້ອງສັງເກດ ແລະ ຮ່ຳຮຽນທຸກມື້, ເຮັດແນວໃດເພື່ອໃຫ້ສີມືດີກວ່າ, ເຮັດວຽກວ່ອງໄວກວ່າ. ຂັ້ນຕອນໃດມີຜູ້ເຮັດເກັ່ງ, ເຮັດດີກວ່າ ຂ້າພະເຈົ້າເຮັດຕາມ, ຖອດຖອນບົດຮຽນ. ຈາກຊຸມມື້ທຳອິດຜະລິດອອກໄດ້ 200 - 300 ຜະລິດຕະພັນໃນຂັ້ນຕອນທີ່ຂ້າພະເຈົ້າປະຕິບັດ, ຫລັງຈາກນັ້ນ 1 ປີ ຂ້າພະເຈົ້າແມ່ນຜູ້ນຳຫນ້າຫົວຫນ່ວຍ ດ້ວຍສະມັດຕະພາບແມ່ນ 1.400 ຜະລິດຕະພັນ/ມື້, ບັນລຸ 150% ເມື່ອທຽບໃສ່ເພື່ອນຮ່ວມງານ”.
ສ່ວນຢູ່ ບໍລິສັດກົນຈັກ ດ໋າຍຢູງ, ກຳມະກອນ ຟ້າມເຈື່ອງຢາງ ໄດ້ຮູ້ຈັກເຖິງໂດຍແມ່ນໄວຫນຸ່ມທີ່ມີຄວາມເມົາມົວປະດິດຄິດສ້າງ. ຈາກບັນດາວັດຖຸທີ່ບໍ່ໄດ້ໃຊ້ໃນໂຮງຈັກ, ອ້າຍ ຢາງ ເອົາມາປະກອບຕິດຕັ້ງເປັນເຄື່ອງຈັກໃຫມ່, ທັນສະໄຫມ, ຫລຸດຜ່ອນກຳລັງເຫື່ອແຮງໃນການອອກແຮງງານ ແລະ ເພີ່ມສະມັດຕະພາບ.
“ຂ້າພະເຈົ້າເຫັນວ່າ ຜະລິດຕະພັນແມ່ນເຮັດຍາກ, ອ້າຍນ້ອງໃນຫນ່ວຍງານເຮັດວຽກແບບຫຍຸ້ງຍາກທີ່ສຸດ ແຕ່ຜະລິດບໍ່ໄດ້ຜະລິດຕະພັນຫລາຍປານໃດ ແລະ ບໍ່ບັນລຸຄຸນນະພາບທີ່ວາງອອກ ສະນັ້ນ ຂ້າພະເຈົ້າໄດ້ມີຄວາມຄິດວ່າຈະປະດິດສ້າງໃຫ້ໄດ້ເຄື່ອງຈອດແບບເຄິ່ງອັດຕະໂນມັດ. ແທນທີ່ເຮັດດ້ວຍມື, ມື້ຫນຶ່ງ, 4 ຄົນເຮັດໄດ້ 250 ຜະລິດຕະພັນ, ເມື່ອປະກອບເປັນເຄື່ອງຈັກນີ້ ພຽງແຕ່ຕ້ອງການກຳມະກອນຜູ້ຫນຶ່ງ ເຮັດວຽກໃນເວລາ 8 ຊົ່ວໂມງກໍ່ເຮັດໄດ້ 450 ຜະລິດຕະພັນແລ້ວ”.
 ກຳມະກອນ ຟ້າມເຈື່ອງຢາງ (ພາບ: nld.com.vn) |
ເອື້ອຍແຫ໋ງ ແລະ ອ້າຍຢາງ ແມ່ນ 2 ໃນຈຳນວນຫລາຍແບບຢ່າງກຳມະກອນທີ່ມີຫົວຄິດປະດິດສ້າງຢູ່ບັນດາໂຮງຈັກ, ໂຮງງານໃນທົ່ວປະເທດ. ເຂົາເຈົ້າໄດ້ພິສູດໃຫ້ເຫັນວ່າ ກຳມະກອນ ຫວຽດນາມ ປະຈຸບັນ ຍາມໃດກໍ່ຮ່ຳຮຽນ, ຝືກຝົນຫລໍ່ຫລອມຕົນເອງຢ່າງບໍ່ຢຸດຢັ້ງເພື່ອບືນຕົວຂຶ້ນໃຫ້ກາຍເປັນຜູ້ມີຄວາມເປັນເຈົ້າການຕໍ່ຍຸກປະຈຸບັນ, ກາຍເປັນບັນດາຜູ້ເປັນເຈົ້າຂອງວິທະຍາສາດ - ເຕັກໂນໂລຊີ, ດັດປັບເຕັກນິກ, ຜູ້ສະເຫນີຂໍ້ລິເລິ່ມ.
ຜັນຂະຫຍາຍບັນດາໂຄງການຍົກສູງລະດັບຄວາມຮູ້ໃຫ້ແກ່ກຳມະກອນ
ພັກກອມມູນິດ ຫວຽດນາມ ໄດ້ຢັ້ງຢືນ ຊົນຊັ້ນກຳມະກອນ ຫວຽດນາມ ແມ່ນ “ກຳລັງນຳຫນ້າໃນພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ ເພື່ອເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມຍຸຕິທຳ, ປະຊາທິປະໄຕ, ສີວິໄລ”. ທ່ານຮອງສາດສະດາຈານ, ປອ ຫງວຽນອານນິງ, ສະຖາບັນການເມືອງແຫ່ງຊາດ ໂຮ່ຈິມິນ ຖືວ່າ:
“ຊົນຊັ້ນກຳມະກອນ ຕ້ອງບືນຕົວຂຶ້ນດ້ວຍຈິດໃຈຄວາມຮັບຜິດຊອບ, ດ້ວຍພາລະກຳຕໍ່ພັກ, ຕໍ່ປະເທດຊາດ. ແລະສິ່ງສຳຄັນນັ້ນແມ່ນ ຮັກສາ ແລະ ເສີມຂະຫຍາຍທາດແທ້ຊົນຊັ້ນກຳມະກອນຂອງພັກ. ນັ້ນແມ່ນບັນຫາຫລັກ. ເມື່ອໃດທາດແທ້ນັ້ນໄດ້ຮັບການຮັກສາໄວ້, ໄດ້ຮັບການເສີມຂະຫຍາຍ, ຊົນຊົ້ນກຳມະກອນກໍ່ຈະພັດທະນາ ແລະ ການກຳນົດທິດສັງຄົມນິຍົມຂອງ ຫວຽດນາມ ນັບມື້ນັບຈະແຈ້ງ”.
ເພື່ອຕອບສະຫນອງຄວາມຮຽກຮ້ອງຂອງຍຸກສະໄຫມ, ໄລຍະປະຈຸບັນ, ສະຫະພັນໃຫຍ່ແຮງງານ ຫວຽດນາມ ພວມຜັນຂະຫຍາຍບັນດາໂຄງການຍົກສູງລະດັບຄວາມຮູ້ໃຫ້ແກ່ກຳມະກອນ. ໃນແຜນການບຳລຸງສ້າງພະນັກງານປີ 2025, ມີສຳມະນາກອນກວ່າ 12.000 ເທື່ອຄົນໄດ້ເຂົ້າຮ່ວມບັນດາຊຸດບຳລຸງສ້າງດ້ານທັກສະ, ທິດສະດີ, ພາສາຕ່າງປະເທດ, ກົດໝາຍ, ການເງິນ... ໂຄງການເພື່ອແນໃສ່ຍົກສູງທັກສະຮອບດ້ານໃຫ້ແກ່ກຳມະກອນ, ເພື່ອໃຫ້ເຂົາເຈົ້າບໍ່ພຽງແຕ່ເກັ່ງໃນອາຊີບເທົ່ານັ້ນ ຫາກຍັງມີຄວາມເຂົ້າໃຈກ່ຽວກັບກົດໝາຍ, ມີທັກສະໃນການດຳລົງຊີວິດ, ສາມາດເປັນເຈົ້າໃນຊີວິດຂອງຕົນອີກດ້ວຍ.
ສະພາບຕົວຈິງປະຈຸບັນສະແດງໃຫ້ເຫັນວ່າ ກຳລັງແຮງງານຍຸກສະໄຫມໃຫມ່ຢູ່ ຫວຽດນາມ ພວມນັບມື້ນັບມີຄວາມເປັນເຈົ້າການກວ່າ, ພ້ອມແລ້ວທີ່ຈະຝືກຝົນຫລໍ່ຫລອມ ແລະ ຮ່ຳຮຽນບັນດາຄວາມຮູ້, ທັກສະໃຫມ່ໃນການອອກແຮງງານ, ການຜະລິດ. ພ້ອມກັນນັ້ນ ເຂົາເຈົ້າຍັງມີຄວາມຄາດຫວັງໃຫຍ່ກວ່າ ເພື່ອປະກອບສ່ວນເຂົ້າໃນການເຕີບໃຫຍ່ຂອງອົງການ, ຫົວຫນ່ວຍ, ວິສາຫະກິດກໍ່ຄືວິວັດທະນາການພັດທະນາຂອງປະເທດຊາດໃນສັງກາດໃຫມ່.
HET
