(VOVWORLD) - ຕອນເຊົ້າວັນທີ 18 ມິຖຸນາ, ທີ່ຮ່າໂນ້ຍ, ໄດ້ດຳເນີນກອງປະຊຸມສົນທະນາກ່ຽວກັບທະເລຄັ້ງທີ 5 ດ້ວຍຫົວຂໍ້ທີ່ວ່າ “ການຮ່ວມມື ອາຊຽນ ໃນບັນຫາທະເລຕາເວັນອອກ” ໂດຍສະຖາບັນການຕ່າງປະເທດສົມທົບກັບກອງທຶນ Konrad-Adenauer Stiftung (KAS) ຂອງ ເຢຍລະມັນ ແລະ ສະຖານທູດ ອົດສະຕາລີ ປະຈຳ ຫວຽດນາມ ຈັດຕັ້ງ.
ກອງປະຊຸມສົນທະນາກ່ຽວກັບທະເລຄັ້ງທີ 5 ໄດ້ດຶງດູດການເຂົ້າຮ່ວມຂອງແຂກຖືກເຊີນກ່ວາ 70 ທ່ານເຊິ່ງແມ່ນຜູ້ຕາງໜ້າຂອງບັນດາອົງການຈັດຕັ້ງ, ກະຊວງການຕ່າງປະເທດ, ອົງການທຸຕານຸທູດ, ບັນດາກະຊວງ, ຂະແໜງການທີ່ກ່ຽວຂ້ອງ ພ້ອມກັບບັນດານັກຮຽນຮູ້ ແລະ ຜູ້ແທນສາກົນເພື່ອແລກປ່ຽນກ່ຽວກັບບັນດາມາດຕະການ ແນໃສ່ຊຸກຍູ້ບົດບາດໃຈກາງຂອງ ອາຊຽນ ກ່ວາອີກ ກໍ່ຄືການຮ່ວມມືລະຫວ່າງບັນດາສະມາຊິກໃນກຸ່ມໃນບັນຫາທະເລຕາເວັນອອກ.
 ກອງປະຊຸມສົນທະນາກ່ຽວກັບທະເລຄັ້ງທີ 5 |
ກ່າວຄຳເຫັນໄຂກອງປະຊຸມເຈລະຈາ, ທ່ານ Peter Girke ຫົວໜ້າກອງທຶນ KAS ຂອງ ເຢຍລະມັນ ຢູ່ ຫວຽດນາມ ໃຫ້ຮູ້ວ່າ:
“ອາຊຽນ ຍັງຄົງມານະພະຍາຍາມຮັກສາ ແລະ ຢືນຢັນຄວາມປາດຖະໜາຢາກສວມບົດບາດເປັນໃຈກາງໃນບັນດາບັນຫາພາກພື້ນ. ກອງປະຊຸມເຈລະຈາຄັ້ງນີ້ ຈະປຶກສາຫາລືບບັນດາບັນຫາເຄັ່ງຮ້ອນທີ່ກ່ຽວຂ້ອງເຖິງພາກພື້ນຄື: ສົງຄາມການຄ້າ ອາເມລິກາ - ຈີນ ແລະ ວິທີການເພື່ອໃຫ້ ອາຊຽນ ອາດຈະສ້າງ ແລະ ຢັ້ງຢືນທີ່ຕັ້ງໃນການປະທະກັນນັ້ນເປັນຮູບປະທຳ… ຂ້າພະເຈົ້າເຊື່ອໝັ້ນວ່າ ຫວຽດນາມ ຈະປະກອບສ່ວນເຂົ້າໃນສັນຕິພາບ, ຄວາມໝັ້ນຄົງສາກົນ ແລະ ບັນຫາທະເລຕາເວັນອອກ ກໍ່ແມ່ນເນື້ອໃນບຸລິມະສິດ.”
ໃນຂອບເຂດກອງປະຊຸມສົນທະນາ, ບັນດາຜູ້ແທນກໍໄດ້ປຶກສາຫາລື ແລະ ຍົກອອກບັນດາວິທີການ ຊ່ວຍສ້າງບັນດາບຸລິມະສິດເປັນຮູບປະທຳ, ກຳນົດຈຸດລວມ, ສ້າງຄວາມໄວ້ເນື້ຶ້ອເຊື່ອໃຈລະຫວ່າງບັນດາປະເທດ ອາຊຽນ ເພື່ອແກ້ໄຂບັນດາບັນຫາທີ່ມີລັກສະນະສະດຸ້ງໄວຢູ່ທະເລຕາເວັນອອກ, ພິເສດແມ່ນບັນດາບັນຫາສິ່ງແວດລ້ອມເສື່ອມໂຊມ, ແຫຼ່ງຊັບພະຍາກອນປາໝົດກ້ຽງ.
