ກອງປະຊຸມດັ່ງກ່າວ ຈະປຶກສາຫາລືກ່ຽວກັບການເພີ່ມທະວີບັນດາຄວາມມານະພະຍາຍາມລວມ ແນໃສ່ສະກັດກັ້ນການແຜ່ລະບາດຂອງໂລກລະບາດໂຄວິດ - 19 ນອກຈາກ ບັນດາມາດຕະການແຮງກວ່າ ເຊິ່ງແຕ່ລະປະເທດສະມາຊິກພວມຜັນຂະຫຍາຍ. ຕາມແຜນການແລ້ວ, ຄາດວ່າ ບັນດາການນໍາ ອາຊຽນ ຈະປຶກສາຫາລືໃນຕອນເຊົ້າ ສ່ວນຢູ່ທີ່ວາລະປະຊຸມຂອງຕອນບ່າຍ, ບັນດາການນໍາຂອງກຸ່ມ ຈະປະຊຸມກັບການນໍາ 3 ປະເທດ ອາຊີຕາເວັນອອກ ສ.ເກົາຫຼີ, ຈີນ ແລະ ຍີ່ປຸ່ນ.
ພາຍຫຼັງເຂົ້າຮ່ວມກອງປະຊຸມສະພາປະສານງານ ອາຊຽນ ຄັ້ງທີ 25, ວັນທີ 10 ເມສາ ຜ່ານມາ, ທ່ານລັດຖະມົນຕີການຕ່າງປະເທດ ໄທ ດອນ ປະມັດວິໄນ ໃຫ້ຮູ້ວ່າ ລັດຖະມົນຕີການຕ່າງປະເທດຂອງບັນດາປະເທດສະມາຊິກທັງໝົດ ໄດ້ເຫັນດີສ້າງຕັ້ງກອງທຶນຮັບມືກັບໂລກລະບາດໂຄວິດ - 19 ຂອງ ອາຊຽນ ແນໃສ່ສະກັດກັ້ນໂລກລະບາດໂຄວິດ - 19.
