( vovworld ) - ຕອນຄໍ່າວັນທີ 3/3, ທ່ານປະທານສະພາສູງຈີເລ, Guido Girardin Lavin ແລະ ພັນລະຍາເດີນທາງອອກຈາກນະຄອນຫຼວງຮ່າໂນ້ຍ, ສິ້ນສຸດການຢ້ຽມຢາມຫວຽດນາມ ຢ່າງເປັນທາງການ. ໃນເວລາຢູ່ຢ້ຽມຢາມຫວຽດນາມ ( ແຕ່ວັນທີ 27/2 - 3/3 ), ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ໃຫ້ການຕ້ອນຮັບ, ຈັດງານລ້ຽງ ແລະ ພົບປະເຈລະຈາກັບທ່ານປະທານສະພາສູງ Guido Girardin Lavin, ທ່ານປະທານສະພາສູງ Guido Girardin Lavin ກໍ່ເຂົ້າຢ້ຽມຄຳນັບທ່ານເລຂາທິການໃຫຍ່ ຫງວຽນຟຸ໋ຈ້ອງ, ທ່ານປະທານປະເທດ ເຈືອງເຕີນຊາງ, ເຮັດວຽກກັບບັນດາກະຊວງ, ຂະແໜງການຂອງຫວຽດນາມ ແລະ ໄປຢ້ຽມຢາມທ້ອງຖິ່ນຕ່າງໆ.
ໃນຂອບເຂດການຢ້ຽມຢາມ, ທ່ານປະທານສະພາສູງ Guido Girardin Lavin ແລະ ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ລົງນາມໃນຂໍ້ຕົກລົງຮ່ວມມືລະຫວ່າງສະພາແຫ່ງຊາດຫວຽດນາມ ແລະ ສະພາສູງຈີເລ. ນີ້ແມ່ນເອກະສານທີ່ສຳຄັນ, ສ້າງກອບກົດໝາຍໃຫ້ແກ່ການພົວພັນລະຫວ່າງສອງຝ່າຍໃຫ້ກ້າວເຂົ້າສູ່ລວງເລິກ ແລະ ແທດຈິງກວ່າ, ຜ່ານນັ້ນປະກອບສ່ວນເພີ່ມທະວີສາຍພົວພັນມິດຕະພາບ ແລະ ການຮ່ວມມືຢ່າງຮອບດ້ານລະຫວ່າງສອງປະເທດຫວຽດນາມ - ຈີເລ. ຢູ່ທີ່ບັນດາການພົບປະເຈລະຈາ, ທ່ານປະທານສະພາສູງຈີເລ ລ້ວນແຕ່ໄດ້ຮັບການຕີລາຄາສູງຈາກບັນດາການນຳພັກ, ລັດ, ສະພາແຫ່ງຊາດ ກ່ຽວກັບການຢ້ຽມຢາມຫວຽດນາມ; ເຊື້ອໝັ້ນວ່າ, ການຢ້ຽມຢາມຄັ້ງນີ້ຈະແມ່ນຂີດໝາຍໃໝ່ໃນການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງສະພາແຫ່ງຊາດສອງປະເທດ, ພ້ອມກັນນັ້ນກໍເປີດແງ່ຫວັງຮ່ວມມືສອງຝ່າຍກໍ່ຄືການຮ່ວມມືໃນພາກພື້ນ ແລະ ໃນໂລກ.
