(vovworld) - ວັນທີ 8/2, ກ່າວຄຳເຫັນທີ່ການເຮັດວຽກກັບການນຳແຂວງ ນີນບີ່ນ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ໄດ້ສະເຫນີແຂວງ ນີນບີ່ນ ສືບຕໍ່ປະຕິບັດມະຕິຂອງລັດຖະບານກ່ຽວກັບບັນດາມາດຕະການຕົ້ນຕໍ ເພື່ອສຸມໃສ່ຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັບປະກັນຊີວິດສັງຄົມ. ແຂວງ ນີນບີ່ນ ຄວນສຸມໃສ່ນຳຄວາມກ້າວຫນ້າດ້ານວິທະຍາສາດເຂົ້າໃນການຜະລິດກະສິກຳ ສົມທົບກັບການປຸງແຕ່ງ, ຫຸ້ມຫໍ່ຜະລິດຕະພັນຢູ່ກັບທີ່ເພື່ອສົ່ງໄປຈຳຫນ່າຍຢູ່ທ້ອງຕະຫລາດ, ຍູ້ແຮງການຄົ້ນຄ້ວາ, ເລືອກເຟັ້ນບັນດາແນວພັນເຂົ້າທີ່ມີຄຸນນະພາບສູງ, ນຳແນວພັນພືດອື່ນເຂົ້າການຜະລິດກະເສດສຸມ, ສ້າງບັນດາທົ່ງນາທີ່ມີຜະລິດຕະພັນກະເສດສູງ. ບັນດາຮາກຖານການຜະລິດອຸດສາຫະກຳໃຫຍ່ຢູ່ບໍລິເວນຄື: ຊີມັງ, ຝຸ່ນອາຊົດ ແລະ ພິເສດແມ່ນໂຄງການກໍ່ສ້າງໂຮງງານຫລອມເຫລັກກ້າທີ່ມີຄຸນນະພາບສູງ ຈະມູ້ງໄປເຖິງອຸດສາຫະກຳ ຂຽວ ແລະ ສະອາດກວ່າ. ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ກໍເນັ້ນຫນັກວ່າ ເລື່ອງແຂວງ ນີນບີ່ນຕ້ອງສ້າງຈຸດພົ້ນເດັ່ນຫລາຍຢ່າງອີກ ເພື່ອກາຍເປັນເຂດຈຸດສຸມກ່ຽວກັບການທ່ອງທ່ຽວ. ທ່ານຮອງນາຍົກລັດຖະມົນຕີ ມີຄວາມເຊື່ອໝັ້ນວ່າ ດ້ວຍທິວທັດທຳມະຊາດທີ່ສວຍງາມ ແລະ ດູດດື່ມ ພ້ອມກັບຄຸນນະພາບການທ່ອງທ່ຽວເປັນຢ່າງດີ ແລະ ເຕັກໂນໂລຊີສື່ສານທັນສະໄຫມນັ້ນ ຄາດໝາຍຮອດປີ 2015 ແຂວງນີນບີ່ນ ຈະຕ້ອນຮັບນັກທ່ອງທ່ຽວ 6 ລ້ານເທື່ອຄົນ ແມ່ນສາມາດປະຕິບັດໄດ້./.
