ພາລະກຳຂອງທູດພິເສດ Kofi Annan ແມ່ນກາລະໂອກາດສຸດທ້າຍໃຫ້ຊີຣີ
(vovworld) - ວັນທີ 25/3, ທ່ານປະທານາທິບໍດີລັດເຊຍ Dmitry Medvedev ໄດ້ສະແດງການສະໜັບສະໜູນຢ່າງແຮງຕໍພາລະກຳຂອງທູດພິເສດສະຫະປະຊາຊາດ ແລະ ສະຫະພາບອາຣັບ (ຫຼື AL) ທ່ານ Kofi Annan, ພ້ອມທັງເນັ້ນໜັກວ່າ ພາລະກຳຂອງທ່ານ Annan ອາດຈະແມ່ນ ”ກາລະໂອກາດສຸດທ້າຍ” ເພື່ອໃຫ້ຊີຣີ ສະກັດກັ້ນສົງຄາມກາງເມືອງທີ່ນອງເລືອດ. ໃນຂະນະນັ້ນ, ທ່ານ Kofi Annan ຖືວ່າ: ຊີຣີມີໂອກາດເພື່ອຮ່ວມມື ແລະ ໄກ່ເກ່ຍເພື່ອແນໃສ່ຢຸດຕິການປະທະກັນລະຫວ່າງຝ່າຍຕ່າງໆ. ທ່ານ Kofi Annan ກໍ່ສະແດງຄວາມຫວັງວ່າ ລັດເຊຍ ສືບຕໍ່ສວມບົດບາດຕັ້ງໜ້າໃນການຮັບປະກັນບັນດາຝ່າຍຢູ່ຊີຣີ ປະຕິບັດຂໍ້ລິເລີ່ມສັນຕິພາບທີ່ສະພາຄວາມໝັ້ນຄົງສະຫະປະຊາຊາດສະໜັບສະໜູນ. ຂໍ້ລິເລີ່ມສັນຕິພາບຂອງສະພາຄວາມໝັ້ນຄົງສະຫະປະຊາຊາດ ຮຽກຮ້ອງປະທານາທິບໍດີ ຊີຣີ Bashar Al Assad ຖອນບັນດາກຳລັງລັດຖະບານອອກຈາກບັນດານະຄອນເປັນຈຸດຮ້ອນກ່ຽວກັບການແຫ່ຂະບວນປະທ້ວງ, ພ້ອມທັງອະນຸຍາດດຳເນີນບັນດາການເຄື່ອນໄຫວຊ່ວຍເຫຼືອມະນູດສະທຳໃຫ້ແກ່ປະຊາຊົນນັບໝື່ນໆຄົນທີ່ພວມຮັບເຄາະຮ້າຍຢູ່ບັນດານະຄອນນີ້. ຂໍ້ລິເລີ່ມຮຽກຮ້ອງໃຫ້ມອບໂອນແກ່ລັດຖະບານມີລັກສະນະເປັນຕົວແທນສູງກ່ວາ, ແຕ່ວ່າບົດບາດຂອງທ່ານ Assad ຍັງບໍ່ທັນເປັນຈະແຈ້ງເທື່ອ.
