(VOVWORLD) - ລະດູເຂົ້າສຸກ, ສີເຫຼືອງອາລ່າມພວມປົກຄຸມໄປທົ່ວເຂດເນີນພູ ອີຕີ, ອັນໄດ້ດຶງດູດແຂກທ່ອງທ່ຽວນັບພັນໆຄົນມາທ່ຽວຊົມ
 |
| ໃນຊຸມວັນຕົ້ນເດືອນກັນຍາ, ທີ່ ອີຕີ ຢູ່ແຂວງ ລາວກາຍ ຂອງ ຫວຽດນາມ ເໝືອນວ່າພວມກ້າວເຂົ້າສູ່ເທດສະການໃຫຍ່ຂອງທຳມະຊາດ. ໂດຍຢູ່ລະດັບຄວາມສູງເກືອບ 2.000 ແມັດ ເມື່ອທຽບກັບໜ້ານ້ຳທະເລ, ອີຕີ ພວມໄດ້ປົກຄຸມໄປດ້ວຍສີເຫຼືອງອາລ່າມຂອງລະດູເຂົ້າສຸກເຫຼືອງ. |
 |
| ຈາກທົ່ວທຸກເສັ້ນທາງ, ຝູງຄົນຫຼັ່ງໄຫຼກັນມາບ່ອນທີ່ໄດ້ຮັບຂະໜານນາມວ່າ “ສະຫວັນນາຂັ້ນໄດງາມທີ່ສຸດຢູ່ ເຕິຍບັກ”, ເພື່ອຮັບຊົມທັດສະນີຍະພາບທີ່ຫາຍາກ ເຊິ່ງທຳມະຊາດ ແລະ ດ້ວຍມືຂອງມະນຸດໄດ້ສ້າງຂຶ້ນ. |
 |
| ຈາກຄ້ອຍ ງ໋າຍເທົ່າ ຫຼື ບ້ານ ຈວ້ານແທ່ນ ເບິ່ງລົງມາ, ບັນດາຕອນນາຂັ້ນໄດໄດ້ເກາະກ່າຍກັນລົງໄປຕາມເປີ້ນພູຕ່າງໆ. |
 |
| ຍາມເຊົ້າ ແສງແດດສ່ອງຜ່ານສາຍໝອກ, ອັນໄດ້ສ້າງເປັນທັດສະນີພະຍາບທັງໃຫຍ່ໂຕມະໂຫຖານ ທັງຄືດັ່ງໃນຝັນ. |
 |
| ນີ້ແມ່ນສິ່ງທີ່ເຮັດໃຫ້ແຂກທ່ອງທ່ຽວພ້ອມທີ່ຈະຜ່ານຜ່າເສັ້ນທາງອັນຍາວໄກ ເພື່ອໄດ້ຮັບຊົມຄວາມງາມທີ່ມະຫັດສະຈັນນັ້ນກັບຕາ. |
 |
 |
| ເມື່ອທຽບໃສ່ຊຸມປີກ່ອນໆ, ປັດຈຸບັນ, ເສັ້ນທາງເຂົ້າ ອີຕີ ກໍສະດວກກວ່າຫຼາຍແລ້ວ, ລົດໃຫຍ່ໂອໂຕ ກໍສາມາດເຂົ້າຮອດໃຈກາງຕາແສງ, ຄວາມລຳບາກຂອງແຂກທ່ອງທ່ຽວກໍໄຄກວ່າຫຼາຍ. ບັນດາ ໂຮມສະເຕ ກໍໄດ້ຮັບການລົງທຶນໃຫຍ່ໂຕ ແລະ ງາມຕາກວ່າ ເພື່ອຕອບສະໜອງຄວາມຕ້ອງການພັກຜ່ອນ, ຊິມບັນດາເຍື່ອງອາຫານຢູ່ທ້ອງຖິ່ນ. ດັ່ງນັ້ນ, ລະດູເຂົ້າສຸກເຫຼືອງຢູ່ ອີຕີ ໄດ້ກາຍເປັນຈຸດນັດພົບທີ່ບໍ່ຄວນພາດສຳລັບຄົນລຸ້ນໜຸ່ມທີ່ມັກຮັກການທ່ອງທ່ຽວແບບຄົ້ນຫາ. |
 |
| ຕາມບັນດາຜູ້ມີປະສົບການ, ໄລຍະເວລາທ້າຍເດືອນ ສິງຫາ ຮອດ ກາງເດືອນ ກັນຍາ ແມ່ນໄລຍະເວລາງາມທີ່ສຸດເພື່ອທ່ຽວຊົມ ອີຕີ ໃນລະດູເຂົ້າສຸກເຫຼືອງ. |
 |
| ພຽງແຕ່ອີກ 2 – 3 ອາທິດ, ລະດູເກັບກ່ຽວກໍກ້ຽວເຂົ້າມາແລ້ວ, ທັດສະນີຍະພາບຢູ່ທີ່ນີ້ກໍຈະປ່ຽນສີສັນໃໝ່. ດັ່ງນັ້ນ, ແຂກທ່ອງທ່ຽວຄວນຍາດເວລາໄປທ່ຽວຊົມໃນໄວໆນີ້ ຈຶ່ງຈະທັນເກັບພາບບັນຍາກາດລະດູເຂົ້າສຸກເຫຼືອງ ທີ່ຫາຍາກໃນປີໄວ້ໄດ້. |
