ຖ້າເລົ່າເລື່ອງລາວກ່ຽວກັບນັກຮົບອາສາສະໝັກ ຫວຽດນາມ ຢູ່ ລາວ, ຄວາມສາມັກຄີໃນການຮ່ວມສຳພັນສູ້ຮົບລະຫວ່າງ ຫວຽດນາມ - ລາວ ແມ່ນບໍ່ມີວັນສິ້ນສຸດ. ບັນດາເລື່ອງລາວເຫຼົ່ານັ້ນ ໄດ້ປະກອບສ່ວນສ້າງເປັນໜ້າປະຫວັດສາດອັນສະຫງ່າລາສີ ແລະ ມູນເຊື້ອສາຍພົວພັນໄມຕີຈິດມິດຕະພາບອັນຍິ່ງໃຫຍ່ລະຫວ່າງປະຊາຊົນສອງປະເທດ. ເນື່ອງໃນໂອກາດສະເຫຼີມສະຫຼອງວັນມູນເຊື້ອນັກຮົບອາສາສະໝັກ ແລະ ນັກຊ່ຽວຊານ ຫວຽດນາມ ຊ່ວຍເຫຼືອ ລາວ ຄົບຮອບ 72 ປີ ຄືວັນທີ 30/10/1949 – 30/10/2021, ພວກຂ້າພະເຈົ້າຂໍແນະນຳມາຍັງທ່ານຜູ້ຟັງ, ຜູ້ອ່ານທຸກໆທ່ານ ທະຫານດັກກົງດ້ວຍຜົນງານທີ່ດັງກ້ອງກັງວານຢູ່ທົ່ງໄຫຫີນ ຊຽງຂວາງ ສະໄໝຕ້ານຈັກກະພັດ ອາເມລິກາ - ນັກວິລະຊົນ ຟ້າມມິງຢ໊າມ ຜູ້ດຽວທີ່ໄດ້ຕີປະລາໄຊສັດຕູທັງກອງຮ້ອຍ. ນັກວິລະຊົນທ່ານນີ້ ໄດ້ຮັບນາມມະຍົດ ນັກຮົບວິລະຊົນກຳລັງປະກອບອາວຸດປະຊາຊົນ ຈາກປະທານປະເທດ ຫວຽດນາມ ເມື່ອປີ 2018.

“ຖານທີ່ໝັ້ນ 1433 ແມ່ນສະຖານທີ່ທີ່ຫວາດສຽວຫຼາຍ, ມັນເປັນພູຜາຫີນທີ່ສູງຊັນ, ຕ້ອງປີນຂັ້ນໄດໄມ້ໄຜ່ ຈຶ່ງຂຶ້ນໄປໄດ້. ປີກໂຈມຕີຂຶ້ນໄປ 3 ຄົນ, ແຕ່ມີສອງຄົນເສຍຊີວິດ, ຍັງເຫຼືອແຕ່ ສະຫາຍຢ໊າມ ຄົນດຽວທີ່ຕີປະລາໄຊສັດຕູທັງກອງຮ້ອຍ. ຫຼັງຈາກນັ້ນ, ສະຫາຍໄດ້ສົ່ງສົບຂອງເພື່ອນຮ່ວມກົມກອງສອງຄົນນັ້ນລົງຕີນພູແລ້ວນຳໄປຝັງ. ຊຸມປີມໍ່ໆມານີ້, ສະຫາຍເອງເປັນຜູ້ທີ່ກັບມາສະໜາມຮົບແຫ່ງດັ່ງຫ່າວ ແລ້ວນຳເອົາອັດຖິຂອງສອງສະຫາຍຮ່ວມກົມກອງນັ້ນ ກັບເມືອບ້ານເກີດເມືອງນອນ. ຖ້າຫາກວ່າ ບໍ່ມີສະຫາຍຢ໊າມ ອັດຖິຂອງເພື່ອນຮ່ວມກົມກອງສອງຄົນນັ້ນກໍຊອກບໍ່ເຫັນ”.

ນັ້ນແມ່ນຄຳແບ່ງປັນຂອງນັກຮົບເກົ່າ ບຸ່ຍມິງເຊີນ ກ່ຽວກັບເພື່ອນຮ່ວມກົມກອງຂອງຕົນ - ນັກຮົບວິລະຊົນ ຟ້າມມິງຢ໊າມ, ຫົວໜ້າໝວດກອງຮ້ອຍດັກກົງ c24, ກອງພັນໃຫຍ່ 866 ດ້ວຍຜົນງານອັນເລີດລ້ຳລືຊາ ຄົນດຽວຕີປະລາໄຊກອງຮ້ອຍສັດຕູຢູ່ ຖານທີ່ໝັ້ນ 1433. ນີ້ແມ່ນໜຶ່ງໃນບັນດາບັ້ນຕໍ່ສູ້ຫຼັກແຫຼ່ງແກ່ນສານຂອງບັ້ນຮົບ Z (12/1971 – 4/1972) ເພື່ອແນໃສ່ສ້າງເງື່ອນໄຂສະດວກ ແລະ ເປີດຊ່ອງທາງໃໝ່ບຸກໂຈມຕີເຂົ້າຖານທີ່ໝັ້ນ ລອງແຈ້ງ - ເມືອງເອກຂອງສັດຕູ ເຊິ່ງເປັນບ່ອນທີ່ສັດຕູຍາມໃດກໍຖືວ່າ “ເຂດດິນແດນທີ່ສັກສິດບໍ່ສາມາດແຕະຕ້ອງໄດ້, ທະຫານ ຫວຽດນາມ ບໍ່ສາມາດບຸກໂຈມຕີເຂົ້າໄດ້”. ນີ້ກໍແມ່ນໜຶ່ງໃນບັນດາບັ້ນຮົບ ເຊິ່ງນັກຮົບວິລະຊົນ ຟ້າມມິງຢ໊າມ ບັນລຸໄດ້ຜົນງານທີ່ພົ້ນເດັ່ນ.

ນັກວິລະຊົນຟ້າມມິງຢ໊າມຜູ້ດຽວທີ່ໄດ້ຕີປະລາໄຊສັດຕູທັງກອງຮ້ອຍ (ພາບເອກະສານ)

“ຂ້າພະເຈົ້າໄດ້ເຂົ້າຮ່ວມ 4 – 5 ບັ້ນຮົບແລ້ວ, ໃນນັ້ນ ບັ້ນຮົບ Z ແມ່ນບັ້ນຮົບທີ່ໄດ້ສ້າງຄວາມປະທັບໃຈ ແລະ ພົ້ນເດັ່ນທີ່ສຸດ. ບັ້ນຮົບນີ້ ມີຄວາມສຳຄັນຫຼາຍ ແລະ ຖານທີ່ໝັ້ນເຊິ່ງ ພວກຂ້າພະເຈົ້າຮັບຜິດຊອບແມ່ນບັ້ນຕໍ່ສູ້ແກ່ນສານ - ຖານທີ່ໝັ້ນ 1433. ເມື່ອກ້າວຂຶ້ນເງີບຫີນຢູ່ກາງຟ້າ, ມີລົມພັດມາຢ່າງແຮງ, ອາກາດໜາວຫຼາຍ, ຂ້າພະເຈົ້າເບິ່ງທ້ອງຟ້າທີ່ມີໝອກຂາວປົກຄຸມໄປທົ່ວຈົນເຮັດໃຫ້ພວກຂ້າພະເຈົ້າຫ່າງກັນແຕ່ 3 ແມັດ ແຕ່ກໍບໍ່ເຫັນກັນເລີຍ. ຂ້າພະເຈົ້າຄິດວ່າ ການບຸກໂຈມຕີຄັ້ງນີ້ ທີໜຶ່ງແມ່ນຕ້ອງຍາດໄດ້ໄຊຊະນະ, ທີສອງແມ່ນບໍ່ມີວັນກັບຄືນເມືອເລີຍ. ກອງຮ້ອຍຂອງສັດຕູມີເຖິງ 52 ຄົນ, ແຕ່ພວກຂ້າພະເຈົ້າມີແຕ່ 6 ຄົນ. ເຖິງວ່າແມ່ນເຂດນ້ອຍໆກໍຕາມ ແຕ່ເປັນສະຖານທີ່ທຸລະກັນດານອັນຕະລາຍທີ່ສຸດ. ສະນັ້ນ ພວກສັດຕູຈຶ່ງທ້າທັງກອງພັນໃຫຍ່ 2000 ຄົນ ເພາະວ່າມັນແມ່ນພູມີສັນຖານພຽງໜຶ່ງດຽວ”.

ຖານທີ່ໝັ້ນ 1433 ແມ່ນສະຖານີບັນຊາເຮືອບິນຖີ້ມລູກລະເບີດໃສ່ເປົ້າໝາຍຕ່າງໆຢູ່ເຂດທົ່ງໄຫຫີນ ຊຽງຂວາງ ທັງແມ່ນບ່ອນເວນຍາມ ອີກດ້ວຍ. ປະຈຳການຢູ່ທີ່ນີ້ ມີກອງຮ້ອຍທະຫານສືບສວນພິເສດຂອງ ວາງປາວ ແລະ ມີເຮືອບິນແຮລີກອບເຕີລຳລຽງສະບຽງອາຫານ, ອາວຸດຍຸດໂທປະກອນທີ່ທັນສະໄໝເປັນປະຈຳ ແລະ ໄດ້ຮັບການປ້ອງກັນຢ່າງລະມັດລະວັງທີ່ສຸດ, ຍາກທີ່ຈະເຂົ້າໄປໃກ້ໄດ້. ເພາະສະນັ້ນ, ປີກບຸກໂຈມຕີມີທັງໝົດ 6 ຄົນ ແຕ່ມີແຕ່ ທ່ານ ຢ໊າມ ກັບເພື່ອນຮ່ວມກົມກອງ 2 ຄົນ ລຸຍເຂົ້າບ່ອນລີ້ຊ້ອນຂອງສັດຕູໄດ້. ເຖິງວ່າຖືກຂາດຂັ້ນໃນທຸກດ້ານ, ແຕ່ດ້ວຍຈິດໃຈແຂງແກ່ນປານເຫຼັກກ້າ ພ້ອມດ້ວຍປືນ AK ໜຶ່ງກະບອກ, ໝາກຟາດັກກົງ 16 ໜ່ວຍ, ໝາກແຕກ 4 ໜ່ວຍ, ທ່ານ ຢ໊າມ ພ້ອມດ້ວຍໝູ່ຮ່ວມກົມກອງຍັງຕັດສິນໃຈລຸຍຂຶ້ນລົບລ້າງຖານທີ່ໝັ້ນແຫ່ງນີ້.

ວິລະຊົນ ຟ້າມມິງຢ໊າມ ເລົ່າຄືນບັ້ນຕໍ່ສູ້ສູ່ນັກຂ່າວ VOV

“ເມື່ອພວກຂ້າພະເຈົ້າຍິງປືນບຸກໂຈມຕີແລ້ວ, ສະຖານທີ່ແຫ່ງນີ້ ບໍ່ແມ່ນຖານທີ່ໝັ້ນທີ່ມິດງຽບຄືກ່ອນແລ້ວ ຫາກໝາກແຕກໝາກຟາລະເບີດຫຼາຍຈົນແຈ້ງສະຫວ່າງທົ່ວທ້ອງຟ້າ. ເມື່ອຂ້າພະເຈົ້າຕີສຳເລັດປີກຂອງຕົນແລ້ວ ຈຶ່ງໄປຫາໝູ່ ແຕ່ເຫັນໝູ່ທັງສອງຄົນເສຍສະຫຼະຊີວິດແລ້ວ. ຕອນນັ້ນ ຍັງເຫຼືອແຕ່ຂ້າພະເຈົ້າຄົນດຽວເທົ່ານັ້ນ ແຕ່ສັດຕູຢູ່ທາງລຸ່ມຍັງຖີ້ມລະເບີດບຸກໂຈມຕີໂດຍບໍ່ຢຸດບໍ່ເຊົາ. ຂ້າພະເຈົ້າ ກໍເລີຍເຂົ້າໄປໃນອຸມົງຂອງສັດຕູ ແລະ ເຫັນມີປືນກົນໜັກສອງລຳ ພ້ອມດ້ວຍໝາກແຕກຈຳນວນຫຼາຍ, ຂ້າພະເຈົ້າເຫັນບ່ອນໃດມີສຽງເວົ້າ ຫຼືວ່າມີເງົາຄົນລັບລໍ່, ຂ້າພະເຈົ້າກໍຍິງໂດຍທັນທີ, ຖີ້ມໝາກແຕກຈົນຮອດເວລາງຽບລົງໝົດຈຶ່ງເຊົາ. ພາຍຫຼັງຕີສຳເລັດ ແລະ ໄປກວດກາທຸກຢ່າງຮຽບຮ້ອຍແລ້ວ, ຂ້າພະເຈົ້າເອົາມືລູບຫົວ ຈຶ່ງຮູ້ວ່າຕົນເອງໄດ້ຮັບບາດເຈັບ”.

ພາຍຫຼັງສູ້ຮົບຢ່າງລືມເນື້ອລືມຕົວເປັນເວລາ 2 ຊົ່ວໂມງກວ່າ, ໃນສຸດທ້າຍບັ້ນຕໍ່ສູ້ລົບລ້າງຖານທີ່ໝັ້ນ 1433 ກໍຍາດໄດ້ໄຊຊະນະ. ທ່ານ ຢາມ ໄດ້ພັນບ່ອນບາດເຈັບຂອງຕົນ ແລະ ສົ່ງສົບຂອງໝູ່ຮ່ວມກົມກອງສອງຄົນລົງໄປຕີນພູເພື່ອຊອກຫາບ່ອນຝັງສົບ. ໄຊຊະນະຂອງບັ້ນຕໍ່ສູ້ຄັ້ງນີ້ ໄດ້ສະແດງໃຫ້ເຫັນຈິດໃຈແຂງແກ່ນແຮງກ້າ, ອົງອາດກ້າຫານ, ຄວາມເກັ່ງກ້າສາມາດຂອງທະຫານ ຫວຽດນາມ ເວົ້າລວມ ແລະ ນກວິລະຊົນ ຟ້າມມິງຢ໊າມ ເວົ້າສະເພາະ. ທ່ານ ຈ້ຽວຮົ່ງຈຽນ ຜູ້ເຄືຍເປັນທະຫານສືບສວນ ລອດເລິກທຸກສະໜາມຮົບຢູ່ເຂດທົ່ງໄຫຫີນ ຊຽງຂວາງ ແລະ ມີຄວາມເຂົ້າໃຈຢ່າງຈະແຈ້ງກ່ຽວກັບທຸກພູມີສັນຖານ, ລັກສະນະຂອງສະໜາມຮົບແຕ່ລະແຫ່ງໃຫ້ຮູ້ວ່າ:

“ສິ່ງທີ່ພວກເຮົາໄດ້ຟັງກ່ຽວກັບວິລະກຳຂອງນັກຮົບວິລະຊົນ ຟ້າມມິງຢ໊າມ ນັ້ນ ພຽງແຕ່ແມ່ນສ່ວນໜຶ່ງຂອງບັ້ນຮົບເທົ່ານັ້ນ, ມີແຕ່ໄດ້ເຂົ້າຮ່ວມບັ້ນຕໍ່ສູ້ນັ້ນ ຈຶ່ງຄຳນຶງໄດ້ເຖິງຄວາມດຸເດືອດ ແລະ ຜົນງານນັ້ນ ຍັງດັງກ້ອງກັງວານຢູ່ແນວຮົບ, ສ້າງເງື່ອນໄຂສະດວກໃຫ້ແກ່ສະໜາມຮົບພາກໃຕ້, ຫວຽດນາມ ແລະ ສະໜາມຮົບຂອງ ລາວ. ເພາະສະນັ້ນ, ເພື່ອສ້າງຂີດໝາຍ ແລະ ເຮັດໃຫ້ໄຊຊະນະນີ້ພົ້ນເດັ່ນຂຶ້ນ, ພາຍຫຼັງເຊັນສົນທິສັນຍາເມື່ອປີ 1973, ແນວຮົບໄດ້ຕັດສິນໃຈຈັດງານວາງສະແດງຄັ້ງໃຫຍ່, ສະນັ້ນຂ້າພະເຈົ້າຈຶ່ງມີໂອກາດໄດ້ພົບປະ ແລະ ຖ່າຍຮູບໃຫ້ແກ່ນັກຮົບວິລະຊົນ ຟ້າມມິງຢ໊າມ ແລະ ສ້າງຄວາມຊົງຈຳອັນເລິກເຊິ່ງໃຫ້ແກ່ຂ້າພະເຈົ້າ".

ທ່ານ ຟ້າມມິງຢ້າມ ໄດ້ຮັບນາມມາຍົດ ນັກຮົບວິລະຊົນກຳລັງປະກອບອາວຸດປະຊາຊົນ ເມື່ອປີ 2018 ຈາກປະທານປະເທດ ຫວຽດນາມ (ພາບ:baohoabinh.com.vn)

ສິ້ນສຸດບັ້ນຮົບ Z, ຫົວໜ້າໝວດ ຟ້າມມິງຢ໊າມ ໄດ້ຮັບຫຼຽນໄຊ ວິລະກຳສູ້ຮົບຊັ້ນໜຶ່ງ (1972), ນັກຮົບຜູ້ອົງອາດດີເດັ່ນ ດັບມອບຈັກກະພັດ ອາເມລິກາ (1972), ນັກຮົບແຂ່ງຂັນທົ່ວກອງທັບ (1972), ຫຼຽນໄຊນັກຮົບສະຫງ່າອົງອາດ ຊັ້ນ 3….

ບັນດາຜົນງານຂອງທ່ານ ຟ້າມມິງຢ໊າມ ໄດ້ປະກອບສ່ວນເຂົ້າໃນໜ້າປະຫວັດສາດອັນສະຫງ່າອົງອາດຂອງການພົວພັນສາມັກຄີແບບພິເສດ, ການຮ່ວມສຳພັນສູ້ຮົບດ້ວຍຄວາມບໍລິສຸດຜຸດຜ່ອງ, ສາຍຈິດມິດໃຈອັນສັດຊື່ບໍລິສຸດລະຫວ່າງສອງຊາດ ຫວຽດນາມ - ລາວ. ຍ້ອນ “ມີຜົນງານພິເສດໃນການຕໍ່ຕ້ານຕ້ານ ອາເມລິກາ ກູ້ຊາດ”, ທ່ານ ຟ້າມມິງຢ໊າມ ໄດ້ຮັບນາມມາຍົດ ນັກຮົບວິລະຊົນກຳລັງປະກອບອາວຸດປະຊາຊົນ ເມື່ອປີ 2018 ຈາກປະທານປະເທດ ຫວຽດນາມ. ນີ້ແມ່ນນາມມະຍົດອັນສູງສົ່ງ ຮັບຮູ້ຊຸມເດືອນປີທີ່ໜ້າເອກອ້າງທະນົງໃຈຂອງທ່ານ, ປະກອບສ່ວນສ້າງປະຫວັດສາດອັນສະຫງ່າອົງອາດຂອງທັງສອງຊາດ ຫວຽດນາມ - ລາວ: ຍາດເອົາໄຊຊະນະຕໍ່ການຮຸກຮານຂອງຈັກກະພັດ ອາເມລິກາ./.

ວິ​ລະ​ກຳສູ້ຮົບ​ຂອງວິ​ລະ​ຊົນ ຟ້າມ​ມິງ​ຢ໊າມ ຢູ່​ທົ່ງ​ໄຫ​ຫີນ​ ຊຽງ​ຂວາງ

ວິລະກຳສູ້ຮົບຂອງວິລະຊົນ ຟ້າມມິງຢ໊າມ ຢູ່ທົ່ງໄຫຫີນ ຊຽງຂວາງ