ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ໄດ້ຊີ້ແຈ້ງວ່າ: 67 ປີແຫ່ງວັນກໍ່ສ້າງ ແລະ ພັດທະນາ
(vovworld) - ໂດຍເປັນປະທານກອງປະຊຸມຜັນຂະຫຍາຍໜ້າທີ່ສາທາລະນະສຸກ ປີ 2012 ແລະ ສະເຫຼີມສະຫຼອງວັນແພດໝໍຫວຽດນາມ ທີ່ຖືກດຳເນີນໃນຕອນເຊົ້າວັນທີ 23/2 ຢູ່ຮ່າໂນ້ຍ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ໄດ້ຊີ້ແຈ້ງວ່າ: 67 ປີແຫ່ງວັນກໍ່ສ້າງ ແລະ ພັດທະນາ, ຂະແໜງສາທາລະນະສຸກຫວຽດນາມໄດ້ເຕີບໃຫຍ່ໃນທຸກດ້ານ, ທັງດ້ານເຄືອຂ່າຍບັນດາຮາກຖານສາທາລະນະສຸກ, ຖັນແຖວພະນັກງານທ່ານໝໍ, ພະນັກງານສາທາລະນະສຸກ ແລະ ຄຸນນະພາບການກວດກາປິ່ນປົວພະຍາດ, ເບິ່ງແຍງດູແລສຸຂະພາບໃຫ້ແກ່ປະຊາຊົນ. ເອກອ້າງທະນົງໃຈກ່ຽວກັບບັນດາຜົນງານອັນໃຫຍ່ຫຼວງທີ່ບັນລຸໄດ້, ຂະແໜງສາທາລະນະສຸກຫວຽດນາມ ຄວນສືບຕໍ່ມານະພະຍາຍາມຕອບສະໜອງບັນດາຄວາມຕ້ອງການກ່ຽວກັບການປ້ອງກັນ, ເບິ່ງແຍງດູແລ ແລະ ຍົກສູງສຸຂະພາບຂອງປະຊາຊົນກ່ວາອີກ, ສົມກັບຄວາມໄວ້ເນື້ອເຊື່ອໃຈ, ຄວາມຮັກແພງຂອງພັກ, ລັດ ແລະ ປະຊາຊົນ. ເມື່ອເຕື້ອງເຖິງບັນດາໜ້າທີ່ຂອງຂະແໜງສາທາລະນະສຸກໃນໄລຍະທີ່ຈະມາເຖິງ, ທ່ານນາຍົກລັດຖະມົນຕີ ຫງວຽນເຕີນຢູງ ຮຽກຮ້ອງໃຫ້ທົ່ວຂະແໜງຄວນສືບຕໍ່ປ່ຽນໃໝ່ ແລະ ສ້າງສຳເລັດລະບົບສາທາລະນະສຸກຫວຽດນາມຕາມທິດຍຸຕິທຳ, ມີປະສິດທິຜົນ ແລະ ພັດທະນາ, ພິເສດແມ່ນສາທາລະນະສຸກຂັ້ນຮາກຖານ, ເຄືອຂ່າຍສາທາລະນະສຸກສຳຮອງ, ຮັບປະກັນໃຫ້ແກ່ການເບິ່ງແຍງດູແລສຸຂະພາບປະຊາຊົນເພື່ອບັນລຸຜົນງານດີທີ່ສຸດ. ທ່ານນາຍົກລັດຖະມົນຕີ ຕັກເຕືອນວ່າ: ຂະແໜງສາທາລະນະສຸກເອົາໃຈໃສ່ເຖິງເລື່ອງເປີດກ້ວາງບັນດາຮູບແບບການບຳລຸງສ້າງ ເພື່ອແນໃສ່ຮັບປະກັນຊັບພະຍາກອນມະນຸດໃຫ້ແກ່ບັນດາຮາກຖານສາທາລະນະສຸກໃນໄລຍະຈະມາເຖິງ, ບັນດາມາດຕະການປ້ອງກັນ, ຕ້ານພະຍາດຄວນໄດ້ຮັບການຜັນຂະຫຍາຍຢ່າງມີປະສິດທິຜົນ.
