 ທ່ານນາຍົກລັດຖະມົນຕີ ຫງວຽນຊວນຟຸກ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 30
|
(vovworld) – ຄະນະຜູ້ແທນຫວຽດນາມ ໂດຍທ່ານນາຍົກລັດຖະມົນຕີ ຫງວຽນຊວນຟຸກ ນຳໜ້າເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 30 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ ຕາມຄຳເຊີນຂອງທ່ານປະທານາທິບໍດີ ຟີລິບປິ່ນ Rodrigo Roa Duterte ໄດ້ມີບັນດາການປະກອບສ່ວນສຳຄັນເຂົ້າໃນຜົນສຳເລັດລວມຂອງກອງປະຊຸມ. ນັ້ນແມ່ນຄຳຢືນຢັນຂອງທ່ານຮອງລັດຖະມົນຕີການຕ່າງປະເທດ ຫງວຽນກວກຢຸງ ເມື່ອຕອບຄຳສຳພາດຕໍ່ສື່ມວນຊົນ ກ່ຽວກັບໝາກຜົນຂອງກອງປະຊຸມສຸດຍອດອາຊຽນຄັ້ງທີ 30 ແລະ ບັນດາການເຄື່ອນໄຫວກ່ຽວຂ້ອງທີ່ຫາກໍ່ດຳເນີນຢູ່ຟີລິບປິ່ນ. ທ່ານຮອງລັດຖະມົນຕີ ຫງວຽນກວກຢຸງ ໃຫ້ຮູ້ວ່າ ນັບແຕ່ຂັ້ນຕອນການກະກຽມການຈັດຕັ້ງກອງປະຊຸມ, ຫວຽດນາມເປັນເຈົ້າການສົມທົບກັບຟີລິບປິ່ນ ແລະ ບັນດາປະເທດອາຊຽນເຂົ້າຮ່ວມວຽກງານ ຫັນບັນດາຫົວຂໍ້ບຸລິມະສິດໃຫ້ປີອາຊຽນ 2017 ໂດຍຟີລິບປິ່ນສະເໜີໃຫ້ເປັນລະອຽດ. ຫວຽດນາມຕັ້ງໜ້າເຂົ້າຮ່ວມການສ້າງບັນດາເອກະສານລວມຂອງອາຊຽນກໍ່ຄື ເນື້ອໃນທີ່ໄດ້ຍື່ນສະເໜີຕໍ່ກອງປະຊຸມສຸດຍອດອາຊຽນຄັ້ງທີ 30 ປຶກສາຫາລື, ປະຕິບັດບົດບາດເປັນປະທານກຸ່ມຮັບຜິດຊອບພິເສດຂໍ້ລິເລີ່ມເຊື່ອມຈອດອາຊຽນ ( IAI ) ເປັນຢ່າງດີ ແລະ ປະສານງານການພົວພັນຄູ່ເຈລະຈາອາຊຽນ-ອິນເດຍ ໃນສະພາບການເຊິ່ງສອງຝ່າຍພວມມຸ່ງໄປເຖິງ 25 ປີ ແຫ່ງວັນສ້າງຕັ້ງການພົວພັນຄູ່ເຈລະຈາ.
ທີ່ກອງປະຊຸມ, ເພື່ອສ້າງປະຊາຄົມອາຊຽນໃຫ້ໝັ້ນຄົງເຂັ້ມແຂງ, ທ່ານນາຍົກລັດຖະມົນຕີ ຫງວນຊວນຟຸກ ເນັ້ນໜັກເຖິງ 3 ຈຸດ. ນັ້ນແມ່ນບຸລິມະສິດແຖວໜ້າໃຫ້ແກ່ວຽກງານຕອບສະໜອງຜົນປະໂຫຍດໃຫ້ປະຊາຊົນ, ຖືປະຊາຊົນເປັນໃຈກາງ. ຄຽງຂ້າງບັນດາບັນຫາອື່ນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ປຶກສາຫາລືບັນດາເນື້ອໃນ ເພື່ອແນໃສ່ແກ້ໄຂສິ່ງທ້າທາຍຄວາມໝັ້ນຄົງທີ່ບໍ່ເຄີຍມີມາ, ພິເສດແມ່ນການປ່ຽນແປງຂອງດິນຟ້າອາກາດ ແລະ ໂຈນສະລັດ. ທ່ານນາຍົກ ກໍ່ແບ່ງປັນຄວາມວິຕົກກັງວົນ ກ່ຽວກັບບັນດາຄວາມເຄັ່ງຕຶງທີ່ເພີ່ມຂຶ້ນຢູ່ແຫຼມເກົາຫຼີ, ທະເລຮວາຕຸງ, ທະເລຕາເວັນອອກ ແລະ ເນັ້ນໜັກວ່າ ອາຊຽນຄວນເຊີດຊູບັນດາຫຼັກການ ແລະ ຫຼັກໝັ້ນລວມໂດຍພື້ນຖານ ກ່ຽວກັບການແກ້ໄຂບັນດາການຂັດແຍ່ງກັນໂດຍສັນຕິວິທີ ແລະ ບົນພື້ນຖານເຄົາລົບກົດໝາຍສາກົນ.
