 (ທີ່ກອງປະຊຸມ) |
ຕອນເຊົ້າວັນທີ 20 ທັນວາ, ກອງປະຊຸມວິທະຍາສາດດ້ວຍຫົວຂໍ້ “ຍົກສູງຄວາມສາມາດໃຫ້ແກ່ພະນັກງານບໍລິຫານການສຶກສາ ສປປ.ລາວ ແລະ ບົດຮຽນຕົວຈິງຂອງ ສສ.ຫວຽດນາມ”, ຈັດຂຶ້ນຢູ່ສະຖາບັນຄຸ້ມຄອງການສຶກສາ, ທີ່ ຮ່າໂນ້ຍ. ກອງປະຊຸມໂດຍສະຖາບັນຄຸ້ມຄອງການສຶກສາ ຫວຽດນາມ ສົມທົບກັບສະຖາການພັດທະນາບໍລິຫານການສຶກສາ ລາວ ຈັດຂຶ້ນ.
ທີ່ກອງປະຊຸມ, ທ່ານຮອງລັດຖະມົນຕີກະຊວງສຶກສາ ແລະ ກິລາ ລາວ ສຳລານ ພັນຄະວົງ ຕີລາຄາວ່າ, ເຖິງວ່າກອງປະຊຸມມີຂອບຂະໜາດນ້ອຍ, ແຕ່ມີຄວາມໝາຍສຳຄັນໃນການພັດທະນາຖັນແຖວພະນັກງານບໍລິຫານການສຶກສາ ແລະ ການພົວພັນຮ່ວມມືໃນຂົງເຂດການສຶກສາລະຫວ່າງ 2 ປະເທດ. ທ່ານ ສຳລານ ພັນຄະວົງ, ໃຫ້ຮູ້ວ່າ:
 (ທ່ານຮອງລັດຖະມົນຕີກະຊວງສຶກສາ ແລະ ກິລາ ລາວ ສຳລານ ພັນຄະວົງ) |
"ໃນກອງປະຊຸມປະຊຸມລະຫວ່າງສອງສະຖາບັນພວກເຮົາໃນມື້ນີ້, ຂ້າພະເຈົ້າຂໍສະເໜີບາງເນື້ອໃນທີ່ພວກເຮົາພ້ອມກັນຄົ້ນຄວ້າ, ແລກປ່ຽນຄຳຄິດຄຳເຫັນນຳກັນ, ລວມມີ 3 ເນື້ອໃນສຳຄັນ: ທີໜຶ່ງ, ການປ່ຽນແປງສະຖານະການສຶກສາຢູ່ ສປປ. ລາວ ແລະ ຄວາມຕ້ອງການພະນັກງານບໍລິຫານ ແລະ ຄຸ້ມຄອງວຽກງານສຶກສາ ຢູ່ ສປປ.ລາວ; ທີສອງ, ສະຖານະພາບຂອງໂຄງການ ແລະ ເນື້ອໃນລາຍການບຳລຸງຜູ້ບໍລິຫານການສຶກສາຢູ່ ສປປ.ລາວ; ທີສາມ, ການປ່ຽນແປງໃໝ່ຂອງວຽກງານສຶກສາຢູ່ ສສ. ຫວຽດນາມ, ການບຳລຸງພະນັກງານບໍລິຫານການສຶກສາຢູ່ ສສ. ຫວຽດນາມ ເພື່ອຕອບສະໜອງຄວາມຮຽກຮ້ອງຕ້ອງການ, ໂດຍສະເພາະແມ່ນວຽກງານຍົກສູງຄຸນນະພາບ ແລະ ຄຸ້ມຄອງໂຮງຮຽນ ແລະ ວຽກງານການຄຸ້ມຄອງການສຶກສາ".
ບັນດາຜູ້ແທນເຂົ້າຮ່ວມກອງປະຊຸມໄດ້ຍົກອອກຫຼາຍຄຳເຫັນປະກອບ, ວິທີການ ແລະ ຮູບແບບບຳລຸງສ້າງ, ຍົກສູງກຳລັງບໍລິຫານການສຶກສາໃຫ້ແກ່ພະນັກງານ ເພື່ອແນໃສ່ພັດທະນາແຫຼ່ງຊັບພະຍາກອນມະນຸດມີຄຸນນະພາບສູງ, ຕອບສະໜອງຄວາມຮຽກຮ້ອງໃນຍຸກສະໄໝໃໝ່. ພ້ອມກັນນັ້ນ, ສະຖາບັນຄຸ້ມຄອງການສຶກສາ ຫວຽດນາມ ກໍ່ສະເໜີແຜນຮ່າງ “ຍົກສູງຄວາມສາມາດໃຫ້ແກ່ພະນັກງານບໍລິຫານການສຶກສາ ລາວ” ແລະ ໄດ້ຮັບຄວາມເຫັນດີເຫັນພ້ອມກ່ຽວກັບເລື່ອງສ້າງແຜນຮ່າງໃຫ້ສົມບູນແບບ, ຍືນສະເໜີຕໍ່ລັດຖະບານຂອງ 2 ປະເທດ ເພື່ອຜັນຂະຫຍາຍໃນໄລຍະຈະມາເຖິງ.
