 ທ່ານນາຍົກລັດຖະມົນຕີ ຟ້າມມິງຈິງ ແລະ ທ່ານ ບຸນທອງ ຈິດມະນີ, ຮອງປະທານປະເທດ ແຫ່ງ ສປປ ລາວ (ພາບ: VGP/Nhật Bắc) |
ຕອນບ່າຍວັນທີ 18 ກໍລະກົດ, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ໃຫ້ການຕ້ອນຮັບທ່ານ ບຸນທອງ ຈິດມະນີ, ຜູ້ປະຈຳການຄະນະເລຂາສູນກາງພັກປະຊາຊົນປະຕິວັດລາວ, ຮອງປະທານປະເທດ ແຫ່ງ ສປປ ລາວ ແລະ ຄະນະຜູ້ແທນຂັ້ນສູງພັກ, ລັດ ລາວ ພວມຢ້ຽມຢາມ ຫວຽດນາມ ຢ່າງເປັນທາງການ. ທີ່ການຕ້ອນຮັບ, ທ່ານນາຍົກລັດຖະມົນຕີ ຟ້າມມິງຈິງ ສະເໜີໃຫ້ສອງຝ່າຍສືບຕໍ່ຮັກສາການຢ້ຽມຢາມ, ພົບປະຂັ້ນສູງ ແລະ ທຸກຂັ້ນ ຢ່າງເປັນປະຈຳ; ຜັນຂະຫຍາຍບັນດາຂໍ້ຕົກລົງທີ່ບັນລຸໄດ້ທີ່ກອງປະຊຸມຄັ້ງທີ 44 ຂອງຄະນະກຳມະການລະຫວ່າງລັດຖະບານ ຫວຽດນາມ - ລາວຢ່າງມີປະສິດທິຜົນ; ສືບຕໍ່ສົມທົບກັນຊອກຫາມາດຕະການນຳການພົວພັນຮ່ວມມືດ້ານເສດຖະກິດພັດທະນາໃຫ້ສົມກັບການພົວພັນດ້ານການເມືອງແບບພິເສດລະຫວ່າງສອງປະເທດ; ຮ່ວມມືພ້ອມກັນສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ, ເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກ້ວາງຂວາງ. ພ້ອມທັງແກ້ໄຂສິ່ງຄົງຄ້າງໃຫ້ບັນດາວິສາຫະກິດຢ່າງວ່ອງໄວ, ສ້າງຂອບນິຕິກຳໃຫ້ມີສະຖຽນລະພາບ ແລະ ກະຈ່າງແຈ້ງ, ສະພາບແວດລ້ອມດຳເນີນທຸລະກິດທີ່ສະດວກ, ສ້າງຄວາມໄວ້ເນື້ອເຊື່ອໃຈໃຫ້ແກ່ບັນດານັກລົງທຶນ; ຊຸກຍູ້ການຮ່ວມມືໃນຂົງເຂດສຳຄັນອື່ນໆຄື ການປ້ອງກັນຊາດ, ປ້ອງກັນຄວາມສະຫງົບ, ຊາຍແດນ, ການສຶກສາບຳລຸງສ້າງ, ວິທະຍາສາດເຕັກໂນໂລຊີ, ວັດທະນະທຳ, ກິລາ, ການທ່ອງທ່ຽວ, ການພົວພັນລະຫວ່າງບັນດາທ້ອງຖິ່ນ ແລະ ການພົວພັນແລກປ່ຽນປະຊາຊົນ; ສືບຕໍ່ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສສາກົນ, ພາກພື້ນ; ເພີ່ມທະວີການໜູນຊ່ວຍເຊິ່ງກັນ ແລະ ກັນຮັກສາເອກະລາດ, ເປັນເຈົ້າຕົນເອງ, ພ້ອມທັງຕັ້ງໜ້າປະກອບສ່ວນເຂົ້າໃນການຮັກສາຄວາມສາມັກຄີ ແລະ ບົດບາດໃຈກາງຂອງ ອາຊຽນ. ສອງຝ່າຍເຫັນດີເປັນເອກະພາບຊຸກຍູ້ບັນດາອົງການ, ທ້ອງຖິ່ນຜັນຂະຫຍາຍຂໍ້ຕົກລົງທີ່ໄດ້ໃຫ້ຄຳໝັ້ນສັນຍາ, ສົມທົບກັນຊຸກຍູ້ການຜັນຂະຫຍາຍບັນດາໂຄງການຮ່ວມມືສຳຄັນລະຫວ່າງສອງປະເທດເພື່ອຂ່ຳນັບຮັບຕ້ອນປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2022.
ທ່ານຮອງປະທານປະເທດ ລາວ ບຸນທອງ ຈິດມະນີ ໄດ້ເນັ້ນໜັກເຖິງເລື່ອງສອງປະເທດສົມທົບກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງ 60 ປີແຫ່ງວັນສ້າງຕັ້ງສາຍພົວພັນທາງການທູດ, 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ໃຫ້ເປັນຢ່າງດີ, ພ້ອມກັນປະກອບສ່ວນຊ່ວຍໃຫ້ປະຊາຄົມສາກົນເຂົ້າໃຈແຈ້ງກ່ວາກ່ຽວກັບການພົວພັນແບບພິເສດ ລະຫວ່າງສອງຊາດ ລາວ - ຫວຽດນາມ.
