(vovworld) - ຕອນເຊົ້າວັນທີ 28-3, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດ Nguyen Sinh Hung, ຄະນະປະຈຳສະພາແຫ່ງຊາດໄດ້ອັດວາລະປະຊຸມຄັ້ງທີ 6 . ໃນ 8 ວັນແຫ່ງການດຳເນີນວາລະປະຊຸມຄັ້ງທີ 6, ຄະນະປະຈຳສະພາແຫ່ງຊາດ ໄດ້ປຶກສາຫາລື ແລະ ຕົກລົງຫຼາຍເນື້ອໃນທີ່ສຳຄັນ. ຄະນະປະຈຳສະພາແຫ່ງຊາດໄດ້ໃຫ້ຄວາມເຫັນກ່ຽວກັບການກະກຽມໃຫ້ແກ່ກອງປະຊຸມສະໄໝສາມັນເທື່ອທີ 3 ສະພາແຫ່ງຊາດຊຸດທີ 13 ແລະ ຮ່າງກົດໝາຍ 6 ສະບັບເຊິ່ງຈະຮັບຮອງເອົາໃນກອງປະຊຸມສະໄໝນີ້. ແລະ ກໍ່ຢູ່ທີ່ວາລະປະຊຸມຄັ້ງນີ້, ຄະນະປະຈຳສະພາແຫ່ງຊາດ ໄດ້ປຶກສາຫາລືກ່ຽວກັບບົດລາຍງານຂອງຄະນະກຳມາທິການຮຽບຮຽງ ປັບປຸງລັດຖະທຳມະນູນທີ່ກ່ຽວຂ້ອງເຖິງການສະຫຼຸບເລື່ອງ ປະຕິບັດລັດຖະທຳມະນູນປີ 1992 ແລະ ເນື້ອໃນທີ່ເປັນພື້ນຖານຈຳນວນໜຶ່ງເຊິ່ງຄາດວ່າຈະປັບປຸງ, ເພີ່ມເຕີມ. ກ່າວຄວາມເຫັນອັດກອງປະຊຸມ, ທ່ານປະທານສະພາແຫ່ງຊາດ Nguyen Sinh Hung ເນັ້ນໜັກວ່າ. ຈຸດພິເສດໃນວາລະປະຊຸມຄັ້ງນີ້ນັ້ນແມ່ນ. ເປັນຄັ້ງທຳອິດທີ່ຄະນະປະຈຳສະພາແຫ່ງຊາດໄດ້ຈັດການຊັກຖາມລັດຖະມົນຕີວ່າການກະຊວງສາທາລະນະສຸກ, ລັດຖະມົນຕີວ່າການກະຊວງພາຍໃນ ກ່ຽວກັບບັນດາບັນຫາເຊິ່ງຜູ້ມີສິດເລືອກຕັ້ງມີຄວາມສົນໃຈ, ໂດຍມີການຖ່າຍທອດສົດທາງວິທະຍຸ, ໂທລະພາບ, ເພື່ອໃຫ້ຜູ້ມີສິດເລືອກຕັ້ງໃນທົ່ວປະເທດຕິດຕາມ. ທ່ານປະທານສະພາແຫ່ງຊາດ Nguyen Sinh Hung ຊີ້ແຈ້ງວ່າ:
”ການເຄື່ອນໄຫວຊັກຖາມຄັ້ງນີ້ ເພື່ອໃຫ້ປະຊາຊົນທົ່ວປະເທດຕິດຕາມກວດກາການເຄື່ອນໄຫວຂອງສະພາແຫ່ງຊາດ ແລະ ບັນດາອົງການຂອງລັດຖະບານ. ພວກເຮົາຈະຖອດຖອນບົດຮຽນ, ຕີລາຄາວຽກໃດປະຕິບັດໄດ້ດີ, ວຽກໃດຄວນປະຕິບັດໃຫ້ດີກວ່າ, ເຮັດຄືແນວໃດເພື່ອໃຫ້ຂົວເຊື່ອມຕໍ່ລະຫວ່າງ ສສຊ, ສະພາແຫ່ງຊາດ, ຄະນະປະຈຳສະພາແຫ່ງຊາດ ກັບປະຊາຊົນນັບມື້ນັບເປີດເຜີຍ, ກະຈາງແຈ້ງ, ປະຊາທິປະໄຕ, ເພື່ອໃຫ້ພວກເຮົາປະຕິບັດວຽກງານທີ່ປະຊາຊົນມອບໝາຍໃຫ້ຢ່າງດີທີ່ສຸດ”
ແລະກໍ່ຢູ່ທີ່ວາລະປະຊຸມຄັ້ງນີ້, ຄະນະປະຈຳສະພາແຫ່ງຊາດກໍ່ເຫັນດີເປັນເອກະພາບກ່ຽວກັບເລື່ອງປ່ອນບັດໄວ້ວາງໃຈປະຈຳປີສຳຫຼັບຕຳແໜ່ງ ປະທານປະເທດ, ນາຍົກລັດຖະມົນຕີ, ປະທານສະພາແຫ່ງຊາດ, ແລະ ຕຳແໜ່ງອື່ນໆໂດຍສະພາແຫ່ງຊາດເລືອກຕັ້ງ. ໝາກຜົນແຫ່ງການປ່ອນບັດຈະຖືກປະກາດຢ່າງເປີດເຜີຍ. ຜູ້ໃດບໍ່ໄດ້ຮັບຈຳນວນບັດສະໜັບສະໜູນກວ່າ 50% ໃນ 2 ຄັ້ງຢ່າງຕໍ່ເນື່ອງຈະພິຈາລະນາ, ສະເໜີຕໍ່ສະພາແຫ່ງຊາດໃຫ້ຍົກເວັ້ນ ຫຼືລາອອກຈາກຕຳແໜ່ງ.
