 ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ກ່າວຄຳເຫັນທີ່ກອງປະຊຸມ
|
(vovworld)- ກອງປະຊຸມສະພາປະຊາຄົມວັດທະນະທຳ ສັງຄົມ ອາຊຽນ ຄັ້ງທີ 15 ໄຂຂຶ້ນໃນຕອນເຊົ້າວັນທີ 4/6 ຢູ່ ແຂວງ ຫລວງພະບາງ ສປປ ລາວ. ທີ່ກອງປະຊຸມ, ບັນດາລັດຖະມົນຕີ ໄດ້ພິຈາລະນາບັນດາບຸລິມະສິດຂອງປະຊາຄົມວັດທະນະທຳ ສັງຄົມ ອາຊຽນ ໃນປີເປັນປະທານອາຊຽນ 2016 ຂອງລາວ, ການປະຕິບັດແຜນການສັງລວມ ປະຊາຄົມວັດທະນະທຳສັງຄົມ ອາຊຽນ ຮອດປີ 2025 ແລະ ບາງບັນຫາອື່ນທີ່ກ່ຽວຂ້ອງ. ກ່າວຄຳເຫັນທີ່ພິທີໄຂກອງປະຊຸມ, ທ່ານນາຍົກລັດຖະມົນຕີ ລາວ ທອງລຸນ ສີສຸລີດ ເນັ້ນຫນັກວ່າ: “ກອງປະຊຸມປະຊາຄົມວັດທະນະທຳ ສັງຄົມ ອາຊຽນ ຄັ້ງທີ 15 ຄັ້ງນີ້ ແມ່ນຂີດໝາຍສຳຄັນ. ບັນດາທ່ານລັດຖະມົນຕີ ຈະພ້ອມກັນພິຈາລະນາບັນດາເອກະສານສຳຄັນຍື່ນສະເຫນີກອງປະຊຸມສຸດຍອດ ອາຊຽນ ຄັ້ງທີ 28 ໃນເດືອນ 9 ຈະມາເຖິງ ຢູ່ ນະຄອນຫລວງ ວຽງຈັນ, ເປັນຕົ້ນແມ່ນຖະແຫລງການວຽງຈັນ ກ່ຽວກັບການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບມຸ່ງໄປເຖິງວຽກເຮັດງານທຳແບບຍືນຍົງໃນອາຊຽນ, ຖະແຫລງການວຽງຈັນ ກ່ຽວກັບການເພີ່ມທະວີການຮ່ວມມືມໍລະດົກວັດທະນະທຳໃນອາຊຽນ ແລະ ບັນດາເອກະສານສຳຄັນອື່ນ.”
ສິ້ນສຸດກອງປະຊຸມ, ບັນດາທ່ານລັດຖະມົນຕີ ໄດ້ອອກຖະແຫລງການຮ່ວມ ແລະ ເປັນເອກະພາບບັນດາເນື້ອໃນຂອງກອງປະຊຸມ, ພິເສດ ແມ່ນລະດັບຄວາມໄວໃນການສຳເລັດບັນດາເອກະສານ, ຖະແຫລງການກໍຄືການປະຕິບັດແຜນການສັງລວມປະຊາຄົມວັດທະນະທຳສັງຄົມອາຊຽນປີ 2015 ເພື່ອຍື່ນສະເຫນີຕໍ່ບັນດາການນຳຂັ້ນສູງອາຊຽນພິຈາລະນາ, ຮັບຮອງເອົາ.
ໝີບິງ, ນັກຂ່າວ VOV ປະຈຳ ລາວ
