ເກາະ Palawan- ສະຖານທີ່ທ່ອງທ່ຽວຈັບອົກຈັບໃຈຂອງ ຟິລີບປີນ

(vovworld)- ຄົ້ນຫາແມ່ນ້ຳໃຕ້ດິນ Puerto Princesa ຊື່ງແມ່ນແມ່ນ້ຳຍາວແຫ່ງທີ 2 ຂອງໂລກ ແລະ ແມ່ນຫນຶ່ງໃນຈຳນວນສິ່ງມະຫັດສະຈັນທຳມະຊາດ 7 ແຫ່ງຂອງໂລກຊື່ງໄດ້ຮັບການຮັບຮອງຈາກ UNESCO, ດຳນ້ຳເພື່ອຊົມຫີນປະກາລັງ, ຍ່າງຫລິ້ນເທິງຫາດຊາຍທະເລຫລືອາບນ້ຳທະເລຂຽວສະອາດ ແມ່ນສິ່ງທີ່ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວເມື່ອມາຢ້ຽມຢາມ ເກາະ Palawan ດ້ວຍເນື້ອທີ່ 12.239 ຕາລາງກິໂລແມັດ ທີ່ຫ່າງຈາກນະຄອນຫລວງ ມານີລາ ປະເທດ ຟິລີບປີນ ທາງທິດຕາເວັນຕົກສຽງໃຕ້ 420 ກິໂລແມັດ. ຫວ່າງແລ້ວນີ້, ວາລະສານທ່ອງທ່ຽວ Conde Nast Traveler ໄດ້ຄັດເລືອກ ເກາະ Palawan ແມ່ນສະຖານທີ່ທ່ອງທ່ຽວງາມກວ່າໝູ່ຂອງໂລກໃນປີ 2014. ໃນລາຍການຊາຍຄາອາຊຽນພາກນີ້, ພວກເຮົາຂໍແນະນຳ ເກາະ Palawan.

        ເປັນຄັ້ງທຳອິດທີ່ມາຢ້ຽມຢາມເກາະ Palawan, ເພື່ອນ ເລຖາວງວຽນ ນັກສຶກສາຫວຽດນາມ ພວມຮ່ຳຮຽນຢູ່ມະຫາວິທະຍາໄລ De La Salle ຂອງຟິລີບປີນ ຮູ້ສຶກແປກປະຫລາດໃຈຕໍ່ຄວາມສວຍງາມຂອງເກາະແຫ່ງນີ້. ດ້ວຍບັນດາຫາດຊາຍທະເລຂາວຍາວຢຽດສຸດສາຍຕາພ້ອມກັບຕົ້ນພ້າວທີ່ຂຽວອຸ່ມທຸ່ມ. ຫາດຊາຍທະເລຢູ່ທີ່ນີ້ ຍັງຮົກເຮື້ອເປົ່າຫວ່າງ ແລະ ສະຫງົບ ບໍ່ມີຮ້ານຂາຍເຄື່ອງທີ່ຄັບຄາຫນາແຫນ້ນຄືຢູ່ຫາດຊາຍທະເລແຫ່ງອື່ນ. ເພື່ອນ ເລຖາວງວຽນ ແບ່ງປັນວ່າ:

        “ໃນບັນດາລາຍການທ່ອງທ່ຽວຂອງຕົນ, ຂ້າພະເຈົ້າຮູ້ສຶກປະທັບໃຈທີ່ສຸດແມ່ນ ເກາະ Palawan, ເພາະວ່າ ຄວາມສວຍງາມຢູ່ເກາະແຫ່ງນີ້ບໍ່ສາມາດພັນລະນາໃຫ້ໝົດໄດ້. ຂ້າພະເຈົ້າມັກໄປຄົ້ນຫາ ເກາະ Palawan ທີ່ສຸດ, ຍ້ອນຄວາມສວຍງາມຂອງທິວທັດທຳມະຊາດ, ພ້ອມກັບນ້ຳທະເລທີ່ຂຽວສະອາດ, ແລະຄວາມສະຫງົບສຸກ, ອາຫານຢູ່ທີ່ນີ້ກໍແຊບນົວ ພ້ອມກັນນັ້ນ, ຊາວທ້ອງຖິ່ນກໍ່ຮັກແພງ ແລະ ສະຫນິດສະຫນົມກັບແຂກຄົນຫຼາຍ. ສິ່ງດັ່ງກ່າວໄດ້ເຮັດໃຫ້ລາຍການທ່ອງທ່ຽວເກາະ Palawan ຂອງຂ້າພະເຈົ້າມີຄວາມໝາຍທີ່ສຸດ.”

        ເລຖາວງວຽນ ກໍແບ່ງປັນຕື່ມອີກວ່າ: ມາຢ້ຽມຢາມ ເກາະ Palawan, ມີສະຖານທີ່ທ່ອງທ່ຽວແຫ່ງຫນຶ່ງທີ່ຂາດບໍ່ໄດ້ສຳລັບນັກທ່ອງທ່ຽວ. ນັ້ນແມ່ນ ແວ່ຢາມສວນສາທາລະນະທຳມະຊາດທີ່ມີຊື່ສຽງ Tubbataha ReefMarine ຊື່ງໄດ້ຮັບການຮັບຮອງວ່າເປັນມໍລະດົກທຳມະຊາດຂອງໂລກເມື່ອປີ 1993. ນີ້ແມ່ນເຂດອະນຸລັກຮັກສາບັນດາສັດນ້ຳທີ່ເປັນຫລາຍຮູບຫລາຍແບບ ພ້ອມກັບຫີນປະກາລັງທີ່ປົກຄຸມໃນເນື້ອທີ່ຍາວກວ່າ 100 ແມັດ. ສວນສາທາລະນະ Tubbataha ReefMarine ຍັງແມ່ນສະຖານທີ່ຈັບອົກຈັບໃຈສຳລັບຜູ້ນິຍົມລາຍການດຳນ້ຳທະເລ. ເມື່ອດຳນ້ຳທະເລຢູ່ທີ່ນີ້, ທ່ານຈະມີໂອກາດໄດ້ຄົ້ນຫາປາສວຍງາມຫລາຍປະເພດທີ່ມີສີຫລາກຫລາຍ ຫລື ຊົມເຕົາທະເລທີ່ຫາຍາກ.

        ເຖິງຢ່າງໃດກໍຕາມ, ສິ່ງພິເສດເຮັດໃຫ້ ເກາະ Palawan ກາຍເປັນສະຖານທີ່ລືຊື່ ນັ້ນແມ່ນ ແຫ່ງນີ້ ມີແມ່ນ້ຳ ໃຕ້ດິນ Puerto Princesa ດ້ວຍຄວາມຍາວກວ່າ 8 ກິໂລແມັດ. ນີ້ແມ່ນແມ່ນ້ຳລຳຍາວທີສອງຂອງໂລກ ພຽງຖັດຈາກແມ່ນນ້ຳໃຕ້ດິນ ຢູ່ ຖ້ຳ ຟອງຍາແກ໋ບາງ ແຂວງ ກວ໋າງບີງ ຂອງຫວຽດນາມເທົ່ານັ້ນ. ບັນດານັກທ່ອງທ່ຽວເຄີຍເວົ້ານຳກັນວ່າ ຖ້າມາຢ້ຽມຢາມ ເກາະ Palawan ຫາກບໍ່ທັນໄປຢ້ຽມຢາມ ແມ່ນ້ຳໃຕ້ດິນ Puerto Princesa ກໍໝາຍຄວາມວ່າທ່ານບໍ່ທັນໄປຢ້ຽມຢາມ Palawan ເທື້ອ. ຢາກມາຢ້ຽມຢາມແຫ່ງນີ້ ນັກທ່ອງທ່ຽວຕ້ອງຂຶ້ນເຮືອນ້ອຍ ໄປຜ່ານບັນດາເກາະນ້ອຍ ແລະ ຫນອງບຶງເຈຶ່ງມາຮອດແມ່ນ້ຳໃຕ້ດິນ. ລາຍການທ່ອງທ່ຽວຢ້ຽມຢາມຖ້ຳມີຄວາມຍາວ 2 ກິໂລແມັດ ຕ້ອງໃຊ້ເວລາ 45 ນາທີ, ນັກທ່ອງທ່ຽວໄດ້ຊົມບັນດາທິວທັດທີ່ສວຍງາມ ດ້ວຍຫີນນົມຜາມີອາຍຸນັບລ້ານປີ. ບັນດາເສົາ, ຝາຫີນ, ນົມຜາ ມີຮູບຊົງແຕກຕ່າງກັນ. ບາງເສົາຫີນເບິ່ງຄືວ່າຕົ້ນເຫັດໃຫຍ່ໂຕຫລືນົມຜາອື່ນແມ່ນຄ້າຍຄືສັດປະເພດຕ່າງໆ. ນອກນັ້ນ ບາງນົມຜາຄືຮູບຫນ້າພະເຢຊູ ແລະ ທຽນ. ຖ້ຳແຫ່ງນີ້ ມີຄວາມສູງ 60 ແມັດ, ກວ້າງ 120 ແມັດ. ເພື່ອນ Allan Poe, ນັກທ່ອງທ່ຽວມາຈາກ ອັງກິດ ໃຫ້ຮູ້ວ່າ:

        “ຄົ້ນຫາແມ່ນ້ຳໃຕ້ດິນ ແມ່ນລາຍການທ່ອງທ່ຽວທີ່ຈັບອົກຈັບໃຈທີ່ສຸດສຳລັບຂ້າພະເຈົ້າ. ບໍ່ແມ່ນວ່າ ເວລາໃດພວກເຮົາກໍມີໂອກາດໄປຄົ້ນຫາສິ່ງມະຫັດສະຈັນຂອງໂລກ, ສະນັ້ນ ມາຢ້ຽມຢາມແຫ່ງນີ້ ຂ້າພະເຈົ້າໄດ້ຊົມຮູບຊົງບັນດານົມຜາທີ່ສວຍງາມ.”

        ໄປລຽມຕາມແມ່ນ້ຳໃຕ້ດິນ ແລະ ຊົມທິວທັດທຳມະຊາດສວຍງາມຕ່າງໆ, ແມ່ນຈຸດເວລາທີ່ບໍ່ອາດຫລົງລືມໄດ້ສຳລັບນັກທ່ອງທ່ຽວແຕ່ລະຄົນເມື່ອມີໂອກາດມາຢ້ຽມຢາມເກາະ Palawan. ເມື່ອລະດູແລ້ງວຽນມາ Palawan ຍາມໃດກໍແມ່ນສະຖານທີ່ຊື່ງນັກທ່ອງທ່ຽວຕ່າງປະເທດເຄີຍເລືອກເຟັ້ນມາຢາມໃນລາຍການທ່ອງທ່ຽວຂອງຕົນ.