(vovworld) - ວັນທີ 29/3, ກົງກັບໂອກາດສະເຫຼີມສະຫຼອງ 37 ປີ ແຫ່ງວັນປົດປ່ອຍນະຄອນດ່າໜັງ (29/3/1975 – 29/3/2012), ຖ້ຽວບິນທຳອິດຈາກລາວ ຕາມສາຍການບິນ ປາກເຊ - ສະຫວັນນະເຂດ - ດ່າໜັງ ໄດ້ລົງຈອດທີ່ສະໜາມບິນສາກົນດ່າໜັງ. ນີ້ແມ່ນ 1 ໃນ 2 ຖ້ຽວບິນປະຕິບັດທົດລອງຂອງ Lao Airlines, ກ່ອນທີ່ຈະທຳການເຄື່ອນໄຫວເປັນປະຈຳດ້ວຍ 3 ຖ້ຽວ/ອາທິດ ໃນວັນອັງຄານ, ວັນພຸດ, ວັນເສົາ ດ້ວຍເຮືອບິນ ATR72 ບັນຈຸຜູ້ໂດຍສານໄດ້ 65 ທີ່ນັ່ງ. ເລື່ອງເປີດສະຫຼອງສາຍການບິນນີ້ ແມ່ນເຫດການມີຄວາມສຳຄັນຍິ່ງ ເປັນຂີດໝາຍ 50 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ 2 ປະເທດ, 35 ປີແຫ່ງວັນເຊັນສົນທີສັນຍາມິດຕະພາບຫວຽດນາມ - ລາວ, ປະກອບສ່ວນພັດທະນາສາຍພົວພັນມິດຕະພາບ, ການພົວພັນແລກປ່ຽນ, ການຮ່ວມມືດ້ານເສດຖະກິດ, ວັດທະນະທຳ, ສັງຄົມລະຫວ່າງດ່າໜັງ ກັບແຂວງ, ນະຄອນຕ່າງໆຂອງລາວຍິ່ງກ່ວາອີກ.
