 ເລຂາທິການໃຫຍ່ 2 ປະເທດ ຫວຽດນາມ ແລະ ລາວ ທີ່ພິທີຕ້ອນຮັບ |
ວັນທີ 19 ທັນວາ, ທ່ານ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ ສປປ ລາວ ເລີ່ມຕົ້ນການຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການແຕ່ວັນທີ 19 – 21 ທັນວາ. ການຢ້ຽມຢາມປະຕິບັດຕາມຄຳເຊີື້ອເຊີນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ທ່ານປະທານປະເທດ ຫວຽດນາມ ເຈີ່ນດ້າຍກວາງ. ພິທີຕ້ອນຮັບທາງການທ່ານເລຂາທິການໃຫຍ່, ປະທານປະເທດ ລາວ ບຸນຍັງ ວໍລະຈິດ ໄດ້ຈັດຕັ້ງໃນຕອນເຊົ້າວັນທີ 19 ທັນວາ, ທີ່ທຳນຽບປະທານປະເທດ, ພາຍໃຕ້ການເປັນປະທານຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ.
ກ່າວຄຳເຫັນທີ່ການເຈລະຈາພາຍຫຼັງພິທີຕ້ອນຮັບ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຢັ້ງຢືນວ່າ:
“ການຢ້ຽມຢາມຂອງທ່ານ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ ສປປ ລາວ, ມີຄວາມໝາຍປະຫວັດອັນເລິກເຊິ່ງ, ໃນຂະນະທີ່ 2 ປະເທດຫາກໍ່ຈັດຕັ້ງປີສາມັກຄີມິດຕະພາບ 2017, ສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງເຊັນສົນທິສັນຍາມິດຕະພາບ ຫວຽດນາມ - ລາວ ປະສົບຜົນສຳເລັດ. ການຢ້ຽມຢາມ ນຳມາເຊິ່ງໃຫ້ປະຊາຊົນ ຫວຽດນາມ ອາລົມຈິດອັນເລິກເຊິ່ງ, ນ້ຳໃຈມິດຕະພາບທີ່ຍິ່ງໃຫຍ່, ນ້ຳໃຈສາມັກຄີມິດຕະພາບແບບພິເສດ, ຄວາມສະໜິດຕິດພັນ, ບໍລິສຸດຜຸດຜ່ອງຂອງພັກ, ລັດ ແລະ ປະຊາຊົນ ລາວ ອ້າຍນ້ອງ.”
ສ່ວນທ່ານເລຂາທິການໃຫຍ່, ປະທານປະເທດ ລາວ ບຸນຍັງ ວໍລະຈິດ ຂອບອົກຂອບໃຈການຕ້ອນຮັບຂອງບັນດາການນຳພັກ, ລັດ ແລະ ປະຊາຊົນ ຫວຽດນາມ ສະຫງວນໃຫ້ແກ່ຄະນະຜູ້ແທນຂັ້ນສູງ ສປປ ລາວ.
 ການເຈລະຈາລະຫວ່າງ 2 ຝ່າຍ |
ທີ່ການເຈລະຈາ, 2 ຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະພັກ, ແຕ່ລະປະເທດ; ແລກປ່ຽນທິດທາງ, ມາດຕະການເພື່ອພັດທະນາການພົວພັນລະຫວ່າງ 2 ພັກ, 2 ປະເທດ ກໍ່ຄືບັນດາບັນຫາສາກົນ ແລະ ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ. ການນຳ 2 ທ່ານເນັ້ນໜັກເຖິງຜົນສຳເລັດ ແລະ ຄວາມໝາຍປະຫວັດສາດຂອງປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2017, ຖືນີ້ແມ່ນຂີດໝາຍສຳຄັນໃນການພົວພັນ 2 ປະເທດ; ພ້ອມທັງຢັ້ງຢືນຜົນສຳເລັດຂອງປີສາມັກຄີ, ມິດຕະພາບ 2017 ໄດ້ປະກອບສ່ວນເຮັດໃຫ້ເພື່ອນມິດສາກົນເຂົ້າໃຈແຈ້ງ ກ່ຽວກັບຄຸນນະທາດອັນດີງາມ, ບໍລິສຸດຂອງການພົວພັນ ຫວຽດນາມ - ລາວ.
ການນຳ 2 ທ່ານເຫັນດີເປັນເອກະພາບສືບຕໍ່ສົມທົບກັນປະຕິບັດຢ່າງມີປະສິດທິຜົນບັນດາຂໍ້ຕົກລົງລະຫວ່າງການນຳຂັ້ນສູງ 2 ພັກ, 2 ລັດ; ບັນດາຖະແຫຼງການຮ່ວມ ຫວຽດນາມ - ລາວ; ສືບຕໍ່ເພີ່ມທະວີ ແລະ ນຳການພົວພັນທາງດ້ານການຄ້າກ້າວເຂົ້າສູ່ລວງເລິກ; ແບ່ງປັນບົດຮຽນ ກ່ຽວກັບວຽກງານກໍ່ສ້າງພັກ, ສ້າງລະບົບການເມືອງໝັ້ນຄົງເຂັ້ມແຂງ… 2 ຝ່າຍກໍ່ເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນ, ມີປະສິດທິຜົນ, ສະໜັບສະໜູນເຊິ່ງກັນ ແລະ ກັນ ຢູ່ບັນດາເວທີປາໄສສາກົນ ແລະ ພາກພື້ນ.
ກ່ຽວກັບບັນຫາທະເລຕາເວັນອອກ, ການນຳ 2 ປະເທດເນັ້ນໜັກຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ຄວາມເສລີໃນການເດີນເຮືອ, ການບິນຢູ່ທະເລຕາເວັນອອກ; ເຫັນດີເປັນເອກະພາບບັນດາການຂັດແຍ້ງ ຜືນແຜ່ນດິນ; ທະເລໝູ່ເກາະຢູ່ທະເລຕາເວັນອອກຕ້ອງໄດ້ຮັບການແກ້ໄຂໂດຍສັນຕິວິທີບົນພື້ນຖານກົດໝາຍສາກົນ, ໃນນັ້ນ, ມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982, ຖະແຫຼງການວ່າດ້ວຍການປະພຶດຢູ່ທະເລຕາເວັນອອກລະຫວ່າງ ອາຊຽນ ແລະ ຈີນ (DOC), ມຸ່ງໄປເຖິງການສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC)…
 ພາບປະກອບ |
ພາຍຫຼັງການເຈລະຈາ, ທ່ານເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ແລະ ທ່ານເລຂາທິການໃຫຍ່ ຫງວຽນຟູ໋ຈ້ອງ ເປັນສັກຂີພິຍານພິທີລົງນາມ “ສັນຍາລະຫວ່າງລັດຖະບານ ປະເທດ ສສ ຫວຽດນາມ ແລະ ລັດຖະບານ ສປປ ລາວ ກ່ຽວກັບແຜນຮ່າງກໍ່ສ້າງສຳນັກງານສະພາແຫ່ງຊາດລາວ”; ມອບໃບຢັ້ງຢືນບໍລິສັດຫຸ້ນສ່ວນທ່າກ່ຳປັ່ນສາກົນ ລາວ - ຫວຽດນາມ ໃຫ້ຝ່າຍລາວ ແລະ ຊຸດປື້ມ “ເສັ້ນທາງມິດຕະພາບ ຫວຽດນາມ - ລາວ, ລາວ - ຫວຽດນາມ”.
ແລະກໍ່ໃນຕອນບ່າຍວັນທີ 19 ທັນວາ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ພົບປະກັບທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ທີ່ສຳນັກງານສະພາແຫ່ງຊາດ.
ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ແຈ້ງໃຫ້ທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ຮັບຊາບບາງບັນຫາກ່ຽວກັບສະພາບການເສດຖະກິດ - ສັງຄົມຂອງ ຫວຽດນາມ ແລະ ບາງການເຄື່ອນໄຫວຂອງສະພາແຫ່ງຊາດ ຫວຽດນາມ.
ໃນວັນດຽວກັນ ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ພົບປະກັບທ່ານເລຂາທິການໃຫຍ່ ປະທານປະເທດລາວ ບຸນຍັງ ວໍລະຈິດ. ທ່ານນາຍົກລັດຖະມົນຕີ ຫງວຽນຊວນຟຸກ ສະເຫນີ ສອງຝ່າຍເພີ່ມທະວີການເຊື່ອມຕໍ່ໃນບັນດາຂົງເຂດຄື: ເສດຖະກິດ, ພື້ນຖານໂຄງລ່າງຄົມມະນາຄົມ, ພະລັງງານ, ການທ່ອງທ່ຽວ, ນຳໃຊ້ທ່າກຳປັ່ນທະເລ, ຍົກສູງປະສິດທິຜົນການຮ່ວມມືໃນຂົງເຂດ. ການສຶກສາ, ບຳລຸງສ້າງ ແລະ ພັດທະນາແຫລ່ງຊັບພະຍາກອນມະນຸດ. ທ່ານນາຍົກລັດຖະມົນຕີ ສະເຫນີ ສອງຝ່າຍສົມທົບ, ຮ່ວມມືຢ່າງແຫນ້ນແຟ້ນກ່ຽວກັບການປ້ອງກັນຊາດ ປ້ອງກັນຄວາມສະຫງົບ ແລະ ການຕ່າງປະເທດ ເພື່ອແນໃສ່ຮັກສາສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍ ຄວາມປອດໄພຢູ່ແຕ່ລະປະເທດ, ກໍ່ສ້າງເສັ້ນຊາຍແດນຫວຽດນາມ - ລາວ ກາຍເປັນເສັ້ນຊາຍແດນສັນຕິພາບ, ມິດຕະພາບ, ການຮ່ວມມື ແລະ ພັດທະນາຢ່າງໝັ້ນຄົງ, ສົມທົບກັນສະກັດກັ້ນ ແລະ ປ້ອງກັນ ຕ້ານບັນດາອາດຊະຍາກຳຂ້າມຊາດ.
