 ທ່ານ ຮສ. ປອ. ດວ່ານກວາງວິງ, ອະທິການບໍດີມະຫາວິທະຍາໄລສັບພະວິຊາວິທະຍາ - ມະຫາວິທະຍາໄລ ດ່າໜັງ |
ທ່ານ ຮສ. ປອ. ດວ່ານກວາງວິງ, ອະທິການບໍດີມະຫາວິທະຍາໄລສັບພະວິຊາວິທະຍາ - ມະຫາວິທະຍາໄລ ດ່າໜັງ ໃຫ້ຮູ້ວ່າ, ໂຄງການດັ່ງກ່າວ ແມ່ນເພື່ອແນໃສ່ຍົກສູງສະຕິຄວາມຮັບຮູ້ກ່ຽວກັບການສຶກສາ STEM ແລະ ສົ່ງແຮງບັນດານໃຈໃຫ້ບັນດາການນຳ, ຄະນະອະທິການບໍດີ, ຄູອາຈານ, ນັກສຶກສາ ແລະ ບັນດາຝ່າຍທີ່ກ່ຽວຂ້ອງໜູນຊ່ວຍການສຶກສາ STEM ຢູ່ເຂດພາກກາງ ຫວຽດນາມ; ພັດທະນາທັກສະວິຊາອາຊີບໃຫ້ແກ່ນັກຮຽນມັດທະຍົມ ແລະ ຫຼັງຮຽນຈົບມັດທະຍົມ; ສ້າງກຳລັງຄວາມສາມາດໃຫ້ແກ່ພະນັກງານສຶກສາໃນການຈັດກິດຈະກຳຮຽນ STEM ແລະ ຜັນຂະຫຍາຍໂຄງການ ສະຖາບັນວິຊາຊີບ STEM.
ໂຄງການດັ່ງກ່າວໄດ້ຈັດກອງປະຊຸມສຳມະນາ STEM ຕ່າງໆ ໃຫ້ແກ່ຄູອາຈານ ແລະ ນັກຮຽນມັດທະນົມຕອນປາຍ; ການເສັງ STEM ເພື່ອຊຸກຍູ້ນັກຮຽນມັດທະຍົມພັດທະນາບັນດາໂຄງການປະດິດຄິດສ້າງ ແລະ ດຶງດູດນ້ອງໆເຂົ້າຮ່ວມການເຮັດວຽກເປັນກຸ່ມ, ການສື່ສານ, ແກ້ໄຂບັນຫາກໍຄືກະກຽມໃຫ້ແກ່ອະນາຄົດ; ຊຸດຝຶກອົບຮົມພັດທະນາວິຊາການໄລຍະສັ້ນ; ສະຖາບັນວິຊາຊີບ STEM, ໄດ້ຮັບສະໝັກໂຮງຮຽນມັດທະຍົມ 10 ແຫ່ງເຂົ້າຮ່ວມໂຄງການນີ້. ທ່ານ ຮສ. ປອ. ດວ່ານກວາງວິງ, ອະທິການບໍດີມະຫາວິທະຍາໄລສັບພະວິຊາວິທະຍາ - ມະຫາວິທະຍາໄລ ດ່າໜັງ ໃຫ້ຮູ້ວ່າ:
“ໂດຍຜ່ານກິດຈະກຳສົ່ງແຫຼ່ງບັນດານໃຈຕ່າງໆ ລວມມີງານວາງສະແດງວິທະຍາສາດ, ງານຕັ້ງຄ້າຍ, ປຶກສາຫາລື, ການເສັງ, ຄວາມຮັບຮູ້ຂອງວົງຄະນະຍາດກ່ຽວກັບການສຶກສາ STEMP ໄດ້ຮັບຄວາມຫວັງວ່າ ຈະໄດ້ຍົກສູງຂຶ້ນ”.
 ກອງປະຊຸມສຳມະນາເລີ່ມດຳເນີນໂຄງການ |
ທ່ານນາງ ປອ. ພອນພັນ ໄວຕະຢາງກຸນ ຜູ້ອຳນວຍການສູນ SEAMEO STEM – ED ໃຫ້ຮູ້ວ່າ, ສະຖາບັນວິຊາຊີບ STEM ໄດ້ສວມບົດບາດເໝືອນດັ່ງໂຄງການທົດລອງໃນການຜັນຂະຫຍາຍວິທີການດີທີ່ສຸດຂອງໂຄງການ Chevron Enjoy Science ໃຫ້ແກ່ຫົວໜ່ວຍຢູ່ນອກປະເທດ ໄທ. ການຮ່ວມມືນີ້ ໄດ້ຮັບຖືວ່າແມ່ນໂອກາດທີ່ດີໃນການຊຸກຍູ້ເຕັກໂນໂລຢີເຕັກນິກຢູ່ ຫວຽດນາມ ແລະ ແກ້ໄຂບັນດາຄວາມຕ້ອງການທາງດ້ານອຸດສາຫະກຳໃນອະນາຄົດຂອງ ຫວຽດນາມ. ນີ້ແມ່ນບັນຫາຮີບດ່ວນສຳລັບນະຄອນ ດ່າໜັງ, ເຊິ່ງເປັນສູນເສດຖະກິດສຳຄັນຂອງ ຫວຽດນາມ ພວມສູ້ຊົນກາຍເປັນນະຄອນອັດສະລິຍະໃນປີ 2030”.
ທ່ານ ນັນທະວຸດ ພິມແພງ - ຜູ້ຄຸ້ມຄອງໂຄງການ - ສະຖາບັນວິຊາຊີບ, ໂຄງການຍົກລະດັບຄວາມຮັບຮູ້ກ່ຽວກັບການສຶກສາ STEM, ສູນ SEAMEO STEM – ED ໃຫ້ຮູ້ວ່າ:
“ໂຄງການນີ້ດຳເນີນໃນເວລາ 18 ເດືອນ. ນີ້ແມ່ນໜຶ່ງໃນບັນດາໂຄງການລະດັບສູງກ່ຽວກັບ STEMP ເມື່ອພວກຂ້າພະເຈົ້ານຳເຂົ້າເຄື່ອນໄຫວຢູ່ໃນເຄືອຂ່າຍໂຮງຮຽນ STEM , ພັດທະນາຮູບແບບ ແນໃສ່ສົ່ງເສີມການສຶກສາກ່ຽວກັບ STEM, ໃນນັ້ນ ສຸມໃສ່ຂົງເຂດວິຊາຊີບ, ທັກສະ, ເຕັກໂນໂລຢີຂໍ້ມູນຂ່າວສານໃນອະນາຄົດ. ພວກຂ້າພະເຈົ້າໄດ້ຮຽນຮູບແບບນີ້ຈາກ ອາເມລິກາ ແລະ ໝູນໃຊ້ເຂົ້າໃນປະເທດ ໄທ. ແລະ ປັດຈຸບັນ, ພ້ອມກັບມະຫາວິທະຍາໄລ ດ່າໜັງ, ພວກຂ້າພະເຈົ້າ ຈະເປີດກວ້າງຮູບແບບນີ້. ກ່ຽວກັບການໜູນຊ່ວຍ ຫວຽດນາມ ໃນຂົງເຂດນີ້, ພວກຂ້າພະເຈົ້າ ໄດ້ນຳມາເຊິ່ງແຫຼ່ງຊັບພະຍາກອນຫຼາຍຢ່າງໃນຂົງເຂດນີ້ ກໍຄືບັນດານັກຊ່ຽວຊານເພື່ອດຳເນີນ, ເຊື່ອມຕໍ່ເຕົ້າໂຮມບັນດາຄູ່ຮ່ວມມືເຂົ້າກັນ”.
 ແຜນວາດແນະນຳກ່ຽວກັບໂຄງການ |
ເມື່ອຕີລາຄາກ່ຽວກັບການຮ່ວມມືລະຫວ່າງມະຫາວິທະຍາໄລສັບພະວິຊາວິທະຍາ, ມະຫາວິທະຍາໄລ ດ່າໜັງ ກັບບັນດາຄູ່ຮ່ວມມືຂອງ ໄທ, ທ່ານ ປອ. ຫງວຽນແທັງບິ່ງ - ຫ້ອງວິທະຍາສາດເຕັກໂນໂລຢີ ແລະ ຮ່ວມມືສາກົນ, ມະຫາວິທະຍາໄລສັບພະວິຊາວິທະຍາ, ມະຫາວິທະຍາໄລດ່າໜັງ ໃຫ້ຮູ້ວ່າ:
“ບັນດາຄູ່ຮ່ວມມືໄທ, ພິເສດແມ່ນອົງການ SEAMEO STEM – ED ໄທ ໄດ້ແບ່ງປັນປະສົບການໃນການປະຕິບັດໂຄງການ ສະຖາບັນວິຊາຊີບ ຢູ່ ໄທ ແລະ ສະແດງຄວາມປາດຖະໜາຢາກຜັນຂະຫຍາຍຮູບແບບການສຶກສານີ້ຢູ່ບັນດາປະເທດໃນພາກພື້ນ ອາຊີຕາເວັນອອກສ່ຽງໃຕ້. ມະຫາວິທະຍາໄລສັບພະວິຊາວິທະຍາ ດ່າໜັງ ແມ່ນຫົວໜ່ວຍທຳອິດໃນພາກພື້ນຜັນຂະຫຍາຍຮູບແບບນີ້. ທາງຝ່າຍ SEAMEO STEM – ED ໄທ ໄດ້ຈັດສົ່ງນັກຊ່ຽວຊານມາໜູນຊ່ວຍແບບວິທີການສ້າງສະຖາບັນຄືແນວໃດ. ພວກຂ້າພະເຈົ້າກໍໄດ້ແລກປ່ຽນກັບຝ່າຍ SEAMEO STEM – ED ໄທ ເປັນປະຈຳໃນໄລຍະປະຕິບັດໂຄງການນີ້”.
ໂຄງການ “ສະຖາບັນວິຊາຊີບ STEM ເຂດພາກກາງ ຫວຽດນາມ” ລະດົມທຶນໄດ້ທັງໝົດ 194.500 USD. ໃນນັ້ນ, ກຸ່ມບໍລິສັດ Chevron ປະກອບ 150.000 USD ແລະ ມະຫາວິທະຍາໄລ ຊັບພະວິຊາວິທະຍາ - ມະຫາວິທະຍາໄລ ດ່າໜັງ ປະກອບ 44.500 USD. ພາຍຫຼັງປະຕິບັດສຳເລັດລາຍການທົດລອງ ຈະນຳສະເໜີຜົນງານໃຫ້ແກ່ບັນດາຝ່າຍທີ່ກ່ຽວຂ້ອງ, ລັດຖະບານ ແລະ ພາກເອກະຊົນ ເພື່ອພິຈາລະນາການຂະຫຍາຍໂຄງການດັ່ງກ່າວ./.
