នៅលើវេទិកា​បណ្តាញសង្គម X លោក Tedros Adhanom Ghebreyesus បាន​ឲ្យ​ដឹងថា ខេត្ត Ituri ដែលជាចំណុចកណ្តាលនៃការផ្ទុះឡើងជំងឺ បច្ចុប្បន្ននេះ មានមនុស្សជិត ៥ លាននាក់រស់នៅក្នុងបរិបទ​ដែល​ជម្លោះ​អូសបន្លាយ ដោយមានប្រជាជនប្រហែល ២៥% ត្រូវការជំនួយមនុស្សធម៌ និង ២០% ជាអ្នកផ្លាស់​ទីលំនៅក្នុងស្រុក។ លោកបានសង្កត់ធ្ងន់ថា អំពើហិង្សាកំពុងបង្ខំឱ្យប្រជាជន រួមទាំងបុគ្គលិកសុខាភិបាល និងកង​កម្លាំង​ជួយ​សង្គ្រោះមនុស្សធម៌ ចាកចេញពីលំនៅដ្ឋាន ដែលរារាំងដល់កិច្ចខិតខំប្រឹងប្រែងក្នុងការគ្រប់គ្រងការផ្ទុះឡើង​នៃជំងឺនេះ។ អគ្គនាយកអង្គការសុខភាពពិភពលោកបានសង្កត់ធ្ងន់ថា ការផ្តល់កញ្ចប់ថែទាំសុខភាពដ៏ទូលំទូលាយគឺជាគន្លឹះ ដើម្បីបំពេញតម្រូវការសុខាភិបាលជាបន្ទាន់ និង​ដើម្បីកសាងទំនុកចិត្តនៅក្នុងសហគមន៍​ផងដែរ​។

នៅថ្ងៃដដែលនោះ ក្រសួងផ្សព្វផ្សាយនៃសាធារណរដ្ឋប្រជាធិបតេយ្យកុងហ្គោបានបញ្ជាក់ថា គិតត្រឹមថ្ងៃទី ២៤ ខែឧសភា ប្រទេសនេះមានករណីសង្ស័យចំនួន ៩០៤ ករណី និងករណីស្លាប់ដែល​សង្ស័យថាឆ្លងជំងឺ​ចំនួន ១១៩ ករណី ភាគច្រើននៅខេត្ត Ituri។ ជំងឺនេះក៏បានលេចឡើងនៅក្នុងខេត្ត North Kivu និង South Kivu ហើយបានរីករាលដាល​ដល់ប្រទេសអ៊ូហ្គង់ដា៕​