ថ្លែងទៅកាន់អ្នកសារព័ត៌មានមុនកិច្ចប្រជុំ លោកប្រធានាធិបតី វ៉ុលដូ ឌីមៀរ ហ្សេលេនស្គី បាននិយាយថា ការពិភាក្សារវាងទីក្រុងវ៉ាស៊ីនតោន និងទីក្រុងគៀវ មានវឌ្ឍនភាពក្នុងខែកន្លងមក ហើយលោកសង្ឃឹមថា សន្តិភាពអាចត្រូវបានស្តារឡើងវិញឱ្យបានឆាប់តាម ដែលអាចធ្វើទៅបាន។ លោកប្រធានាធិបតី វ៉ុលដូឌីមៀរ ហ្សេលេនស្គី ក៏បានបញ្ជាក់ផងដែរថា ចំណុចសំខាន់នៃកិច្ចប្រជុំរបស់លោកជាមួយប្រធានាធិបតី ដូណាល់ ត្រាំ គឺផែនការសន្តិភាព ២០ ចំណុច និងដំណើរការសម្រាប់ដោះស្រាយជម្លោះ។ លោកប្រធានាធិបតីអ៊ុយក្រែន បានថ្លែងអំណរគុណដល់ប្រធានាធិបតីអាមេរិក ដែលបានចំណាយពេលវេលាដើម្បីជួបប្រជុំគ្នា ហើយបានបន្ថែមថា មន្ត្រីមកពីសហរដ្ឋអាមេរិក និងអ៊ុយក្រែន បានធ្វើការលើឯកសារផ្សេងៗ ហើយផែនការសន្តិភាព ២០ចំណុច បានបង្ហើយដល់ ៩០%។ ក្នុងពេលជាមួយគ្នានោះ លោកប្រធានាធិបតីអាមេរិក លោក ដូណាល់ ត្រាំ បាននិយាយថា លោកបានទូរស័ព្ទជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន មុនពេលកិច្ចប្រជុំរបស់លោកជាមួយប្រធានាធិបតីអ៊ុយក្រែន លោក វ៉ុលដូឌីមៀរ ហ្សេលេនស្គី ហើយនឹងបន្តនិយាយជាមួយប្រធានាធិបតីរុស្ស៊ីភ្លាមៗបន្ទាប់ពីកិច្ចប្រជុំ។ ប្រធានាធិបតី ត្រាំ បានបញ្ជាក់ថា ប្រធានាធិបតីរុស្ស៊ី វ្ល៉ាឌីមៀរ ពូទីន មានចេតនាចង់បញ្ចប់ជម្លោះនេះ ហើយមិនបានកំណត់ថ្ងៃផុតកំណត់ណាមួយសម្រាប់ការធ្វើដូច្នេះទេ។ភាគីទាំងពីរបានបញ្ចប់កិច្ចព្រមព្រៀងសន្តិភាព។ ប្រធានាធិបតីអាមេរិកបាននិយាយថា លោកជឿជាក់ថា ប្រធានាធិបតីអ៊ុយក្រែន និងរុស្ស៊ីទាំងពីរចង់ឈានដល់កិច្ចព្រមព្រៀងសន្តិភាព៕