 ພິທີມອບຮັບຮູບເຄິ່ງຄີງ |
ໃນຊຸມວັນທ້າຍເດືອນ ເມສາ, Team Lee ໄດ້ໄປຜ່ານໄລຍະທາງທີ່ມີຄວາມຍາວເກືອບ 500 km ຈາກ ຮ່າໂນ້ຍ ຂຶ້ນໄປຍັງ ດ້ຽນບຽນ. ເຖິງວ່າໄລຍະທາງຈະໄກ, ອາກາດແດດຮ້ອນ, ຫຍຸ້ງຍາກລຳບາກກໍຕາມ ແຕ່ໃຜໆກໍຮູ້ສຶກຕື່ນເຕັ້ນ, ຕື້ນຕັນໃຈ ແລະ ກະຕືລືລົ້ນ ເມື່ອເດີນທາງມາຮອດດິນແດນແຫ່ງປະຫວັດສາດ ດ້ຽນບຽນຝູ. ອ້າຍ ເລກວຽດຖັງ, ຫົວໜ້າ Team Lee ແບ່ງປັນວ່າ:
“ການເດີນທາງມາ ດ້ຽນບຽນ ໃຊ້ເວລາປະມານ 12 ຊົ່ວໂມງ. ຂ້າພະເຈົ້າ ແລະ ບັນດາສະມາຊິກໃນທິມບໍ່ເຄີຍມາ ດ້ຽນບຽນ ຈັກເທື່ອ ສະນັ້ນ ຮູ້ສຶກຕື່ນເຕັ້ນຫຼາຍ. Team Lee ໄດ້ໄປມອບຮູບເຄິ່ງຄີງຂອງນັກຮົບວິລະຊົນ 30 ຄົນ ທີ່ພວກຂ້າພະເຈົ້າໄດ້ແຕ່ງໃໝ່ຈາກຮູບເກົ່າ”.
ເພືື່ອເຮັດພາບເຄິ່ງຄີງ 30 ແຜ່ນຄືນໃໝ່ໄດ້ສຳເລັດນັ້ນ ແມ່ນສິ່ງທ້າທາຍອັນໃຫຍ່ຫຼວງສຳລັບ Team Lee, ເພາະວ່າ ການເຮັດບັນດາລາຍລະອຽດທີ່ກ່ຽວຂ້ອງເຖິງປະຫວັດສາດຂອງຊາດຄືນໃໝ່ນັ້ນ ບໍ່ແມ່ນເລື່ອງງ່າຍ, ໂດຍສະເພາະແມ່ນສຳລັບຊາວໜຸ່ມ ຜູ້ທີ່ໄດ້ກຳເນີດ ແລະ ເຕີບໃຫຍ່ໃນສະໄໝສັນຕິພາບ. ດ້ວຍເຕັກໂນໂລຢີ 4.0, Team Lee ໄດ້ປັບແຕ່ງໃໝ່ຮູບເຄິ່ງຄີງຂອງບັນດານັກຮົບເສຍສະຫຼະຊີວິດເພື່ອຊາດ ເພື່ອມອບໃຫ້ຄອບຄົວຂອງເຂົາເຈົ້າ. ທ້າວ ຟຸ່ງກວາງຈູງ, ສະມາຊິກໃນ Team Lee ໃຫ້ຮູ້ວ່າ:
“ໃນວິວັດການປັບແຕ່ງຮູບຄືນໃໝ່ນັ້ນ ກໍປະສົບກັບຄວາມຫຍຸ້ງຍາກຄື ຮູບເກົ່າບໍ່ເຫັນແຈ້ງແລ້ວ, ແຕ່ຍາກທີ່ສຸດແມ່ນຊຸດທະຫານ, ມີຫຼາຍສ່ວນຍ່ອຍເຮັດຍາກຫຼາຍ. ທິມງານພວກຂ້າພະເຈົ້າ ຕ້ອງປຶກສານຳຫໍພິພິທະພັນໄຊຊະນະ ດ້ຽນບຽນຝູ ແລ້ວນັ່ງປະຊຸມ, ປຶກສາຫາລືກັນເປັນຫຼາຍຄືນ ຈຶ່ງສາມາດເຮັດໄດ້ຢ່າງຊັດເຈນ ແລະ ດີທີ່ສຸດ. ວິວັດການຂອງທິມງານມາຮອດປັດຈຸບັນນີ້ ບໍ່ພຽງແຕ່ແມ່ນການເຮັດຮູບຄືນໃໝ່ແລ້ວ, ຫາກຍັງມີຄວາມປາດຖະໜາຢາກເປັນຂົວເຊື່ອມຕໍ່ລະຫວ່າງອະດີດຕະການ, ປັດຈຸບັນ ກັບ ອະນາຄົດ ເພື່ອໃຫ້ບັນດາເພື່ອນໜຸ່ມບໍ່ຫຼົງລືມປະຫວັດສາດ. ພວກຂ້າພະເຈົ້າຢາກເປັນຂົວຕໍ່ແຜ່ກະຈາຍຄຸນຄ່ານີ້ຫຼາຍກວ່າອີກ ເພື່ອໃຫ້ບັນດາເພື່ອນໜຸ່ມພ້ອມກັນເຂົ້າຮ່ວມການເຄື່ອນໄຫວສະແດງຄວາມຮູ້ບຸນຄຸນບັນດາຄອບຄົວນັກຮົບເສຍສະຫຼະຊີວິດເພື່ອຊາດ”.
 ຮູບເຄິ່ງຄີງບັນດານັກຮົບວິລະຊົນ ໄດ້ວາງສະແດງຢູ່ຫໍພິພິທະພັນໄຊຊະນະ ດ້ຽນບຽນຝູ |
ບັນດາຮູບເຄິ່ງຄີງນັກຮົບວິລະຊົນກຳລັງປະກອບອາວຸດປະຊາຊົນໃນບັ້ນຮົບ ດ້ຽນບຽນຝູ ໄດ້ໃສ່ໃນຂອບຮູບທີ່ມີສີສັນຢ່າງມີຊີວິດຊີວາ, ແທ້ຈິງໃນແຕ່ລະລາຍລະອຽດ ເຊິ່ງໄດ້ໄວ້ຢ່າງສົມກຽດຢູ່ຂ້າງລຸ່ມຮູບຂາວດຳຂອງບັນດາອ້າຍທະຫານນັ້ນ ໄດ້ເຮັດໃຫ້ຜູ້ຊົມຫຼາຍຄົນຕື້ນຕັນໃຈ.
“ບັນດາຮູບເຄິ່ງຄີງນີ້ໄດ້ຮັບການເຮັດໃໝ່ຢ່າງມີຊີວິດຊີວາ ແລະ ງາມຫຼາຍ. ເມື່ອເຫັນຮູບ, ເຫັນຊື່ນາມສະກຸນ, ເຫັນອາຍຸ ແລະ ສີໜ້າຂອງບັນດານັກຮົບວິລະຊົນນັ້ນ ຂ້າພະເຈົ້າຮູ້ສຶກເອກອ້າງທະນົງໃຈທີ່ສຸດ”.
“ຮູບງາມຫຼາຍ ແລະ ສະແດງໄດ້ໃຫ້ເຫັນສີໜ້າທ່າທີຂອງບັນດານັກຮົບວິລະຊົນຢ່າງຈະແຈ້ງ. ຜ່ານນັ້ນ ກໍເປັນການພິສູດໃຫ້ເຫັນເຖິງການລະນຶກຂອງພວກເຮົາ, ຂອງຜູ້ທີ່ກຳລັງມີຊີວິດຢູ່ ມີຕໍ່ຜູ້ທີ່ໄດ້ເສຍສະຫຼະຊີວິດ. ການກະທຳຂອງບັນດາເພື່ອນໜຸ່ມນີ້ ເປັນໜ້ານັບຖືທີ່ສຸດ”.
 ບັນດາຮູບພາບທີ່ມີຊີວິດຊີວານີ້ ໄດ້ເຮັດໃຫ້ຜູ້ຊົມຫຼາຍຄົນຕື້ນຕັນໃຈ |
ຮູບເຄິ່ງຄີງຂອງນັກຮົບວິລະຊົນກຳລັງປະກອບອາວຸດປະຊາຊົນ 30 ຄົນ ທີ່ໄດ້ຮັບການປັບແຕ່ງສີໃໝ່ໃນຄັ້ງນີ້ ໄດ້ວາງສະແດງຢູ່ຫໍພິພິທະພັນໄຊຊະນະ ດ້ຽນບຽນຝູ ຢູ່ແຂວງ ດ້ຽນບຽນ. ນັ້ນແມ່ນຮູບເຄິ່ງຄີງຂອງນັກຮົບວິລະຊົນ ເບ໋ວັນດ່ານ ເອົາຮ່າງກາຍເປັນຖານຍິງປືນ, ນັກຮົບວິລະຊົນ ໂຕຫວິງຢ້ຽນ ເອົາຮ່າງກາຍຂອງຕົນມາເປັນທ່ອນຢັດລູກປືນໃຫຍ່, ນັກຮົບວິລະຊົນ ຟານດິ່ງຢອດ ເອົາຮ່າງກາຍປິດປ່ອງຍິງປືນ… ບັນດາຮູບພາບທີ່ມີຊີວິດຊີວານັ້ນ ໄດ້ເຮັດໃຫ້ຜູ້ຊົມ ມີຄວາມຮູ້ສຶກວ່າ ພວກອ້າຍທະຫານນັ້ນ ຍັງຢູ່ຕໍ່ໜ້າພວກເຮົາໃນທ່າມກາງຊີວິດປະຈຳວັນ. ທ່ານນາງ ຫວູທິຕວຽດງາ, ຜູ້ອຳນວຍການຫໍພິພິທະພັນໄຊຊະນະ ດ້ຽນບຽນຝູ ໃຫ້ຮູ້ວ່າ:
“ເມື່ອໄດ້ຮັບຮູບເຄິ່ງຄີງຈຳນວນ 30 ຮູບນັ້ນ, ພວກຂ້າພະເຈົ້າກໍຮູ້ສຶກຕື້ນຕັນໃຈທີ່ສຸດ ເພາະວ່າ ໜ້າຕາຂອງບັນດານັກຮົບວິລະຊົນລ້ວນແຕ່ສະແດງໃຫ້ເຫັນອັດທະຍາໄສພິເສດສະເພາະຂອງແຕ່ລະຄົນ, ແວວຕາ ກໍຄືສີໜ້າຂອງເຂົາເຈົ້າແມ່ນແທ້ຈິງທີ່ສຸດ. Team Lee ບໍ່ພຽງແຕ່ປັບແຕ່ງສີຮູບຄືນໃໝ່ດ້ວຍຄວາມເມົາມົວເທົ່ານັ້ນ ຫາກເຂົາເຈົ້າໄດ້ເຮັດດ້ວຍຫົວໃຈຂອງຕົນ ຈຶ່ງສາມາດນຳຜົນງານທີ່ສວຍງາມທີ່ສຸດ ແລະ ພິລະອາດຫານທີ່ສຸດຂອງບັນດານັກຮົບວິລະຊົນມາໃຫ້ແກ່ມະຫາຊົນ”.
ພາຍຫຼັງໄດ້ຮັບການສ້າງຕັ້ງມາໄດ້ 2 ປີ, ທິມງານ Team Lee ໄດ້ປັບແຕ່ງສີຮູບນັກຮົບເສຍສະຫຼະຊີວິດເພື່ອຊາດຈຳນວນກວ່າ 1.000 ຄົນ ເພື່ອມອບໃຫ້ຄອບຄົວຂອງເຂົາເຈົ້າ. ນັ້ນກໍແມ່ນການສະແດງຄວາມຮູ້ບຸນຄຸນຂອງຄົນລຸ້ນໜຸ່ມໃນວັນນີ້ ທີ່ມີຕໍ່ລຸ້ນພໍ່ລຸ້ນອ້າຍ, ຜູ້ທີ່ໄດ້ເສຍສະຫຼະຊີວິດຢ່າງພິລະອາດຫານເພື່ອເອກະລາດຂອງຊາດ./.
