ໂດຍໄດ້ກຳເນີດ ແລະ ເຕີບໃຫຍ່ຂຶ້ນຢູ່ແຂວງ ຊັອກຈັງ ເມື່ອກ່ອນນີ້ ປັດຈຸບັນແມ່ນແຂວງ ເກິ່ນເທີ, ເຂດດິນແດນທີ່ອຸດົມຮັ່ງມີຕິດພັນກັບມູນເຊື້ອກະສິກຳມາແຕ່ດົນນານ, ທ່ານ ໂຮ່ກວາງກົວ ໄດ້ຫຼໍ່ລ້ຽງຄວາມເມົາມົວກັບຕົ້ນເຂົ້າ. ຮຽນຈົບຂະແໜງປູກຝັງ ເມືອ່ປີ 1978, ທ່ານ ກົວ ໄດ້ຜ່ານຫຼາຍຕຳແໜ່ວຽກງານ ຈາກຂະແໜງກະສິກຳພັດທະນາຊົນບົດ ເມືອງ ໝີຊວຽນ ຕະຫຼອດຮອດຮອງຫົວໜ້າພະແນກວິທະຍາສາດເຕັກໂນໂລຢີ, ຮອງຫົວໜ້າພະແນກກະສິກຳ ແລະ ພັດທະນາຊົນນະບົດ ແຂວງ ຊັອກຈັງ. ແຕ່ທ່ານໄດ້ເລືອກເອົາເສັ້ນທາງຜູກພັນກັບການຄົ້ນຄວ້າປະສົມພັນເຂົ້າ ດ້ວຍຄວາມຫວັງຢາກຊ່ວຍຊາວກະສິກອນຫຼຸດຜ່ອນຄວາມລຳບາກ ແລະ ມີການດຳລົງຊີວິດເປັນປົກກະຕິກວ່າເກົ່າ. ທ່ານ ກົວ ໃຫ້ຮູ້ວ່າ:
“ວິວັດການເຮັດແນວພັນເຂົ້າຂອງພວກຂ້າພະເຈົ້າແມ່ນໃຊ້ເວລານານ. ເຮັດແນວໃດເພື່ອໃຫ້ແນວພັນເຂົ້າຫອມ ປູກໃນໄລຍະສັ້ນລົງ, ຄຸນນະພາບສູງກວ່າ. ນັ້ນແມ່ນບັນຫາທີ່ວາງອອກໃນໄລຍະນັ້ນ ເພື່ອສ້າງລະບົບນິເວດຄືໃນປັດຈຸບັນ”.
ນັບແຕ່ຊຸມປີ 1990 ໂຮ່ຫວາງກົວ ພ້ອມກັບເພື່ອນຮ່ວມງານໄດ້ເລີ່ມຕົ້ນເສັ້ນທາງປະສົມພັນເຂົ້າ ທີ່ມີເຄື່ອງໝາຍການຄ້າ ST ນັບແຕ່ນັ້ນມາບັນດາພັນເຂົ້າໄດ້ກຳເນີດຂຶ້ນຄື ST 3, ST 5, ST 10, ST 20… ແຕ່ລະແນວພັນເຂົ້າກໍ່ແມ່ນບາດກ້າວເດີນທາງດ້ານສະມັດຕະພາບ ຄຸນນະພາບ ແລະ ຄວາມສາມາດແທດເໝາະກັບທີ່ດິນ ອາກາດ. ແຕ່ຕ້ອງໃຊ້ເວລາກວ່າ 20 ປີ ທ່ານພ້ອມກັບເພື່ອນຮ່ວມງານຈຶ່ງສາມາດສ້າງບາດກ້າວບຸກທະລຸຢ່າງແທ້ຈິງ ດ້ວຍ ST 25 ເຊິ່ງແມ່ນແນວພັນເຂົ້າມີຄຸນນະພາບສົມບູນ. ທ່ານ ກົວ ໃຫ້ຮູ້ອີກວ່າ:
“ປັດຈຸບັນຈະເຫັນແນວພັນເຂົ້າໃໝ່ຢູ່ເຂດແຫຼມ ກ່າເມົາ, ເຮັດແນວໃດເພື່ອມີການປ່ຽນແປງໃໝ່. ໝາຍຄວາມວ່າ ມີເຂົ້າແລ້ວ ໂຕກຸ້ງກໍ່ຂະຫຍາຍປົກກະຕິກວ່າເກົ່າ ໃຜປູກເຂົ້າໃນປັດຈຸບັນກໍ່ເປັນການດີ, ລາຍຮັບຈາກການລ້ຽງກຸ້ງ ແລະ ຕົ້ນເຂົ້າ ST 25 ກໍ່ເທົ່າທຽມກັນ”.
ບັນດາການປະກອບສ່ວນຂອງທ່ານ ກົວ ໄດ້ຮັບການຢັ້ງຢືນດ້ວຍບັນດາລາງວັນອັນສູງສົ່ງ. ທ່ານມີກຽດໄດ້ຮັບຫຼາຍຫຼຽນໄຊແຮງງານຊັ້ນຕ່າງໆ ໄດ້ຮັບນາມມະຍົດວິລະຊົນແຮງງານໃນປີ 2013. ພິເສດໃນປີ 2021 ທ່ານ ແລະ ກຸ່ມນັກຄົ້ນຄວ້າໄດ້ຮັບລາງວັນ ໂຮ່ຈີມິນ ກ່ຽວກັບວິທະຍາສາດ ແລະ ເຕັກໂນໂລຢີ ຈາກພັກ ແລະ ລັດ. ປະລິນຍາເອກ ເຈິ່ນຫງອກແທັກ ຫົວໜ້າສະຖາບັນເຂົ້າເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ຖືວ່າ:
“ນັບແຕ່ໄລຍະເຂົ້າເຕີບໂຕເປັນໄລຍະສັ້ນ, ເຮົາໄດ້ຄ່ອຍໆຍົກສູງປະສິດທິຜົນການຜະລິດ ດ້ວຍບັນດາແນວພັນເຂົ້າສາມາດຕ້ານຢັນກັບສັດຕູພືດ, ສາມາດຕ້ານຢັນກັບເງື່ອນໄຂທີ່ບໍ່ດີຂອງສິ່ງແວດລ້ອມ ແລະ ຄ່ອຍໆກາຍເປັນແນວພັນເຂົ້າທີ່ແຊບນົວ. ພວກເຮົາກໍ່ມີຄວາມເອກອ້າງທະນົງໃຈຕໍ່ການເຂົ້າຮ່ວມໃນຕະຫຼາດສົ່ງອອກເຂົ້າສານ”.
ບັນດາການປະກອບສ່ວນວິລະຊົນແຮງງານ ໂຮ່ກວາງກົວ ໄດ້ກາຍເປັນຄວາມເປັນກຽດ ແລະ ເອກອ້າງທະນົງໃຈຢ່າງໃຫຍ່ຫຼວງຕໍ່ຂະແໜງເຂົ້າສານ ຫວຽດນາມ. ທ່ານ ເລແທັງຕຸ່ງ ຮອງປະທານຜູ້ປະຈຳການ ທັງເປັນເລຂາທິການໃຫຍ່ສາສະມາຄົມຂະແໜງສິນຄ້າເຂົ້າສານ ຫວຽດນາມ ໃຫ້ຮູ້ວ່າ:
“ຫວຽດນາມ ໄດ້ມີສາມຄັ້ງທີ່ເຂົ້າສານ ST 25 ຖືກຈັດຢູ່ໃນໃນໝວດສິນຄ້າແຖວໜ້າຂອງໂລກ. ການປະກອບສ່ວນໃນການຄົ້ນຄວ້າ, ປະສົມພັນເຂົ້າເພື່ອໃຫ້ກຳເນີດ ST 25 ຂອງວິລະຊົນແຮງງານ ໂຮ່ກວາງກົວ ແມ່ນເປັນໜ້າຮັບຮູ້ ນີ້ແມ່ນແນວພັນເຂົ້າມີກິ່ນຫອມຂອງດອກຊ້ອນ ທັງມີລົດຫອມຂອງໝາກນັດ”.
ເລື່ອງລາວກ່ຽວກັບນັກວິລະຊົນແຮງງານ ໂຮ່ກວາງກົວ ແມ່ນຫຼັກຖານທີ່ມີຊີວິດຊີວາໃຫ້ແກ່ກຳລັງແຮງທາງດ້ານວິທະຍາສດ ເຕັກໂນໂລຢີ ຂະນະທີ່ຕິດພັນກັບພຶດຕິກຳຕົວຈິງ. ຄວາມເມົາມົວ ແລະ ຄວາມມານະອົດທົນຄົ້ນຄວ້າຢ່າງບໍ່ຮູ້ອິດຮູ້ເມື່ອຍ, ທ່ານ ກົວ ໄດ້ປະກອບສ່ວນນຳເຄື່ອງໝາຍ ຫວຽດນາມ ກ້າວໄປໄກໃນຕະຫຼາດສາກົນ.
