ການຢ້ຽມຢາມມິດຕະພາບ ສປປ ລາວ ຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນອາທິດຜ່ານມາ ພິເສດແມ່ນການຢ້ຽມຢາມມິດຕະພາບ ສປປ ລາວ ຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນອາທິດຜ່ານມາ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງມ ຜູ້ອ່ານໄດ້ຝາກມາລາຍການ. ເຊີນທ່ານຕິດຕາມຮັບຟັງ. ໃນອາທິດຜ່ານມາ, ເພື່ອນ ລັດດາພອນ, ວິລາວັນ, ໄພວອນ ແລະ ເພື່ອນ ພົມວິສັນໄດ້ສົ່ງອີແມວມາຫາລາຍການດ້ວຍເນື້ອໃນວ່າ: “ຂອບໃຈລາຍການພາກພາສາລາວ, ລະບົບກະຈາຍສຽງພາສາຕ່າງປະເທດແຫ່ງຊາດ, VOV ໄດ້ແນະນຳໃຫ້ພວກຂ້າພະເຈົ້າມີຄວາມເຂົ້າໃຈຕື່ມອີກ ກ່ຽວກັບກົດລະບຽບການເສັງ “ຊອກຮູ້ປະຫວັດສາດການພົວພັນແບບພິເສດ ຫວຽດນາມ - ລາວ”. ໃນຈົດໝາຍຝາກມາຍັງລາຍການ ເພື່ອນ ອຸດົມໄຊ ຈັນທະວົງ ຢູ່ແຂວງ ຄຳມ່ວນ ແລະ  ເພື່ອນ ແປງ ແກ້ວມະນີ ຢູ່ນະຄອນຫລວງ ວຽງຈັນ ຂຽນວ່າ: “ຍ້ອນຄ້າງຄາກັບການໄປປະຕິບັດງານຢູ່ຕ່າງປະເທດ, ສະນັ້ນ ຂ້າພະເຈົ້າບໍ່ທັນໄດ້ອັບເດັດຂ່າວຄາວກ່ຽວກັບການຢ້ຽມຢາມມິດຕະພາບ ສປປ ລາວ ຂອງທ່ານນາຍົກລັດຖະມົນຕີ ຫງວຽນຊວນຟຸກ, ດັ່ງນັ້ນ ຂ້າພະເຈົ້າຢາກຮູ້ແຈ້ງຕື່ມອີກກ່ຽວກັບບັນດາການເຄື່ອນໄຫວຂອງ ທ່ານນາຍົກລັດຖະມົນຕີ ຫວຽດນາມ ຢູ່ ລາວ ໃນການຢ້ຽມຢາມຜ່ານມາ? ຫວັງວ່າທາງລາຍການຈະແນະນຳເພື່ອໃຫ້ຂ້າພະເຈົ້າໄດ້ຮັບຮູ້ຕື່ມອີກ. ຂໍຂອບໃຈ”. ເພື່ອນ ອຸດົມໄຊ ຈັນທະວົງ ແລະ  ເພື່ອນ ແປງ ແກ້ວມະນີ ທີ່ຮັກແພງ ! ເພື່ອຊອກຮູ້ລາຍລະອຽດກ່ຽວກັບການຢ້ຽມຢາມ ລາວ ຂອງທ່ານນາຍົກລັດຖະມົນຕີ ຫງວຽນຊວນຟຸກ, ພວກເພື່ອນສາມາດເຂົ້າເວັບໄຊ vovworld.vn ພາກພາສາລາວ. ກ່ອນອື່ນໝົດ ພວກຂ້າພະເຈົ້າຂໍແນະນຳບາງການເຄື່ອນໄຫວພົ້ນເດັ່ນຂອງທ່ານນາຍົກລັດຖະມົນຕີ ຫງວຽນຊວນຟຸກ ຢູ່ ລາວ. ນີ້ແມ່ນການຢ້ຽມຢາມ ລາວ ເປັນຄັ້ງທຳອິດຂອງທ່ານນາຍົກລັດຖະມົນຕີ ຫງວຽນຊວນຟຸກ ແລະ ແມ່ນການເຄື່ອນໄຫວສຳຄັນ, ເລີ່ມເຄື່ອນໄຫວ “ປີສາມັກຄີມິດຕະພາບ ຫວຽດນາມ - ລາວ 2017”. ໃນໄລຍະຢູ່ຢ້ຽມຢາມ ລາວ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເຂົ້າຢ້ຽມຂ່ຳນັບທ່ານເລຂາທິການໃຫຍ່, ປະທານປະເທດ ລາວ ບຸນຍັງ ວໍລະຈິດ; ເຈລະຈາກັບທ່ານນາຍົກລັດຖະມົນຕີ ທອງລຸນ ສີສຸລິດ; ພົບປະກັບທ່ານນາງປະທານສະພາແຫ່ງຊາດ ປານີ ຢາທໍ່ຕູ້ ແລະ ຢ້ຽມຢາມບັນດາສະຫາຍອະດີດການນຳຂັ້ນສູງຂອງພັກ, ລັດລາວ…ທີ່ບັນດາການພົບປະເຈລະຈາ, ການນຳ 2 ປະເທດໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ; ແລກປ່ຽນບັນດາແຜນນະໂຍບາຍ, ມາດຕະການ ເພື່ອສືບຕໍ່ນຳການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ, ລາວ - ຫວຽດນາມ ພັດທະນາຢ່າງເລິກເຊິ່ງກ້ວາງຂວາງ ແລະ ມີປະສິດທິຜົນ. 2 ຝ່າຍຢືນຢັນຄວາມສຳຄັນ ແລະ ເຫັນດີເປັນເອກະພາບພ້ອມກັນມານະພະຍາຍາມ ເພື່ອຊຸກຍູ້, ເປີດກ້ວາງ ແລະ ຍົກສູງປະສິດທິຜົນແຫ່ງການຮ່ວມມືໃນຂົງເຂດເສດຖະກິດ, ການລົງທຶນ, ການຄ້າ, ການຄົມມະນາຄົມ - ຂົນສົ່ງ…ໃນນັ້ນ ນາຍົກລັດຖະມົນຕີ 2 ທ່ານໄດ້ເປັນສັກຂີພິຍານພິທີລົງນາມໃນເອກະສານຮ່ວມມື ຫວຽດນາມ - ລາວ 9 ສະບັບ. 2 ຝ່າຍສືບຕໍ່ເນັ້ນໜັກເຖິງຄວາມສຳຄັນຂອງເລື່ອງຮັກສາສັນຕິພາບ, ສະຖຽນລະພາບ, ຄວາມສະຫງົບປອດໄພຢູ່ທະເລຕາເວັນອອກ; ເຫັນດີເປັນເອກະພາບຊຸກຍູ້ ແກ້ໄຂບັນດາການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ ບົນພື້ນຖານກົດໝາຍສາກົນ, ໃນນັ້ນ ມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS 1982); ພ້ອມກັບບັນດາຝ່າຍທີ່ກ່ຽວຂ້ອງປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ບັນລຸໄດ້ກົດແຫ່ງການປະພຶດຢູ່ທະເລຕາເວັນອອກ (COC) ໂດຍໄວ, ລວມມີ ສ້າງສຳເລັດກອບຂອງກົດແຫ່ງການປະພຶດຢູ່ທະເລຕາເວັນອອກ (COC) ໃນກາງປີ 2017, ປະກອບສ່ວນຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ. ໃນຈົດໝາຍຂອງເພື່ອນ ດວງຕາ ຢູ່ແຂວງ ສາລະວັນ ຂຽນວ່າ: ຜ່ານມາ ຂ້າພະເຈົ້າໄດ້ຕິດຕາມພາບສາລະຄະດີ “ລົດຖັງເລກໝາຍ 390 ຕຳປະຕູທຳນຽບເອກະລາດໃນຕອນທ່ຽງວັນທີ 30/04/1975. ຂ້າພະເຈົ້າມີຄວາມປະທັບໃຈທີ່ສຸດກັບບັນດາຮູບພາບເອກະສານປະຫວັດສາດ, ຜ່ານບັນດາຮູບພາບດັ່ງກ່າວ ຂ້າພະເຈົ້າມີຄວາມເຂົ້າໃຈແຈ້ງຕື່ມອີກ ກ່ຽວກັບລົດຖັງເລກໝາຍ 390 ຕຳປະຕູທຳນຽບເອກະລາດ ດ້ວຍຈິດໃຈຕັດສິນໃຈຍາດເອົາໄຊຊະນະ, ເປັນຂີດໝາຍປະຫວັດສາດໃນການຕໍ່ຕ້ານຕ້ານອາເມລິກາກູ້ຊາດໄດ້ຮັບໄຊຊະນະຢ່າງສົມບູນ, ພາກເຫນືອພາກໃຕ້ ຫວຽດນາມ ໄດ້ໂຮມເຂົ້າເປັນເອກະພາບ. ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com . ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.