 ທ່ານພົນໂທ ຮວ່າງຊວັນຈຽນ ແຈ້ງໃຫ້ຊາບກ່ຽວກັບວິວັດການກຳນັດມົນລະພິດຢູ່ສະໜາມບິນ ບຽນຮວ່າ (ພາບ: VOV) |
ມື້ນີ້, ພວກເຮົາໄດ້ມີໜ້າຢູ່ສະໜາມບິນ ບຽນຮວ່າ ເພື່ອຈັດບັນດາເຫດການກ່ຽວກັບການກຳຈັດມົນລະພິດສິ່ງແວດລ້ອມ, ມົນລະພິດທາດພິດເຄມີ ດີໂອຊີນ. ບັນດາໝາກຜົນຮ່ວມມືລະອຽດໄດ້ຢັ້ງຢືນຄວາມຕັດສິນໃຈລວມຂອງທັງສອງຝ່າຍໃນການຮ່ວມມືແກ້ໄຂຜົນຮ້າຍຈາກສົງຄາມ, ດ້ວຍຈິດໃຈປະອະດີດຕະການໄວ້, ມຸ່ງໄປເຖິງອະນາຄົດ, ເພື່ອສັນຕິພາບ ແລະ ການພັດທະນາແບບຍືນຍົງ.
ສະໜາມບິນ ບຽນຮວ່າ, ແຂວງ ດົ່ງນາຍ, ໜຶ່ງໃນບັນດາຈຸດຮ້ອນເຮັ່ງຂອງມົນລະພິດທາດພິດ ດີໂອຊີນ ຫຼາຍທີ່ສຸດ ຫວຽດນາມ ໃນປາງສົງຄາມ, ບ່ອນທີ່ເຄີຍເປັນຖານທີ່ໝັ້ນຂອງກອງທັບອາກາດໃນປາງສົງຄາມ, ປັດຈຸບັນນີ້ ພັດກາຍເປັນສັນຍາລັກຂອງການຮ່ວມມືມະນຸດສະທຳ, ຂອງຈິດໃຈຮຳບາດແຜສົງຄາມ ແລະ ມຸ່ງໄປເຖິງອະນາຄົດ.
“ເຫດການມື້ນີ້ ບໍ່ພຽງແຕ່ສືບຕໍ່ບັນດາວຽກງານເຊິ່ງພວກເຮົາໄດ້ປະຕິບັດໃນໄລຍະຜ່ານມາເທົ່ານັ້ນ, ຫາກຍັງໜູນຊ່ວຍ, ສືບຕໍ່ປະກອບສ່ວນຊ່ວຍຊຸກຍູ້ນ້ຳໃຈມິດຕະພາບລະຫວ່າງສອງປະເທດ. ນີ້ກໍແມ່ນການສະແດງໃຫ້ເຫັນຄຳໝັ້ນສັນຍາຢ່າງຈະແຈ້ງທີ່ສຸດສຳລັບການແກ້ໄຂຜົນຮ້າຍຈາກສົງຄາມ ຂອງ ອາເມລິກາ ທີ່ມີຕໍ່ ຫວຽດນາມ”.
 ການມອບ-ຮັບ ເນື້ອທີດິນ ແຮັກຕາ ທີ່ໄດ້ຮັບການກຳຈັດຢ່າງສະອາດ (ພາບ: VOV) |
ວັນທີ 15 ກັນຍາ ຜ່ານມາ, ທ່ານພົນໂທ ຮວ່າງຊວັນຈຽນ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ແລະ ທ່ານ Marc Evans Knappe ເອກອັກຄະລັດຖະທູດ ອາເມລິກາ ປະຈຳ ຫວຽດນາມ ກໍໄດ້ພ້ອມກັນເປັນສັກຂີພິຍານພິທີມອບຮັບເນື້ອທີ່ດິນທີ່ໄດ້ຮັບການບຳບັດຢ່າງສະອາດແລ້ວ, ພິທີເລີ່ມລົງມືກໍ່ສ້າງ, ຕິດຕັ້ງລະບົບເຕັກໂນໂລຢີຄວາມຮ້ອນບຳບັດທາດພິດ ດີໂອຊີນ, ພ້ອມດຽວກັນນັ້ນ, ກໍລົງນາມໃນຂໍ້ຕົກລົງປະກອບຕື່ມ ODA ຊ່ວຍເຫຼືອລ້າຂອງ ອາເມລິກາ ຕື່ມ 32 ລ້ານ USD ເພື່ອປະຕິບັດບັນດາໂຄງການແກ້ໄຂຜົນຮ້າຍຈາກສົງຄາມຢູ່ ຫວຽດນາມ.
ໄປຄຽງຄູ່ກັບບັນດາໂຄງການບຳບັດທາດພິດ ດີໂອຊີນ, ການພົວພັນຕ່າງປະເທດດ້ານປ້ອງກັນຊາດຍັງລະດົມຂົນຂວາຍການເຂົ້າຮ່ວມຂອງຫຼາຍຄູ່ຮ່ວມມື, ອົງການຈັດຕັ້ງສາກົນໃນການຮ່ວມມືເກັບກູ້ລະເບີດຍັງບໍ່ທັນແຕກ. ຢູ່ແຂວງ ກວ໋າງຈິ, ເຂດດິນແດນທີ່ເຄີຍເປັນແນວໜ້າຂອງສົງຄາມອັນດຸເດືອດ, ນີ້ແມ່ນໃຈກາງຂອງຫຼາຍໂຄງການເກັບກູ້ລະເບີດຍັງບໍ່ທັນແຕກສາກົນ.
ລູກລະເບີດແຕ່ລະລູກ, ລູກປືນແຕ່ລະລູກທີ່ໄດ້ພົບເຫັນ ແລະ ທຳລາຍໄດ້ຢ່າງປອດໄພນັ້ນ ແມ່ນມີດິນສະອາດຕື່ມອີກໜຶ່ງຕາແມັດ, ເຊິ່ງໄດ້ເພີ່ມໂອກາດພັດທະນາເສດຖະກິດໃຫ້ແກ່ປະຊາຊົນອີກໂອກາດໜຶ່ງ.
“ກ່ອນໜ້ານັ້ນ, ດິນຢູ່ອ້ອມເຮືອນຂ້າພະເຈົ້າບໍ່ສາມາດປູກຝັງໄດ້ ເພາະຢ້ານວ່າຍັງມີລູກລະເບີດຍັງບໍ່ທັນແຕກເຫຼືອໄວ້. ແຕ່ດຽວນີ້, ຍ້ອນມີບັນດາໜ່ວຍງານເກັບກູ້ລູກລະເບີດມາຊ່ວຍ, ພວກຂ້າພະເຈົ້າອຸ່ນອ່ຽນໃຈປູກຝັງ, ລ້ຽງສັດ, ຊີວິດເປັນປົກກະຕິກວ່າເກົ່າຫຼາຍ”.
ນັບແຕ່ປີ 1993 ມາຮອດປັດຈຸບັນ, ອາເມລິກາ ໄດ້ສະໜອງເງິນຈຳນວນກວ່າ 230 ລ້ານ USD ໃຫ້ແກ່ ຫວຽດນາມ ເພື່ອເກັບກູ້ລະເບີດຍັງບໍ່ທັນແຕກ ແລະ ກຳຈັດທາດພິດ ດີໂອຊິນ. ຍີ່ປຸ່ນ, ນອກແວ, ເຢຍລະມັນ, ອົດສະຕາລີ ໄດ້ຮ່ວມມືກັບກະຊວງປ້ອງກັນປະເທດ ຫວຽດນາມ ໃນການພັດທະນາແຜນທີ່ມົນລະພິດຈາກລູກລະເບີດຍັງບໍ່ທັນແຕກລະດັບຊາດ, ສຸມໃສ່ບັນດາການໜູນຊ່ວຍດ້ານເຕັກນິກເຄື່ອງອຸປະກອນ, ການບຳລຸງສ້າງນັກຊ່ຽວຊານ, ການຖ່າຍທອດເຕັກໂນໂລຢີ... ບັນດາການເຄື່ອນໄຫວຮ່ວມມືສາກົນນີ້ ສະແດງໃຫ້ເຫັນນ້ຳໃຈມະນຸດສະທຳ, ເພື່ອຄວາມປອດໄພ ແລະ ການດຳລົງຊີວິດຂອງປະຊາຊົນ.
ກຳລັງຮັກສາສັນຕິພາບ ຫວຽດນາມ ຍັງນຳຈິດໃຈມະນຸດສະທຳນັ້ນໄປຍັງ ຊູດັງໃຕ້, ສ.ອາຟະລິກາກາງ ຜ່ານບັນດາການເຄື່ອນໄຫວໜູນຊ່ວຍສາທາລະນະສຸກ, ແກ້ໄຂຜົນຮ້າຍຈາກການປະທະກັນ, ຊ່ວຍເຫຼືອປະຊາຊົນຍ້ອນເຫດວິນາດຕະກຳ ແລະ ຊ່ວຍເຫຼືອປະຊາຊົນປະຈຳຖິ່ນ. ບັນດາກິດຈະກຳເຫຼົ່ານັ້ນ ບໍ່ພຽງແຕ່ຍົກສູງກຳລັງຄວາມສາມາດປ້ອງກັນຊາດເທົ່ານັ້ນ, ຫາກຍັງສະແດງໃຫ້ເຫັນເຈດຕະນາດີ, ຄວາມຮັບຜິດຊອບສາກົນ ແລະ ພາບພົດຂອງທະຫານ ຫວຽດນາມ. ທ່ານພັນເອກ ຫງວຽນຢຸຍມິງ ຮອງຫົວໜ້າກົມພົວພັນຕ່າງປະເທດ, ກະຊວງປ້ອງກັນປະເທດ ຫວຽດນາມ ຢັ້ງຢືນວ່າ:
“ນີ້ແມ່ນໜ້າທີ່ສູ້ຮົບໃນສະໄໝສັນຕິພາບ, ແມ່ນໜ້າທີ່ອັນສູງສົ່ງ, ມີຄວາມໝາຍວັດທະນະທຳມະນຸດ, ມະນຸດສະທຳຂອງພັກ ກໍຄືກອງທັບປະຊາຊົນ ຫວຽດນາມ. ຜ່ານນັ້ນ, ກໍປະກອບສ່ວນແຜ່ກະຈາຍພາບພົດຂອງນັກຮົບກອງທັບປະຊາຊົນ ຫວຽດນາມ ໃນສາຍຕາເພື່ອນມິດສາກົນ”.
 ເລີ່ມລົງມືກໍ່ສ້າງລະບົບເຕັກໂນໂລຢີກຳຈັດດີໂອຊິນ (ພາບ: VOV) |
ການພົວພັນດ້ານປ້ອງກັນຊາດ ແລະ ການຮ່ວມມືແກ້ໄຂຜົນຮ້າຍຈາກສົງຄາມ ລ້ວນແຕ່ມຸ່ງໄປເຖິງເປົ້າໝາຍລວມ: ສ້າງຄວາມໄວ້ເນື້ອເຊື່ອໃຈ ແລະ ຮັກສາສັນຕິພາບ. ໂດຍແມ່ນປະເທດທີ່ເຄີຍຜ່ານຜ່າສົງຄາມ, ຫວຽດນາມ ມີຄວາມເຂົ້າໃຈຢ່າງເລິກເຊິ່ງຄຸນຄ່າຂອງສັນຕິພາບ. ທ່ານ Jean-Pierre Lacroix, ຮອງເລຂາທິການໃຫຍ່ ສປຊ ຮັບຜິດຊອບການເຄື່ອນໄຫວຮັກສາສັນຕິພາບ ຕີລາຄາສູງຈິດໃຈດັ່ງກ່າວຂອງ ຫວຽດນາມ.
“ພວກຂ້າພະເຈົ້າຍາມໃດກໍເຫັນບັນດາທັກສະ, ກຳລັງຄວາມສາມາດທີ່ເປັນມືອາຊີບຂອງກຳລັງຮັກສາສັນຕິພາບທີ່ມາຈາກ ຫວຽດນາມ, ຍາມໃດກໍປັບຕົວ ແລະ ປະຕິບັດສຳເລັດວຽກງານໄດ້ເປັນຢ່າງດີ ນັບທັງໃນສະພາບແວດລ້ອມທີ່ຮ້າຍແຮງໃນບໍລິເວນຕ່າງໆ. ການປະກອບສ່ວນຂອງພວກເພື່ອນໄດ້ໜູນຊ່ວຍພວກຂ້າພະເຈົ້າ ສ້າງຄວາມແຕກຕ່າງໃຫ້ແກ່ສັນຕິພາບ, ພິເສດແມ່ນສ້າງຄວາມແຕກຕ່າງໃຫ້ແກ່ປະຊາຄົມຢູ່ຫຼາຍບ່ອນທີ່ຖືກຜົນກະທົບຈາກການປະທະກັນ”.
ຈາກບັນດາຂຸມລະເບີດໃນເມື່ອກ່ອນ, ປັດຈຸບັນນີ້ໄດ້ກາຍເປັນທົ່ງນາຂຽວອຸ່ມທຸ່ມ. ຈາກບັນດາເຂດດິນທີ່ບໍ່ມກິ່ນອາຍຂອງຊີວິດ, ດຽວນີ້ພັດເຕັມໄປດ້ວຍສຽງເວົ້າສຽງຫົວຂອງເດັກນ້ອຍ. ດ້ວຍຈິດໃຈວັດທະນະທຳມະນຸດ, ດ້ວຍຄວາມມານະພະຍາຍາມໃນການພົວພັນຕ່າງປະເທດດ້ານປ້ອງກັນຊາດ ແລະ ດ້ວຍນ້ຳໃຈໄມຕີຈິດມິດຕະພາບສາກົນ, ຫວຽດນາມ ພວມຂຽນເປັນເລື່ອງລາວໃໝ່, ເລື່ອງລາວກ່ຽວກັບສັນຕິພາບ, ການຮ່ວມມື ແລະ ພັດທະນາເປັນເທື່ອລະກ້າວ./.
