ສະມາຊິກສະຫະກອນກະສິກຳ ຈ່ຽງຫັກ ບົວລະບັດໝາກມ່ວງ (ພາບ: baosonla.org.vn) |
ຄອບຄົວທ່ານ ຫງວຽນຕຽນເຮີ້ຍ, ສະຫະກອນດອກໄມ້ ໝາກໄມ້ ກວຽດເຕີມ, ຕາແສງຕູນາງ, ເມືອງອຽນເຈົາ, ແຂວງເຊີນລາ ມີເນື້ອທີ່ປູກຕົ້ນໝາກມ່ວງ 2 ເຮັກຕາ, ໃນນັ້ນ, ມີ 2 ເຮັກຕາໄດ້ຮັບລະຫັດເຂດປູກ, ຜະລິດຕາມຂັ້ນຕອນ VietGap. ປະລິມານໝາກມ່ວງສົດເກັບກ່ຽວໃນແຕ່ລະປີໄດ້ຂຶ້ນເຖິງ 20, 30 ໂຕນ ແລະ ຄອບຄົວທ່ານກໍ່ມີລາຍຮັບເປັນປົກກະຕິ. ທ່ານ ຫງວຽນຕຽນເຮີ້ຍ ໃຫ້ຮູ້ວ່າ:
ຄອບຄົວຂ້າພະເຈົ້າມີເນື້ອທີ່ປູກຕົ້ນໄມ້ກິນໝາກ 3 ເຮັກຕາ. ແຕ່ລະປີ, ສະເພາະການເກັບກ່ຽວໝາກມ່ວງກໍ່ໄດ້ແຕ່ 35-50 ໂຕນ ແລະ ມີ 25-30 ໂຕນບັນລຸມາດຖານສົ່ງອອກ. 2, 3 ປີມານີ້, ໄດ້ຮັບລະຫັດເຂດປູກ, ການສົ່ງອອກກໍ່ມີຄວາມສະດວກກ່ວາ.
ໝາກມັງກອນ-ຜະລິດຕະພັນກະເສດປອດສານພິດຂອງ ເຊີນລາ ມີລະຫັດເຂດປູກ(ພາບ: baosonla.org.vn) |
ປະຈຸບັນ, ເມືອງອຽນເຈົາ, ແຂວງເຊີນລາ ມີເນື້ອທີ່ປູກຕົ້ນໄມ້ກິນໝາກກ່ວາ 11.300 ເຮັກຕາ ໃນນັ້ນ, ກ່ວາ 770 ເຮັກຕາ ແມ່ນໄດ້ຮັບໃບຢັງຢືນ VietGAP. ທາງເມືອງກໍ່ພວມຄຸ້ມຄອງ, ຕິດຕາມກວດກາ 67 ລະຫັດເຂດປູກໃນເນື້ອທີ່ປູກຕົ້ນໄມ້ກິນໝາກປະເພດຕ່າງໆກ່ວາ 1.140 ເຮັກຕາ. ໃນບໍລິເວນເມືອງ, ນັບມື້ນັບມີຫຼາຍເນື້ອທີ່ປູກຝັງໄດ້ໝູນໃຊ້ເຕັກໂນໂລຊີສູງ ຊື່ງໄດ້ຍົກສູງຄຸນຄ່າຜະລິດຕະພັນ ກໍ່ຄືໄດ້ຮັບລະຫັດເຂດປູກ, ສ້າງຄວາມສະດວກໃຫ້ແກ່ການສົ່ງອອກ. ທ່ານ ເຢືອງມິນຫ່າ, ປະທານສະຫະກອນດອກໄມ້ ໝາກໄມ້ ກວຽດເຕີມ, ຕາແສງຕູນາງ, ເມືອງອຽນເຈົາ, ແຂວງເຊີນລາ ໃຫ້ຮູ້ວ່າ:
ເມື່ອໄດ້ຮັບລະຫັດເຂດປູກ, ການຄຸ້ມຄອງກໍ່ງ່າຍດາຍກ່ວາ, ຊາວກະສິກອນກໍ່ເຮັດຕາມການຜະລິດຕາມມາດຖານ Vietgap ງ່າຍກ່ວາເຊັ່ນດຽວກັນ. ຄຸນນະພາບຂອງໝາກໄມ້ກໍ່ດີກ່ວາ ເມື່ອທຽບກັບການເຮັດແບບເສລີ.
ການສະໜອງລະຫັດເຂດປູກຝັງ ໄດ້ຊ່ວຍໃນການຫາຕົ້ນກຳເນີດໄດ້ ກໍ່ຄືຊ່ວຍຄຸ້ມຄອງຂັ້ນຕອນການຜະລິດຢ່າງແໜ້ນແຟ້ນ ແລະ ສ້າງຄວາມໄວ້ເນື້ອເຊື່ອໃຈຕໍ່ຜູ້ໃຊ້ສອຍ. ທ່ານ ຫ່າວັນເຊີນ, ປະທານສະຫະກອນກະສິກຳປອດສານພິດ ຈ່ຽງຫັກ ເມືອງອຽນເຈົາ, ແຂວງເຊີນລາ ໃຫ້ຮູ້ວ່າ:
ນັບແຕ່ມື້ໄດ້ຮັບລະຫັດເຂດປູກຝັງ, ບັນດາສະມາຊິກສະຫະກອນ, ຊາວກະສິກອນ ໄດ້ຮູ້ວິທີຜະລິດຕາມຂໍ້ກຳນົດຂອງບັນດາເຂດປູກທີ່ມີລະຫັດ ແລະ ສາມາດຮັບໃຊ້ຕະຫຼາດແຫ່ງຕ່າງໆ. ພວກຂ້າພະເຈົ້າ ໄດ້ຂົນຂວາຍ ປຊຊ ເຮັດຕາມ ແລະ ປະຕິບັດບັນດາຂັ້ນຕອນການບົວລະບັດ, ນຳໃຊ້ຝຸ່ນ, ຢາຮັກສາພືດຜັກຕາມການກຳນົດ.
ຕາມການສະຖິຕິ, ທົ່ວແຂວງ ເຊີນລາ ໄດ້ສະໜອງ 281 ລະຫັດເຂດປູກຝັງ ດ້ວຍເນື້ອທີ່ທັງໝົດກ່ວາ 4.600 ເຮັກຕາ ; ໃນນັ້ນ, ທາງແຂວງພວມຮັກສາ 205 ລະຫັດເຂດປູກເພື່ອສົ່ງອອກ, ຫຼາຍກ່ວາໝູ່ແມ່ນໄດ້ປູກຕົ້ນໝາກລຳໄຍ, ໝາກມ່ວງ, ໝາກກ້ວຍ, ໝາກໝັ້ນ, ໝາກມັງກອນ…ອັນໄດ້ສ້າງແລວນິຕິກຳໃຫ້ແກ່ຜະລິດຕະພັນກະເສດປະເພດຕ່າງໆຂອງແຂວງ ເຂົ້າຮ່ວມຕະຫຼາດສົ່ງອອກໄປຍັງ 21 ປະເທດ ແລະ ເຂດແຄ້ວນໃນໂລກ. ທ່ານ ເຢືອງຢາດິ້ງ, ຫົວໜ້າກົມປູກຝັງ ແລະ ຮັກສາພືດຜັກແຂວງ ເຊີນລາ ໃຫ້ຮູ້ວ່າ:
ເລື່ອງສະໜອງລະຫັດເຂດປູກຝັງ ມີຄວາມໝາຍສຳຄັນທີ່ສຸດ ໃນການຜະລິດກະສິກຳ. ພິເສດ, ເມື່ອພື້ນຖານກະສິກຳ ແລະ ເສດຖະກິດ ຫວຽດນາມ ພວມເຊື່ອມໂຍງຢ່າງເລິກເຊິ່ງກ້ວາງຂວາງ ແລະ ຜະລິດຕະພັນກະເສດ ກໍ່ພວມແມ່ນຜະລິດຕະພັນຕົ້ນຕໍເພື່ອສົ່ງອອກ.
ເລື່ອງສ້າງລະຫັດເຂດປູກຝັງໃຫ້ແກ່ຊາວກະສິກອນ, ສະຫະກອນ, ວິສາຫະກິດໃນບໍລະເວນແຂວງ ເຊີນລາ ໄດ້ປະກອບສ່ວນຊຸກຍູ້ການຫັນເປັນດີຈີຕອນ ໃນການຜະລິດກະສິກຳ, ເພີ່ມສະມັດຕະພາບ ແລະ ຫລຸດຜ່ອນກຳລັງແຮງງານໃຫ້ແກ່ຊາວກະສິກອນ. ພິເສດ, ວຽກງານນີ້ ໄດ້ເພີ່ມຄຸນຄ່າໃນການຜະລິດກະສິກຳ, ຊ່ວຍການສົ່ງອອກຜະລິດຕະພັນກະເສດຂອງແຂວງ ເຊີນລາ ໃຫ້ນັບມື້ນັບພັດທະນາກ່ວາອີກ./.
