ຕອນເຊົ້າວັນທີ 17/11 ຢູ່ ບາລີ ປະເທດ ອິນໂດເນເຊຍ, ທ່ານນາຍົກລັດຖະມົນຕີ ຫງວຽນເຕີນຢູງ ພ້ອມກັບບັນດາການນຳ ອາຊຽນ ເຂົ້າຮ່ວມພິທີໄຂກອງປະຊຸມສຸດຍອດ ອາຊຽນ ຄັ້ງທີ 19 ແລະ ກອງປະຊຸມສຸດຍອດທີ່ກ່ຽວຂ້ອງ. ກ່າວຄຳເຫັນໄຂກອງປະຊຸມ, ປະທານາທິບໍດີ ອິນໂດເນເຊຍ Susilo Bambang Yudhoyono ໄດ້ຊີ້ໃຫ້ເຫັນບັນດາໝາກຜົນອັນຕັ້ງຫນ້າໃນວິວັດການສ້າງປະຊາຄົມ, ຜັນຂະຫຍາຍການເຊື່ອມຈອດ ອາຊຽນ, ຮ່ວມສຳພັນພາກພື້ນ, ເປີດກວ້າງ ແລະ ເພີ່ມພູນຄູນສ້າງການພົວພັນຂອງ ອາຊຽນ ກັບບັນດາຄູ່ເຈລະຈາ ກໍ່ຄື ການຮັກສາບົດບາດສູນກາງຂອງສະຫະສະມາຄົມໃນໂຄງປະກອບທີ່ພວມສ້າງຂຶ້ນ. ພາຍຫລັງໄຂກອງປະຊຸມສຸດຍອດ ອາຊຽນ 19, ທ່ານນາຍົກລັດຖະມົນຕີ ຫງວຽນເຕີນຢູງ ພ້ອມກັບການນຳບັນດາປະເທດ ອາຊຽນ ດຳເນີນວາລະປະຊຸມຄົບຄະນະກ່ຽວກັບການເພີ່ມທະວີການຮ່ວມມືສ້າງປະຊາຄົມ, ຜັນຂະຫຍາຍການເຊື່ອມຈອດ ອາຊຽນ ແລະ ເປີດກວ້າງການພົວພັນການຕ່າງປະເທດຂອງສະຫະສະມາຄົມ. ຢູ່ນອກກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ມີການພົບປະກັບນາຍົກລັດຖະມົນຕີລາວ ທອງສິງ ທຳມະວົງ. ນາຍົກທັງສອງທ່ານໄດ້ເຫັນດີ ຈະຈັດຕັ້ງການເຄື່ອນໄຫວແທດຈິງຫລາຍຢ່າງໃນປີແຫ່ງມິດຕະພາບ ຫວຽດນາມ ລາວ ປີ 2012 ເນື່ອງໃນໂອກາດລະນຶກ 50 ປີ ແຫ່ງວັນສ້າງການພົວພັນທາງການທູດ ແລະ 35 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ - ລາວ. ນາຍົກລັດຖະມົນຕີທັງສອງທ່ານໄດ້ຢັ້ງຢືນ ສືບຕໍ່ສົມທົບກັນຢ່າງແຫນ້ນແຟ້ນ ໃນການຮ່ວມມືພາກພື້ນຄື: ອາຊຽນ ແລະ ອະນຸພາກພື້ນແມ່ນນ້ຳຂອງ ພ້ອມກັບບັນດາປະເທດໃນພາກພື້ນ ຮັບປະກັນການນຳໃຊ້ແຫລ່ງນ້ຳແມ່ນ້ຳຂອງແບບຍື່ນຍົງ.
